Asebter amenzawi
Bgayet: Ghoul iger-d tiɣri i ussifses n ussefti deg uḥric n uḥewwes
BGAYET – Aneɣlaf n usseqɛed n wakal, n tmerrit d tenḍi, Amar Ghoul, iger-d tiɣri ass n letniyen deg Bgayet akken ad yettwassifses ccɣel n ussefti n yidrimen deg uḥric n tmerrit, am wakken ay yenna i yimḍebbren ideblanen ad kksen unjugen seg ubrid n wid yebɣan ad ssseftin deg waya. «Yessefk ad ttwakksen yikmaren, imi tikkal, ikmaren-a ur sɛin ara lmeɛna am wakken ay ḥebbsen assefti (deg tmerrit), yerna yerna yessefk ad nɛeddi s tɣawla ɣer lebni », ɣef wakken ay d-yenna, am wakken ay d-yerna d akken iswi n waya netta d « afras n wakal » ara yettunefken i waya. I lmend n waya, yessefk ad frunt wuguren yerzan akal deg temnaḍt-a, ma ulac, ad ttunefkent temsal-a i uɣlif ara yeddmen ṛṛay iwatan. Aneɣlaf iḥettet-d akken ad ttwaɣelltent temnaḍin n ussemɣer n tmerrit, yerna assefɛel n usenfar-a yessefk ad d-yili war leɛḍil yerna ad d-iban deg unrar s lebni n tdumṣukiwin ara d-yessidifen idrimen yerna ad d-xelqent imukan n umahil (axeddim). I lmend n waya, Mass Ghoul iger-d tiɣri i tkebbaniyin ay yettwaqeblen akken ad bdunt isenfaren-nsent war leɛḍil yerna war ma ṛǧant tisekkirin yeqqnen ɣer uheyyi n wakal, imi, ɣef leḥsab-nnes, tisekkirin-a « ttɛeḍḍilent aṭas », am wakken ay yessebɣes tikebbaniyin-a kken ad sqeɛdent akal i yiman-nsent, yerna awanak (ddula) iɛuhed-iten ad ten-iɛawen deg waya, ladɣa deg wayen yerzan areḍḍal n yidrimen. « Ulayɣer ma ṛǧan arma tettwaheyya temnaḍt-nni s lekmal-nnes akken ad bdun assefti. Yessefk ad ɣiwlen yerna ad fersen imukan s ussifses n ussefɛel n yisenfaren », ɣef wakken ay d-yenna i yimḍebbren idiganen n uḥric-a, ladɣa wid ay d-yelhan s temnaḍin n ussemɣer n tmerrit n Agriwen d Uweqqas ay d-yusan deg ugmuḍ (ccerq) n twilayt n Bgayet, d snat n temnaḍin ara yettwasqeɛden yerna ad bnun deg-sent ttawilat n tmerrit. ɣef leḥsab n uneɣlaf, tikli-a yessefk ad d-tili s ṣṣwab d umeyyez s uqader n uɣawas n usseqɛed n twilayt d uzenziɣ aɣelnaw n usseqɛed n wakal (SNAT). Aneɣlaf ifuṛes daɣ akken ad yerzu ɣef kra n yisensa ay yettwabnan seg melmi kan yerna sɛeddan-as-d daɣ kra n yisenfaren s teẓrawiyin n 3D (3 n tsektiwin). Dɣa i lmend n waya, yenna-d uneɣlaf d akken yesɛa laman d akken aḥric n tmerrit ad d-yerfed iman-nnes deg temnaḍt-a imi aṭas n tdumṣukiwin ay la ssefrayen ad tent-bnun: azal n 20.000 n wusuten ara d-yernun nnig 4.000-nni ay yellan imir-a, yerna isensa imaynuten ad sɛun tasegda d ssrabes n tɣara. Aneɣlaf ay d-yennan d akken yeẓra tamerrit n yiri n lebḥeṛ mazal tejmeɛ lxir ɣer sdat, yenna-d daɣ d akken yessefk ad d-yili unewweɛ deg tmerrit yerna ad yettunefk wazal daɣ i tmerrit n udrar ay yuklalen, ɣef leḥsab-nnes, aqeyyem n tidet. « Maci ala d lebḥeṛ ay yellan. Yessefk ad nnadi ɣef wakk leṣnaf niḍen n tmerrit, ama d tamerrit n lḥemmamat, tin n udawi, tin n twennaḍt, tin n tfellaḥt, neɣ tiyaḍ », ɣef wakken ay d-yenna, am wakken ay d-yerna d akken « llant tzemmar yerna aya ur yeḥwaǧ ara assefti ameqran ».
