Asebter amenzawi
Mali tger-d tiɣri i Yiɣlanen Yeddukklen akken ad ɛassen tamnaḍt n ugafa n wakal-nnes
IƔLANEN YEDDUKKLEN (Iwanaken Yeddukklen) – Mali tger-d tiɣri i Yiɣlanen Yeddukklen akken ad tt-tɛawen ad d-terr adabu-nnes ɣer ugafa n tmurt, anda ay mazal tigrawin tirebrabin, am wakken ay tessuter lemɛawna akken ad tḥaṛeb assetti n tehyufin. Tella-d teɣri-a kra n wussan sdeffir ma ifuk ustenyi n umtawa n talwit d umsuɣal aɣelnaw gar unabaḍ amali d tegrawin tisertiyin-tiserdasiyin n ugafa.
« Tuzwirt n tuzwirin nettat d aɛawen i ussebded n udabu n uwanak (amali) deg wakk timnaḍin n tmurt d yiriri n yimeẓla inmettiyen n llsas », ɣef wakken ay d-yenna uneɣlaf amali n tɣawsiwin n uzɣar, Abdoulaye Diop, sdat Useqqamu n tɣellist n Yiɣlanen Yeddukklen.
Imi lewṣaya n Tuɣdaḍt n Yiɣlanen Yeddukklen deg Mali (Minusma) ad tt-tettwaɛawed i tallit niḍen, Mass Diop yenna-d d akken a win yufan ad ttwaznen 10.000 n yiserdasen n Yiɣlanen Yeddukklen ɣer Mali, am wakken ay d-iger tiɣri i Useqqamu n Tɣellist akken « ad yefk ttesriḥ i tikkelt niḍen i Minusma akken ad tɛawen anabaḍ amali ad yesserked timdinin tigejdanin, ladɣa tid n ugafa n Mali ».
« Yessefk ad d-nger tiɣri i Munusma akken ad tessemɣer timnaḍin deg txeddem deg ugafa n Mali yerna ad tesɛu ttawil ayyes ara tesseǧhed lecɣal-nnes », ɣef wakken ay d-yenna Mass Diop.
« Aseqqamu n tɣellist yessefk ad yecreḍ d akken ala d iɣallen imsellḥen imaliyen ara yesɛun azref akken ad ḍḍfen timdinin n wakal aɣelnaw », ɣef wakken ay d-yenna uneɣlaf amali n tɣawsiwin n uzɣar.
Aneɣlaf Diop yenna-d daɣ d akken « yessefk lemɛawna n Yiɣlanen Yeddukklen ad d-yeddu yid-s lebɣi iǧehden i lmend n yimenɣi mgal ussetti n tehyufin ».
« Tajrimt yuddsen, ladɣa assetti n tehyufin, d nettat ay d-yettakfen idrimen i taluft », ɣef wakken ay d-yenna.
Mass Diop yenna-d, seg yidis niḍen d akken Bamalo tɛewwel akken « ad tessefɛel akk ayen ayɣef tefka lɛahed », am wakken ay yessuter seg « tegrawin timsellḥin ay yestenyan (amtawa) ad beɛdent akken iban ɣef tegrawin timsellḥin d tegrawin ay yessettayen tihyufin ».
Asegsas uzzig n Yiɣlane Yeddukklen i Mali, Mongi Hamdi, yenna-d d akken sdeffir ustenyi n umtawa n talwit deg Mali, « yessefk ad d-yebdu umahil (axeddim) n tidet akken ad zemren yimezdaɣen n Mali ad ẓren lfayda n talwit ».
Seg yidis niḍen, iger-d tiɣri i tsuda tidrimanin tigraɣlanin « akken ad bdunt tukci n yidrimen war leɛḍil i ussefɛel n umtawa-a ».
« Deg tidet, imezdaɣen n Mali, ladɣa wid n temnaḍin n ugafa, ssuturen-d kan yiwet n tɣawsa: taɣellist d tuqqla n yimeẓla inmettiyen n llsas, ladɣa imeẓla n tdawsa d ussegmi ».
