Asebter amenzawi

Tamɣunt 1ut/2015-2016: « Kra n temliliyin deg Tmaneɣt ad tent-id-sqerben ɣer wass n lexmis »

LEZZAYER – Aselway n Temɣunt n tkurt n uḍar tamsadurt, Mahfoud Kerbadj, yenna-d ass n ttlata d akken timliliyin ay ssefran ad d-ilint deg Lezzayer Tamaneɣt ad tent-id-sqerben « s tin n tsureft » ɣer wass n lexmis i lmend n tsemhuyt n 2015-2016 ara yebdun deg tgara n dduṛt n 14 d 15 Ɣuct.

« Nefra-tt-id ad d-nesseqreb kra n temliliyin ay nessefra ad d-ilint deg Lezzayer Tamaneɣt ɣer wass n lexmis akken ur d-ttilint ara ugar n 3 n temliliyin deg yiwen n wass deg tmaneɣt », ɣef wakken ay d-yenna Mass Kerbadj i Tnegga n Yisalan n Lezzayer.

Tamɣunt n tkurt n uḍar tamsadurt tekcef-d ass n ssebt 13 Yunyu ahil n tsemhuyt ay d-yetteddun n tkurt n uḍar n Temɣunt 1ut, yerna ass amezwaru n tsemhuyt-a ad d-tili deg-s temlilit gar snat n teɣlamin timeqranin n tmaneɣt, MC Lezzayer d CR Belouizdad.

Menɣir timlilit-a, ass-nni amezwaru ad d-ilint deg-s snat n temliliyin niḍen deg Lezzayer Tamaneɣt: NA Ḥusin Day-USM Lezzayer d USM Lḥeṛṛac-JS Ṣawra.

« Yiwen wass n telɣuɣa yezmer ad d-iḥaz 3 n wussan n dduṛt, lexmis, ljemɛa d ssebt », ɣef wakken ay d-yenna Mass Kerbadj ay d-yernan d akken « maci akk ussan n telɣuɣa ad d-ḥazen ass n lexmis ».

Seg yidis niḍen, aselway n Temɣunt n tkurt n uḍar tamsadurt yenna-d d akken timliliyin gar teɣlamin timeqranin n tmaneɣt « ad tent-uraren deg usarir ulimpi n 5 Yulyu, ala ma yella MC Lezzayer ur tettwassezdeɣ ara deg usarir-a ».