Asebter amenzawi
Acuḥḥu i teẓwert: tukci n wazal i sselɛa taɣelnawt
LEZZAYER – Tanegga taɣelnawt n usmal d usseqdec uṣwib n teẓwert (APRUE) tenna-d d akken tettkel ɣef ufares aɣelnaw deg wahil-nnes i lmend n cceḥḥa ɣef teẓwert deg 2016-2030, ɣef wakken ay d-yenna unemhal amatu n tnegga-a, Mohamed Salah Bouzeriba, i Tnegga n Yisalan n Lezzayer.
Ahil-a, ay yeddem seg melmi kan Useqqamu n yineɣlafen, d win ay yessefrayen ad yeg aɛzal n lḥamu i 100.000 n tnezduɣin i useggas, afraq n 10 n yimelyunen n tesfiwin (llambat) ay d-yessagaren trisiti d ubeddel n 1,3 d amelyun n tkeṛṛusin akken ad tteddunt s lgaz upitṛul imengi seg-a arma d 2030.
Iswi n wahil-a netta d assenqes seg walluy uɛjil deg usseqdec n teẓwert (trisiti d lgaz) d urẓam n tewwurt i tkebbaniyin ay yebɣan ad sseftint deg ufares n teẓwert, ɣef wakken ay d-yessefhem Mass Bouzeriba.
« Tasertit-nneɣ n tmellilt n teẓwert d tin ay yetteklen ɣef ufares aɣelnaw s ussebded n temguri tadigant akken ad d-tirxis sselɛa yerna ad d-ttwaxelqen yimukan n umahil (axeddim). Ur nezmir ara ad d-nxayel lebni n wahil igerrzen am wa s waǧaw n sselɛa seg uzɣar », ɣef wakken ay d-yenna.
Ɣef leḥsab-nnes, aɣraf n tesfiwin timsigrin (i yixxamen d yizenqan), ifarisen n uɛzal i usseḥmu, iḥemmayen n waman yetteddun s tafukt d yixezzanen n lgaz n upitṛul imengi d inurar deg Lezzayer tezmer ad d-tesnerni tamguri tadigant ara igerrzen.
Deg wayen yerzan tisfiwin timsigrin, tella yiwet n tkebbanit tusligt ay tent-yettṛekkiben maca afares-nnes ur d-yettqam ara taswiɛt-a. « Nessaram ad yili ufares aɣelnaw meɣɣren ugar akken ad yeṛwu ssuq aɣelnaw ay yeḥwaǧen azal n 50 n yimelyunen n tesfiwin i useggas », ɣef wakken ay d-yenna yimḍebber-a.
Seg yidis niḍen, aṭas n tkebbaniyin ay d-yesseknen nneyya-nsent akken ad bdunt ad xeddment ifarisen n uɛzal i usseḥmu d yiferki yellan d yiwen seg yifarisen n uɛzal, ɣef wakken ay d-yenna uneɣlaf amatu n Tnegga taɣelnawt n usmal d usseqdec uṣwib n teẓwert ay d-ibedren yiwet n tkebbanit ay yesɛan tizemmar akken ad sseṛwunt ssuq aɣelnaw deg unrar-a.
« Iswi-nneɣ netta d assefɛel n wahil-a s ttawilat-nneɣ. Deg tazwara, ad d-naǧew cwiṭ n sselɛa, maca, seg yidis niḍen, ad nesmel ahil-a akken ad d-nejbed tikebbaniyin ay izemren ad sseftint deg unrar-a yerna ad d-nesnulfu ssuq ara idumen deg unrar n tmellilt n teẓwert », ɣef wakken ay d-yenna.
Dɣa i lmend n waya, Tanegga taɣelnawt n usmal d usseqdec uṣwib n teẓwert la tessefray ad d-teg timliliyin s umɛawen d yiɣlifen ay terza temsalt (aɣlif n temguri, win n teẓwert d win n twennaḍt) akken ad selmen ahil-a s usskan n tlemmiẓin n ussefti ay yellan d ujbad n tkebbaniyin akken ad ttekkint deg ussefɛel-nnes.
Ɣef leḥsab n Mass Bouzeriba, attekki n yimseftiyen deg ussefɛel n wahil-a n tmellilt n teẓwert d ayen ay yeḥwaǧen daɣ iḥezziben ara asen-igen ifadden d wid ara yernun ad asen-ssifessen ccɣel. Iḥezziben-a yessefk ad ten-ddmen uɣlif n temguri d lminad d Tnegga taɣelnawt n tneflit n ussefti (ANDI).
Tanegga taɣelnawt n usmal d usseqdec uṣwib n teẓwert tezmer, seg yidis-nnes, ad yeḍfer imseftiyen s ussileɣ d ussidrem n tezrawin s Usenduq aɣelnaw n uḥkam n teẓwert (FNME).
Assefɛel n wahil-a n tneflit n tmellilt n teẓwert ad teǧǧ Lezzayer ad d-tessiger 42 n yimelyaṛen n yidulaṛen seg-a ɣer 2030 s ussenqes n 9% n wayen ay tesseqdac d taẓwert ɣef leḥsab n Tnegga taɣelnawt n usmal d usseqdec uṣwib n teẓwert.
Aṭas n lecɣal i 2015
I useggas n 2015, Tanegga taɣelnawt n usmal d usseqdec uṣwib n teẓwert tessefra aṭas n lecɣal i lmend n usselhu n tmellilt n teẓwert deg ukatar n wahil n tmellilt n teẓwert n 2011-2014, deg wayen yerzan ladɣa tanezduɣt, amesni, assersi n yixezzanen n lgaz n upitṛul imengi (GPL) d ussersi n yiḥemmayen n waman yetteddun s tafukt.
Deg unrar n lbenyan, Tanegga-a la tessefray ad teg isenfaren n uɛzal n usseḥmu deg lbenyanat yellan yagi (10.000 n yimiteren imkuẓen n uslag n zzǧaǧ), d ussersi n 4000 n yimitren imkuẓen (m2) n yiḥemmayen n waman s tafukt i uxxam d 3.000 n yimitren imkuẓen (m2) n yimitren yiḥemmayen n waman ucriken.
Nnig waya, Tanegga ad tefreq amelyun n tesfiwin timsigrin deg wakk timnaḍin n wakal aɣelnaw.
Deg wayen yerzan tafat n yibriden, Tanegga la tessefray ad tekkes 50.000 n tesfiwin n uzaweq yerna ad terr deg umkan-nsent tisfiwin n uṣudyum n lḥeṛs unnig, am wakken ara tekkes 50.000 n yisenduqen n tafat s yisenduqen ara d-yessigiren taẓwert, am wakken ara tessers 50 n yinagrawen n ussefrek n tafat n yibriden.
Deg uḥric n umesni, Tanegga la tessefray ad terr 20.000 n tkeṛṛusin timaẓlayin d tikeṛṛusin ay yetteddun s lgaz n upitṛul imengi, am wakken ara d-taɣ 20 n lkiṛan ara yetteddun s lgaz agaman.
Aɛawen n tkebbaniyin ay yettetten aṭas n teẓwert
Tanegga n usmal d usseqdec uṣwib n teẓwert testenya leɛqed d Tegrawt tamgurant n usiman n Lezzayer (GICA) deg 2012, yerna ɣef leḥsab n Mass Bouzeriba, iswi n umtawa-a d aḥkam n usseqdec n teẓwert deg lluzinat tinagdudin n usiman.
« Iswi n umtawa-a netta d asseqreb n usseqdec n teẓwert deg lluzinat n usiman tidzayriyin ɣer yilugan igraɣlanen deg unrar-a », ɣef wakken ay d-yenna.
Ṣṣenf-a n « yimtawayen yettwastenyan s lebɣi » d win deg ay d-yettili udeqqeq ɣef usseqdec n teẓwert d tezrawin deg tkebbaniyin ay yettetten aṭas n teẓwert akken ad d-jebden ugar tikebbaniyin ay yebɣan ad sseftint deg unrar n cceḥḥa i teẓwert.
S waya, amtawa am wa d win ay yettaǧǧan takebbanit tamgurant « ad tessenqes assuder-nnes n teẓwert s uheyyi d uqader n yiswan deg tallit ibanen ».
Deg temsalt-a, Tanegga n usmal d usseqdec uṣwib n teẓwert tessaram ad ternu ad teg imtawayen am wi d tkebbaniyin niḍen yesseqdacen aṭas taẓwert am Sonatrahc, Sonelgaz d usuddis n wuzzal d unfed n Lḥeǧǧaṛ.
(Sɣur Meriem Zaït)
