ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵛⵓⵃⵃⵓ ⵉ ⵜⴻⵥⵡⴻⵔⵜ: ⵜⵓⴽⵛⵉ ⵏ ⵡⴰⵣⴰⵍ ⵉ ⵙⵙⴻⵍⵄⴰ ⵜⴰⵖⴻⵍⵏⴰⵡⵜ

ⵍⴻⵣⵣⴰⵢⴻⵔ – ⵜⴰⵏⴻⴳⴳⴰ ⵜⴰⵖⴻⵍⵏⴰⵡⵜ ⵏ ⵓⵙⵎⴰⵍ ⴷ ⵓⵙⵙⴻⵇⴷⴻⵛ ⵓⵚⵡⵉⴱ ⵏ ⵜⴻⵥⵡⴻⵔⵜ (ⴰⵒⵔⵓⴻ) ⵜⴻⵏⵏⴰ-ⴷ ⴷ ⴰⴽⴽⴻⵏ ⵜⴻⵜⵜⴽⴻⵍ ⵖⴻⴼ ⵓⴼⴰⵔⴻⵙ ⴰⵖⴻⵍⵏⴰⵡ ⴷⴻⴳ ⵡⴰⵀⵉⵍ-ⵏⵏⴻⵙ ⵉ ⵍⵎⴻⵏⴷ ⵏ ⵛⵛⴻⵃⵃⴰ ⵖⴻⴼ ⵜⴻⵥⵡⴻⵔⵜ ⴷⴻⴳ 2016-2030, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵎⵀⴰⵍ ⴰⵎⴰⵜⵓ ⵏ ⵜⵏⴻⴳⴳⴰ-ⴰ, ⵎⵧⵀⴰⵎⴻⴷ ⵙⴰⵍⴰⵀ ⴱⵧⵓⵣⴻⵔⵉⴱⴰ, ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ.

ⴰⵀⵉⵍ-ⴰ, ⴰⵢ ⵢⴻⴷⴷⴻⵎ ⵙⴻⴳ ⵎⴻⵍⵎⵉ ⴽⴰⵏ ⵓⵙⴻⵇⵇⴰⵎⵓ ⵏ ⵢⵉⵏⴻⵖⵍⴰⴼⴻⵏ, ⴷ ⵡⵉⵏ ⴰⵢ ⵢⴻⵙⵙⴻⴼⵔⴰⵢⴻⵏ ⴰⴷ ⵢⴻⴳ ⴰⵄⵣⴰⵍ ⵏ ⵍⵃⴰⵎⵓ ⵉ 100.000 ⵏ ⵜⵏⴻⵣⴷⵓⵖⵉⵏ ⵉ ⵓⵙⴻⴳⴳⴰⵙ, ⴰⴼⵔⴰⵇ ⵏ 10 ⵏ ⵢⵉⵎⴻⵍⵢⵓⵏⴻⵏ ⵏ ⵜⴻⵙⴼⵉⵡⵉⵏ (ⵍⵍⴰⵎⴱⴰⵜ) ⴰⵢ ⴷ-ⵢⴻⵙⵙⴰⴳⴰⵔⴻⵏ ⵜⵔⵉⵙⵉⵜⵉ ⴷ ⵓⴱⴻⴷⴷⴻⵍ ⵏ 1,3 ⴷ ⴰⵎⴻⵍⵢⵓⵏ ⵏ ⵜⴽⴻⵕⵕⵓⵙⵉⵏ ⴰⴽⴽⴻⵏ ⴰⴷ ⵜⵜⴻⴷⴷⵓⵏⵜ ⵙ ⵍⴳⴰⵣ ⵓⵒⵉⵜⵕⵓⵍ ⵉⵎⴻⵏⴳⵉ ⵙⴻⴳ-ⴰ ⴰⵔⵎⴰ ⴷ 2030.

ⵉⵙⵡⵉ ⵏ ⵡⴰⵀⵉⵍ-ⴰ ⵏⴻⵜⵜⴰ ⴷ ⴰⵙⵙⴻⵏⵇⴻⵙ ⵙⴻⴳ ⵡⴰⵍⵍⵓⵢ ⵓⵄⵊⵉⵍ ⴷⴻⴳ ⵓⵙⵙⴻⵇⴷⴻⵛ ⵏ ⵜⴻⵥⵡⴻⵔⵜ (ⵜⵔⵉⵙⵉⵜⵉ ⴷ ⵍⴳⴰⵣ) ⴷ ⵓⵔⵥⴰⵎ ⵏ ⵜⴻⵡⵡⵓⵔⵜ ⵉ ⵜⴽⴻⴱⴱⴰⵏⵉⵢⵉⵏ ⴰⵢ ⵢⴻⴱⵖⴰⵏ ⴰⴷ ⵙⵙⴻⴼⵜⵉⵏⵜ ⴷⴻⴳ ⵓⴼⴰⵔⴻⵙ ⵏ ⵜⴻⵥⵡⴻⵔⵜ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵙⵙⴻⴼⵀⴻⵎ ⵎⴰⵙⵙ ⴱⵧⵓⵣⴻⵔⵉⴱⴰ.

« ⵜⴰⵙⴻⵔⵜⵉⵜ-ⵏⵏⴻⵖ ⵏ ⵜⵎⴻⵍⵍⵉⵍⵜ ⵏ ⵜⴻⵥⵡⴻⵔⵜ ⴷ ⵜⵉⵏ ⴰⵢ ⵢⴻⵜⵜⴻⴽⵍⴻⵏ ⵖⴻⴼ ⵓⴼⴰⵔⴻⵙ ⴰⵖⴻⵍⵏⴰⵡ ⵙ ⵓⵙⵙⴻⴱⴷⴻⴷ ⵏ ⵜⴻⵎⴳⵓⵔⵉ ⵜⴰⴷⵉⴳⴰⵏⵜ ⴰⴽⴽⴻⵏ ⴰⴷ ⴷ-ⵜⵉⵔⵅⵉⵙ ⵙⵙⴻⵍⵄⴰ ⵢⴻⵔⵏⴰ ⴰⴷ ⴷ-ⵜⵜⵡⴰⵅⴻⵍⵇⴻⵏ ⵢⵉⵎⵓⴽⴰⵏ ⵏ ⵓⵎⴰⵀⵉⵍ (ⴰⵅⴻⴷⴷⵉⵎ). ⵓⵔ ⵏⴻⵣⵎⵉⵔ ⴰⵔⴰ ⴰⴷ ⴷ-ⵏⵅⴰⵢⴻⵍ ⵍⴻⴱⵏⵉ ⵏ ⵡⴰⵀⵉⵍ ⵉⴳⴻⵔⵔⵣⴻⵏ ⴰⵎ ⵡⴰ ⵙ ⵡⴰⴵⴰⵡ ⵏ ⵙⵙⴻⵍⵄⴰ ⵙⴻⴳ ⵓⵣⵖⴰⵔ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⵖⴻⴼ ⵍⴻⵃⵙⴰⴱ-ⵏⵏⴻⵙ, ⴰⵖⵔⴰⴼ ⵏ ⵜⴻⵙⴼⵉⵡⵉⵏ ⵜⵉⵎⵙⵉⴳⵔⵉⵏ (ⵉ ⵢⵉⵅⵅⴰⵎⴻⵏ ⴷ ⵢⵉⵣⴻⵏⵇⴰⵏ), ⵉⴼⴰⵔⵉⵙⴻⵏ ⵏ ⵓⵄⵣⴰⵍ ⵉ ⵓⵙⵙⴻⵃⵎⵓ, ⵉⵃⴻⵎⵎⴰⵢⴻⵏ ⵏ ⵡⴰⵎⴰⵏ ⵢⴻⵜⵜⴻⴷⴷⵓⵏ ⵙ ⵜⴰⴼⵓⴽⵜ ⴷ ⵢⵉⵅⴻⵣⵣⴰⵏⴻⵏ ⵏ ⵍⴳⴰⵣ ⵏ ⵓⵒⵉⵜⵕⵓⵍ ⵉⵎⴻⵏⴳⵉ ⴷ ⵉⵏⵓⵔⴰⵔ ⴷⴻⴳ ⵍⴻⵣⵣⴰⵢⴻⵔ ⵜⴻⵣⵎⴻⵔ ⴰⴷ ⴷ-ⵜⴻⵙⵏⴻⵔⵏⵉ ⵜⴰⵎⴳⵓⵔⵉ ⵜⴰⴷⵉⴳⴰⵏⵜ ⴰⵔⴰ ⵉⴳⴻⵔⵔⵣⴻⵏ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⵉⵙⴼⵉⵡⵉⵏ ⵜⵉⵎⵙⵉⴳⵔⵉⵏ, ⵜⴻⵍⵍⴰ ⵢⵉⵡⴻⵜ ⵏ ⵜⴽⴻⴱⴱⴰⵏⵉⵜ ⵜⵓⵙⵍⵉⴳⵜ ⴰⵢ ⵜⴻⵏⵜ-ⵢⴻⵜⵜⵕⴻⴽⴽⵉⴱⴻⵏ ⵎⴰⵛⴰ ⴰⴼⴰⵔⴻⵙ-ⵏⵏⴻⵙ ⵓⵔ ⴷ-ⵢⴻⵜⵜⵇⴰⵎ ⴰⵔⴰ ⵜⴰⵙⵡⵉⵄⵜ-ⴰ. « ⵏⴻⵙⵙⴰⵔⴰⵎ ⴰⴷ ⵢⵉⵍⵉ ⵓⴼⴰⵔⴻⵙ ⴰⵖⴻⵍⵏⴰⵡ ⵎⴻⵖⵖⵔⴻⵏ ⵓⴳⴰⵔ ⴰⴽⴽⴻⵏ ⴰⴷ ⵢⴻⵕⵡⵓ ⵙⵙⵓⵇ ⴰⵖⴻⵍⵏⴰⵡ ⴰⵢ ⵢⴻⵃⵡⴰⴵⴻⵏ ⴰⵣⴰⵍ ⵏ 50 ⵏ ⵢⵉⵎⴻⵍⵢⵓⵏⴻⵏ ⵏ ⵜⴻⵙⴼⵉⵡⵉⵏ ⵉ ⵓⵙⴻⴳⴳⴰⵙ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵢⵉⵎⴹⴻⴱⴱⴻⵔ-ⴰ.

ⵙⴻⴳ ⵢⵉⴷⵉⵙ ⵏⵉⴹⴻⵏ, ⴰⵟⴰⵙ ⵏ ⵜⴽⴻⴱⴱⴰⵏⵉⵢⵉⵏ ⴰⵢ ⴷ-ⵢⴻⵙⵙⴻⴽⵏⴻⵏ ⵏⵏⴻⵢⵢⴰ-ⵏⵙⴻⵏⵜ ⴰⴽⴽⴻⵏ ⴰⴷ ⴱⴷⵓⵏⵜ ⴰⴷ ⵅⴻⴷⴷⵎⴻⵏⵜ ⵉⴼⴰⵔⵉⵙⴻⵏ ⵏ ⵓⵄⵣⴰⵍ ⵉ ⵓⵙⵙⴻⵃⵎⵓ ⴷ ⵢⵉⴼⴻⵔⴽⵉ ⵢⴻⵍⵍⴰⵏ ⴷ ⵢⵉⵡⴻⵏ ⵙⴻⴳ ⵢⵉⴼⴰⵔⵉⵙⴻⵏ ⵏ ⵓⵄⵣⴰⵍ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵖⵍⴰⴼ ⴰⵎⴰⵜⵓ ⵏ ⵜⵏⴻⴳⴳⴰ ⵜⴰⵖⴻⵍⵏⴰⵡⵜ ⵏ ⵓⵙⵎⴰⵍ ⴷ ⵓⵙⵙⴻⵇⴷⴻⵛ ⵓⵚⵡⵉⴱ ⵏ ⵜⴻⵥⵡⴻⵔⵜ ⴰⵢ ⴷ-ⵉⴱⴻⴷⵔⴻⵏ ⵢⵉⵡⴻⵜ ⵏ ⵜⴽⴻⴱⴱⴰⵏⵉⵜ ⴰⵢ ⵢⴻⵙⵄⴰⵏ ⵜⵉⵣⴻⵎⵎⴰⵔ ⴰⴽⴽⴻⵏ ⴰⴷ ⵙⵙⴻⵕⵡⵓⵏⵜ ⵙⵙⵓⵇ ⴰⵖⴻⵍⵏⴰⵡ ⴷⴻⴳ ⵓⵏⵔⴰⵔ-ⴰ.

« ⵉⵙⵡⵉ-ⵏⵏⴻⵖ ⵏⴻⵜⵜⴰ ⴷ ⴰⵙⵙⴻⴼⵄⴻⵍ ⵏ ⵡⴰⵀⵉⵍ-ⴰ ⵙ ⵜⵜⴰⵡⵉⵍⴰⵜ-ⵏⵏⴻⵖ. ⴷⴻⴳ ⵜⴰⵣⵡⴰⵔⴰ, ⴰⴷ ⴷ-ⵏⴰⴵⴻⵡ ⵛⵡⵉⵟ ⵏ ⵙⵙⴻⵍⵄⴰ, ⵎⴰⵛⴰ, ⵙⴻⴳ ⵢⵉⴷⵉⵙ ⵏⵉⴹⴻⵏ, ⴰⴷ ⵏⴻⵙⵎⴻⵍ ⴰⵀⵉⵍ-ⴰ ⴰⴽⴽⴻⵏ ⴰⴷ ⴷ-ⵏⴻⵊⴱⴻⴷ ⵜⵉⴽⴻⴱⴱⴰⵏⵉⵢⵉⵏ ⴰⵢ ⵉⵣⴻⵎⵔⴻⵏ ⴰⴷ ⵙⵙⴻⴼⵜⵉⵏⵜ ⴷⴻⴳ ⵓⵏⵔⴰⵔ-ⴰ ⵢⴻⵔⵏⴰ ⴰⴷ ⴷ-ⵏⴻⵙⵏⵓⵍⴼⵓ ⵙⵙⵓⵇ ⴰⵔⴰ ⵉⴷⵓⵎⴻⵏ ⴷⴻⴳ ⵓⵏⵔⴰⵔ ⵏ ⵜⵎⴻⵍⵍⵉⵍⵜ ⵏ ⵜⴻⵥⵡⴻⵔⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⴷⵖⴰ ⵉ ⵍⵎⴻⵏⴷ ⵏ ⵡⴰⵢⴰ, ⵜⴰⵏⴻⴳⴳⴰ ⵜⴰⵖⴻⵍⵏⴰⵡⵜ ⵏ ⵓⵙⵎⴰⵍ ⴷ ⵓⵙⵙⴻⵇⴷⴻⵛ ⵓⵚⵡⵉⴱ ⵏ ⵜⴻⵥⵡⴻⵔⵜ ⵍⴰ ⵜⴻⵙⵙⴻⴼⵔⴰⵢ ⴰⴷ ⴷ-ⵜⴻⴳ ⵜⵉⵎⵍⵉⵍⵉⵢⵉⵏ ⵙ ⵓⵎⵄⴰⵡⴻⵏ ⴷ ⵢⵉⵖⵍⵉⴼⴻⵏ ⴰⵢ ⵜⴻⵔⵣⴰ ⵜⴻⵎⵙⴰⵍⵜ (ⴰⵖⵍⵉⴼ ⵏ ⵜⴻⵎⴳⵓⵔⵉ, ⵡⵉⵏ ⵏ ⵜⴻⵥⵡⴻⵔⵜ ⴷ ⵡⵉⵏ ⵏ ⵜⵡⴻⵏⵏⴰⴹⵜ) ⴰⴽⴽⴻⵏ ⴰⴷ ⵙⴻⵍⵎⴻⵏ ⴰⵀⵉⵍ-ⴰ ⵙ ⵓⵙⵙⴽⴰⵏ ⵏ ⵜⵍⴻⵎⵎⵉⵥⵉⵏ ⵏ ⵓⵙⵙⴻⴼⵜⵉ ⴰⵢ ⵢⴻⵍⵍⴰⵏ ⴷ ⵓⵊⴱⴰⴷ ⵏ ⵜⴽⴻⴱⴱⴰⵏⵉⵢⵉⵏ ⴰⴽⴽⴻⵏ ⴰⴷ ⵜⵜⴻⴽⴽⵉⵏⵜ ⴷⴻⴳ ⵓⵙⵙⴻⴼⵄⴻⵍ-ⵏⵏⴻⵙ.

ⵖⴻⴼ ⵍⴻⵃⵙⴰⴱ ⵏ ⵎⴰⵙⵙ ⴱⵧⵓⵣⴻⵔⵉⴱⴰ, ⴰⵜⵜⴻⴽⴽⵉ ⵏ ⵢⵉⵎⵙⴻⴼⵜⵉⵢⴻⵏ ⴷⴻⴳ ⵓⵙⵙⴻⴼⵄⴻⵍ ⵏ ⵡⴰⵀⵉⵍ-ⴰ ⵏ ⵜⵎⴻⵍⵍⵉⵍⵜ ⵏ ⵜⴻⵥⵡⴻⵔⵜ ⴷ ⴰⵢⴻⵏ ⴰⵢ ⵢⴻⵃⵡⴰⴵⴻⵏ ⴷⴰⵖ ⵉⵃⴻⵣⵣⵉⴱⴻⵏ ⴰⵔⴰ ⴰⵙⴻⵏ-ⵉⴳⴻⵏ ⵉⴼⴰⴷⴷⴻⵏ ⴷ ⵡⵉⴷ ⴰⵔⴰ ⵢⴻⵔⵏⵓⵏ ⴰⴷ ⴰⵙⴻⵏ-ⵙⵙⵉⴼⴻⵙⵙⴻⵏ ⵛⵛⵖⴻⵍ. ⵉⵃⴻⵣⵣⵉⴱⴻⵏ-ⴰ ⵢⴻⵙⵙⴻⴼⴽ ⴰⴷ ⵜⴻⵏ-ⴷⴷⵎⴻⵏ ⵓⵖⵍⵉⴼ ⵏ ⵜⴻⵎⴳⵓⵔⵉ ⴷ ⵍⵎⵉⵏⴰⴷ ⴷ ⵜⵏⴻⴳⴳⴰ ⵜⴰⵖⴻⵍⵏⴰⵡⵜ ⵏ ⵜⵏⴻⴼⵍⵉⵜ ⵏ ⵓⵙⵙⴻⴼⵜⵉ (ⴰⵏⴷⵉ).

ⵜⴰⵏⴻⴳⴳⴰ ⵜⴰⵖⴻⵍⵏⴰⵡⵜ ⵏ ⵓⵙⵎⴰⵍ ⴷ ⵓⵙⵙⴻⵇⴷⴻⵛ ⵓⵚⵡⵉⴱ ⵏ ⵜⴻⵥⵡⴻⵔⵜ ⵜⴻⵣⵎⴻⵔ, ⵙⴻⴳ ⵢⵉⴷⵉⵙ-ⵏⵏⴻⵙ, ⴰⴷ ⵢⴻⴹⴼⴻⵔ ⵉⵎⵙⴻⴼⵜⵉⵢⴻⵏ ⵙ ⵓⵙⵙⵉⵍⴻⵖ ⴷ ⵓⵙⵙⵉⴷⵔⴻⵎ ⵏ ⵜⴻⵣⵔⴰⵡⵉⵏ ⵙ ⵓⵙⴻⵏⴷⵓⵇ ⴰⵖⴻⵍⵏⴰⵡ ⵏ ⵓⵃⴽⴰⵎ ⵏ ⵜⴻⵥⵡⴻⵔⵜ (ⴼⵏⵎⴻ).

ⴰⵙⵙⴻⴼⵄⴻⵍ ⵏ ⵡⴰⵀⵉⵍ-ⴰ ⵏ ⵜⵏⴻⴼⵍⵉⵜ ⵏ ⵜⵎⴻⵍⵍⵉⵍⵜ ⵏ ⵜⴻⵥⵡⴻⵔⵜ ⴰⴷ ⵜⴻⴵⴵ ⵍⴻⵣⵣⴰⵢⴻⵔ ⴰⴷ ⴷ-ⵜⴻⵙⵙⵉⴳⴻⵔ 42 ⵏ ⵢⵉⵎⴻⵍⵢⴰⵕⴻⵏ ⵏ ⵢⵉⴷⵓⵍⴰⵕⴻⵏ ⵙⴻⴳ-ⴰ ⵖⴻⵔ 2030 ⵙ ⵓⵙⵙⴻⵏⵇⴻⵙ ⵏ 9% ⵏ ⵡⴰⵢⴻⵏ ⴰⵢ ⵜⴻⵙⵙⴻⵇⴷⴰⵛ ⴷ ⵜⴰⵥⵡⴻⵔⵜ ⵖⴻⴼ ⵍⴻⵃⵙⴰⴱ ⵏ ⵜⵏⴻⴳⴳⴰ ⵜⴰⵖⴻⵍⵏⴰⵡⵜ ⵏ ⵓⵙⵎⴰⵍ ⴷ ⵓⵙⵙⴻⵇⴷⴻⵛ ⵓⵚⵡⵉⴱ ⵏ ⵜⴻⵥⵡⴻⵔⵜ.

ⴰⵟⴰⵙ ⵏ ⵍⴻⵛⵖⴰⵍ ⵉ 2015

ⵉ ⵓⵙⴻⴳⴳⴰⵙ ⵏ 2015, ⵜⴰⵏⴻⴳⴳⴰ ⵜⴰⵖⴻⵍⵏⴰⵡⵜ ⵏ ⵓⵙⵎⴰⵍ ⴷ ⵓⵙⵙⴻⵇⴷⴻⵛ ⵓⵚⵡⵉⴱ ⵏ ⵜⴻⵥⵡⴻⵔⵜ ⵜⴻⵙⵙⴻⴼⵔⴰ ⴰⵟⴰⵙ ⵏ ⵍⴻⵛⵖⴰⵍ ⵉ ⵍⵎⴻⵏⴷ ⵏ ⵓⵙⵙⴻⵍⵀⵓ ⵏ ⵜⵎⴻⵍⵍⵉⵍⵜ ⵏ ⵜⴻⵥⵡⴻⵔⵜ ⴷⴻⴳ ⵓⴽⴰⵜⴰⵔ ⵏ ⵡⴰⵀⵉⵍ ⵏ ⵜⵎⴻⵍⵍⵉⵍⵜ ⵏ ⵜⴻⵥⵡⴻⵔⵜ ⵏ 2011-2014, ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵍⴰⴷⵖⴰ ⵜⴰⵏⴻⵣⴷⵓⵖⵜ, ⴰⵎⴻⵙⵏⵉ, ⴰⵙⵙⴻⵔⵙⵉ ⵏ ⵢⵉⵅⴻⵣⵣⴰⵏⴻⵏ ⵏ ⵍⴳⴰⵣ ⵏ ⵓⵒⵉⵜⵕⵓⵍ ⵉⵎⴻⵏⴳⵉ (ⴳⵒⵍ) ⴷ ⵓⵙⵙⴻⵔⵙⵉ ⵏ ⵢⵉⵃⴻⵎⵎⴰⵢⴻⵏ ⵏ ⵡⴰⵎⴰⵏ ⵢⴻⵜⵜⴻⴷⴷⵓⵏ ⵙ ⵜⴰⴼⵓⴽⵜ.

ⴷⴻⴳ ⵓⵏⵔⴰⵔ ⵏ ⵍⴱⴻⵏⵢⴰⵏ, ⵜⴰⵏⴻⴳⴳⴰ-ⴰ ⵍⴰ ⵜⴻⵙⵙⴻⴼⵔⴰⵢ ⴰⴷ ⵜⴻⴳ ⵉⵙⴻⵏⴼⴰⵔⴻⵏ ⵏ ⵓⵄⵣⴰⵍ ⵏ ⵓⵙⵙⴻⵃⵎⵓ ⴷⴻⴳ ⵍⴱⴻⵏⵢⴰⵏⴰⵜ ⵢⴻⵍⵍⴰⵏ ⵢⴰⴳⵉ (10.000 ⵏ ⵢⵉⵎⵉⵜⴻⵔⴻⵏ ⵉⵎⴽⵓⵥⴻⵏ ⵏ ⵓⵙⵍⴰⴳ ⵏ ⵣⵣⴵⴰⴵ), ⴷ ⵓⵙⵙⴻⵔⵙⵉ ⵏ 4000 ⵏ ⵢⵉⵎⵉⵜⵔⴻⵏ ⵉⵎⴽⵓⵥⴻⵏ (ⵎ2) ⵏ ⵢⵉⵃⴻⵎⵎⴰⵢⴻⵏ ⵏ ⵡⴰⵎⴰⵏ ⵙ ⵜⴰⴼⵓⴽⵜ ⵉ ⵓⵅⵅⴰⵎ ⴷ 3.000 ⵏ ⵢⵉⵎⵉⵜⵔⴻⵏ ⵉⵎⴽⵓⵥⴻⵏ (ⵎ2) ⵏ ⵢⵉⵎⵉⵜⵔⴻⵏ ⵢⵉⵃⴻⵎⵎⴰⵢⴻⵏ ⵏ ⵡⴰⵎⴰⵏ ⵓⵛⵔⵉⴽⴻⵏ.

ⵏⵏⵉⴳ ⵡⴰⵢⴰ, ⵜⴰⵏⴻⴳⴳⴰ ⴰⴷ ⵜⴻⴼⵔⴻⵇ ⴰⵎⴻⵍⵢⵓⵏ ⵏ ⵜⴻⵙⴼⵉⵡⵉⵏ ⵜⵉⵎⵙⵉⴳⵔⵉⵏ ⴷⴻⴳ ⵡⴰⴽⴽ ⵜⵉⵎⵏⴰⴹⵉⵏ ⵏ ⵡⴰⴽⴰⵍ ⴰⵖⴻⵍⵏⴰⵡ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⴰⴼⴰⵜ ⵏ ⵢⵉⴱⵔⵉⴷⴻⵏ, ⵜⴰⵏⴻⴳⴳⴰ ⵍⴰ ⵜⴻⵙⵙⴻⴼⵔⴰⵢ ⴰⴷ ⵜⴻⴽⴽⴻⵙ 50.000 ⵏ ⵜⴻⵙⴼⵉⵡⵉⵏ ⵏ ⵓⵣⴰⵡⴻⵇ ⵢⴻⵔⵏⴰ ⴰⴷ ⵜⴻⵔⵔ ⴷⴻⴳ ⵓⵎⴽⴰⵏ-ⵏⵙⴻⵏⵜ ⵜⵉⵙⴼⵉⵡⵉⵏ ⵏ ⵓⵚⵓⴷⵢⵓⵎ ⵏ ⵍⵃⴻⵕⵙ ⵓⵏⵏⵉⴳ, ⴰⵎ ⵡⴰⴽⴽⴻⵏ ⴰⵔⴰ ⵜⴻⴽⴽⴻⵙ 50.000 ⵏ ⵢⵉⵙⴻⵏⴷⵓⵇⴻⵏ ⵏ ⵜⴰⴼⴰⵜ ⵙ ⵢⵉⵙⴻⵏⴷⵓⵇⴻⵏ ⴰⵔⴰ ⴷ-ⵢⴻⵙⵙⵉⴳⵉⵔⴻⵏ ⵜⴰⵥⵡⴻⵔⵜ, ⴰⵎ ⵡⴰⴽⴽⴻⵏ ⴰⵔⴰ ⵜⴻⵙⵙⴻⵔⵙ 50 ⵏ ⵢⵉⵏⴰⴳⵔⴰⵡⴻⵏ ⵏ ⵓⵙⵙⴻⴼⵔⴻⴽ ⵏ ⵜⴰⴼⴰⵜ ⵏ ⵢⵉⴱⵔⵉⴷⴻⵏ.

ⴷⴻⴳ ⵓⵃⵔⵉⵛ ⵏ ⵓⵎⴻⵙⵏⵉ, ⵜⴰⵏⴻⴳⴳⴰ ⵍⴰ ⵜⴻⵙⵙⴻⴼⵔⴰⵢ ⴰⴷ ⵜⴻⵔⵔ 20.000 ⵏ ⵜⴽⴻⵕⵕⵓⵙⵉⵏ ⵜⵉⵎⴰⵥⵍⴰⵢⵉⵏ ⴷ ⵜⵉⴽⴻⵕⵕⵓⵙⵉⵏ ⴰⵢ ⵢⴻⵜⵜⴻⴷⴷⵓⵏ ⵙ ⵍⴳⴰⵣ ⵏ ⵓⵒⵉⵜⵕⵓⵍ ⵉⵎⴻⵏⴳⵉ, ⴰⵎ ⵡⴰⴽⴽⴻⵏ ⴰⵔⴰ ⴷ-ⵜⴰⵖ 20 ⵏ ⵍⴽⵉⵕⴰⵏ ⴰⵔⴰ ⵢⴻⵜⵜⴻⴷⴷⵓⵏ ⵙ ⵍⴳⴰⵣ ⴰⴳⴰⵎⴰⵏ.

ⴰⵄⴰⵡⴻⵏ ⵏ ⵜⴽⴻⴱⴱⴰⵏⵉⵢⵉⵏ ⴰⵢ ⵢⴻⵜⵜⴻⵜⵜⴻⵏ ⴰⵟⴰⵙ ⵏ ⵜⴻⵥⵡⴻⵔⵜ

ⵜⴰⵏⴻⴳⴳⴰ ⵏ ⵓⵙⵎⴰⵍ ⴷ ⵓⵙⵙⴻⵇⴷⴻⵛ ⵓⵚⵡⵉⴱ ⵏ ⵜⴻⵥⵡⴻⵔⵜ ⵜⴻⵙⵜⴻⵏⵢⴰ ⵍⴻⵄⵇⴻⴷ ⴷ ⵜⴻⴳⵔⴰⵡⵜ ⵜⴰⵎⴳⵓⵔⴰⵏⵜ ⵏ ⵓⵙⵉⵎⴰⵏ ⵏ ⵍⴻⵣⵣⴰⵢⴻⵔ (ⴳⵉⵛⴰ) ⴷⴻⴳ 2012, ⵢⴻⵔⵏⴰ ⵖⴻⴼ ⵍⴻⵃⵙⴰⴱ ⵏ ⵎⴰⵙⵙ ⴱⵧⵓⵣⴻⵔⵉⴱⴰ, ⵉⵙⵡⵉ ⵏ ⵓⵎⵜⴰⵡⴰ-ⴰ ⴷ ⴰⵃⴽⴰⵎ ⵏ ⵓⵙⵙⴻⵇⴷⴻⵛ ⵏ ⵜⴻⵥⵡⴻⵔⵜ ⴷⴻⴳ ⵍⵍⵓⵣⵉⵏⴰⵜ ⵜⵉⵏⴰⴳⴷⵓⴷⵉⵏ ⵏ ⵓⵙⵉⵎⴰⵏ.

« ⵉⵙⵡⵉ ⵏ ⵓⵎⵜⴰⵡⴰ-ⴰ ⵏⴻⵜⵜⴰ ⴷ ⴰⵙⵙⴻⵇⵔⴻⴱ ⵏ ⵓⵙⵙⴻⵇⴷⴻⵛ ⵏ ⵜⴻⵥⵡⴻⵔⵜ ⴷⴻⴳ ⵍⵍⵓⵣⵉⵏⴰⵜ ⵏ ⵓⵙⵉⵎⴰⵏ ⵜⵉⴷⵣⴰⵢⵔⵉⵢⵉⵏ ⵖⴻⵔ ⵢⵉⵍⵓⴳⴰⵏ ⵉⴳⵔⴰⵖⵍⴰⵏⴻⵏ ⴷⴻⴳ ⵓⵏⵔⴰⵔ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.

ⵚⵚⴻⵏⴼ-ⴰ ⵏ « ⵢⵉⵎⵜⴰⵡⴰⵢⴻⵏ ⵢⴻⵜⵜⵡⴰⵙⵜⴻⵏⵢⴰⵏ ⵙ ⵍⴻⴱⵖⵉ » ⴷ ⵡⵉⵏ ⴷⴻⴳ ⴰⵢ ⴷ-ⵢⴻⵜⵜⵉⵍⵉ ⵓⴷⴻⵇⵇⴻⵇ ⵖⴻⴼ ⵓⵙⵙⴻⵇⴷⴻⵛ ⵏ ⵜⴻⵥⵡⴻⵔⵜ ⴷ ⵜⴻⵣⵔⴰⵡⵉⵏ ⴷⴻⴳ ⵜⴽⴻⴱⴱⴰⵏⵉⵢⵉⵏ ⴰⵢ ⵢⴻⵜⵜⴻⵜⵜⴻⵏ ⴰⵟⴰⵙ ⵏ ⵜⴻⵥⵡⴻⵔⵜ ⴰⴽⴽⴻⵏ ⴰⴷ ⴷ-ⵊⴻⴱⴷⴻⵏ ⵓⴳⴰⵔ ⵜⵉⴽⴻⴱⴱⴰⵏⵉⵢⵉⵏ ⴰⵢ ⵢⴻⴱⵖⴰⵏ ⴰⴷ ⵙⵙⴻⴼⵜⵉⵏⵜ ⴷⴻⴳ ⵓⵏⵔⴰⵔ ⵏ ⵛⵛⴻⵃⵃⴰ ⵉ ⵜⴻⵥⵡⴻⵔⵜ.

ⵙ ⵡⴰⵢⴰ, ⴰⵎⵜⴰⵡⴰ ⴰⵎ ⵡⴰ ⴷ ⵡⵉⵏ ⴰⵢ ⵢⴻⵜⵜⴰⴵⴵⴰⵏ ⵜⴰⴽⴻⴱⴱⴰⵏⵉⵜ ⵜⴰⵎⴳⵓⵔⴰⵏⵜ « ⴰⴷ ⵜⴻⵙⵙⴻⵏⵇⴻⵙ ⴰⵙⵙⵓⴷⴻⵔ-ⵏⵏⴻⵙ ⵏ ⵜⴻⵥⵡⴻⵔⵜ ⵙ ⵓⵀⴻⵢⵢⵉ ⴷ ⵓⵇⴰⴷⴻⵔ ⵏ ⵢⵉⵙⵡⴰⵏ ⴷⴻⴳ ⵜⴰⵍⵍⵉⵜ ⵉⴱⴰⵏⴻⵏ ».

ⴷⴻⴳ ⵜⴻⵎⵙⴰⵍⵜ-ⴰ, ⵜⴰⵏⴻⴳⴳⴰ ⵏ ⵓⵙⵎⴰⵍ ⴷ ⵓⵙⵙⴻⵇⴷⴻⵛ ⵓⵚⵡⵉⴱ ⵏ ⵜⴻⵥⵡⴻⵔⵜ ⵜⴻⵙⵙⴰⵔⴰⵎ ⴰⴷ ⵜⴻⵔⵏⵓ ⴰⴷ ⵜⴻⴳ ⵉⵎⵜⴰⵡⴰⵢⴻⵏ ⴰⵎ ⵡⵉ ⴷ ⵜⴽⴻⴱⴱⴰⵏⵉⵢⵉⵏ ⵏⵉⴹⴻⵏ ⵢⴻⵙⵙⴻⵇⴷⴰⵛⴻⵏ ⴰⵟⴰⵙ ⵜⴰⵥⵡⴻⵔⵜ ⴰⵎ ⵙⵧⵏⴰⵜⵔⴰⵀⵛ, ⵙⵧⵏⴻⵍⴳⴰⵣ ⴷ ⵓⵙⵓⴷⴷⵉⵙ ⵏ ⵡⵓⵣⵣⴰⵍ ⴷ ⵓⵏⴼⴻⴷ ⵏ ⵍⵃⴻⴵⴵⴰⵕ.

(ⵙⵖⵓⵔ ⵎⴻⵔⵉⴻⵎ ⵣⴰïⵜ)