Asebter amenzawi
Taluft deg Burundi: anabaḍ yeqqel-d ɣer umciweṛ
BUǧUMBURA (Burundi) – Anabaḍ yeqqel-d ass n laṛebɛa ɣer umciweṛ aserti deg Burundi sdeffir ma iɣunza amciweṛ-a ay d-yellan ddaw leɛnaya n Yiɣlanen Yeddukklen, ɣef wakken ay d-nnan ttawilat n yisalan.
« Wa d isali yelhan, anabaḍ aburundi yeqqel-d ɣer umciweṛ aserti seg tlemmast n wass-a, ula ma nesḥassef imi akabar iḥekmen tamurt mazal-it iɣab (seg umciweṛ) », ɣef wakken ay d-tenna yiwet n teɣbalut n yibdammasen ay d-tebder tnegga n AFP.
Amciweṛ ikemmel ass n ttlata ddaw leɛnaya n ugesas amaynu n Yiɣlanen Yeddukklen, Asinigali Abdoulaye Bathily, 5 n wussan uqbel ma llant-d tefranin tiwamniyin n wass n letniyen ayɣef d-yella wugur.
Akabar ay iḥekmen tamurt, Cndd-FDD, yenna-d ass n ttlata d akken yugi ad yettekki deg umciweṛ taswiɛt-a, yerna yenna-d d akken ṛṛay-a n umciweṛ ay d-yellan kra kan n wussan uqbel tefranin « iswi-nnes d acewwel n tefranin ».
Aneɣlaf n tɣawsiwin n daxel, Edouard Nduwimana, agensas n unabaḍ aburundi deg lemcawṛat-a, yenna-d d akken ula d netta iɣunza timlilit n wass n ttlata, war ma yenna-d maɣef, am wakken ur d-yessefhem ara maɣef ay d-yeqqel ɣer umciweṛ ass n laṛebɛa.
Deg umahil-nsen (axeddim) n tebdammast, Iɣlanen Yeddukklen la xeddmen ɣer yidis n Tdukli Tafriqit d tuddsiwin tigernabaḍin n Tefriqt n Ugmuḍ d Yiglemimen Imeqranen.
« D idisan (ay yemxaṣamen deg taluft-a) ara tt-id-yefrun ɣef wayen ay yessefken ad yettweg deg wayen yerzan ahil n melmi ara d-ilint tefranin d temsal niḍen », ɣef wakken ay d-yenna ugensas uzzig n Yiɣlanen Yeddukklen i Yigelmimen Imeqranen, Ibrahima Fall, deg wakud aydeg idis n uselway yetthem tagrawt-nni n yidiplumatiyen d akken « la tɛerreḍ ad tergel abrid i ussuddes n tefranin ».
Burundi tḥuza-tt yiwet n taluft tasertit d tameqrant seg wasmi ay d-yenna uselway Pierre Nkurunziza d akken ad d-yessers iman-nnes ɣer tefranin i tikkelt tis 3, yerna tifranin tiselwayanin deg tmurt-a ad d-ilint ass n 15 Yulyu. Ixṣimen-nnes ttwalin d akken timmazwert-nnes ɣer tefranin teffeɣ i tmenḍawt d umtawa n Arusha ay ifuken ṭṭrad aɣarim deg Burundi (1993-2006).
Amciweṛ yeḥbes deg tenqiḍt talemmast n taluft-a: tamsalt n uttekki n Nkurunziza i tikkelt tis 3 deg tefranin
Taluft tasertit n Burundi d tin aydeg d-llant tmesbaniyin qrib yal ass yerna timesbaniyin-nni qqiment qrib ayyur d uzgen ama deg tmaneɣt Bujumbura, ama deg kra n temdinin n tmurt. Imesbaniyen ssutren akken ur d-yesrusuy ara Nkurunziza iman-nnes ɣer tefranin tiselwayanin i tikkelt tis 3 yerna yella-d deg-sent yimenɣi aydeg mmuten medden.
Ixṣimen n Mass Nkurunziza d umɣiwan agraɣlan ttwalin d akken tagnit ur twata ara i ussuddes n tefranin aydeg yeṣfan.
