Asebter amenzawi
Tijrimin n ṭṭrad deg Ɣezza: Isṛayil tebɣa ad teswaɣ aṛabul n Yiɣlanen Yeddukklen
LEZZAYER – Aṛabul n Yiɣlanen Yeddukklen ay d-yeffɣen seg melmi kan ɣef Ɣezza d win ay yessaẓren s teqseḥ Isṛayil ɣef « tejrimin n ṭṭrad » ay tga deg tesfift n Ɣezza deg 2014. Ɣef waya ay d-tebda Isṛayil yiwet n tḥemla tadiplumatit akken ad teswaɣ aqbal n uṛabul-a deg Yiɣlanen Yeddukklen. Ma d Ifalesṭiniyen ɛewwlen akken ad caṛɛen Isṛayil deg Ccṛeɛ n uɛaqeb agraɣlan ara ireẓmen aḥtac ɣef tejrimin tisṛayiliyin.
Deg yiwen n uṛabul ay d-yeffɣen ass n letniyen, taseqqamut timziregt n tsestant n Useqqamu n yizerfan n umdan n Yiɣlanen Yeddukklen tenna-d d akken « tessemlal-d » isalan yesɛan azal ay d-yesskanayen d akken yezmer lḥal ad tili Isṛayil tga tijrimin n ṭṭrad asmi ay tetɛedda ɣef tesfift n Ɣezza gar 7 Yulyu d 26 Ɣuct 2014.
Ugar n 2.200 n Yifalesṭiniyen, amur ameqran deg-sen d iɣarimen, ay yettwenɣen deg tyitiwin-nni tisṛayiliyin tigenwanin ay d-yellan war aḥbas ɣef Ɣezza deg 50-nni n wussan n ṭṭrad.
« Temɣer n yixeṣṣaren d unḍerri n yimdanen ay d-yellan deg Ɣezza ur d-teḍri uqbel », ɣef wakken ay d-tenna tselwayt n tseqqamut n Yiɣlanen Yeddukklen, Mary McGowan Davis deg teswiɛt-nni deg ay d-yettwakcef uṛabul-a.
Taseqqamut tessaẓer igen isṛayili ladɣa ɣef « usseqdec aneẓẓaw n leslaḥat ay d-yettwaxedmen akken ad nɣen neɣ ad jerḥen deg temnaḍt tameqrant », am wakken ay d-tenna d akken « asseqdec n leslaḥ am wa deg temnaḍin deg llan aṭas n yimezdaɣen d ayen ay d-yesskanayen aɛemmed deg tmenɣiwt war ameyyez gar yiɣarimen d yimenɣan ».
Isestanen nnan-d d akken 142 n twaculin ay yesṛuḥen, ma ulac, 3 seg yiɛeyyalen-nsent deg ṣṣenf-a n tyitiwin ay yeglan s wazal n 551 n yigerdan.
Aṛabul-a n 183 n yisebtar ad d-yili fell-as uskasi deg 29 Yunyu deg Useqqamu n yizerfan n umdan n Yiɣlanen Yeddukklen, yerna ma sɛeddan-t, ad yettunefk i Ugraw amatu n Yiɣlanen Yeddukklen anda ara ssutren i umaru amatu Ban Ki-moon ad yeḍfer assefɛel-nnes.
Isṛayil la tɛerreḍ ad tergel abrid i usɛeddi n uṛabul-a deg Yiɣlanen Yeddukklen
Ayen ay tugad Isṛayil ladɣa netta d Ifalesṭiniyen ay izemren ad sqedcen aṛabul-a akken ad caṛɛen yes-s Isṛayil deg Ccṛeɛ n uɛaqeb agraɣlan imi d aya ara ireẓmen abrid i ucaṛeɛ n yimḍebbren isṛayiliyen.
Ass n ttlata, aɣmis isṛayili n Yediot Aharonot yenna-d d akken Isṛayil tebda-d taḥemla tadiplumatit tamaynut i urgal n ubrid i ṛṛay-nni ayɣef msefhament tmura taɛṛabin deg Useqqamu n yizerfan n umdan n Yiɣlanen Yeddukklen imi ay d-nnant ad deɣrent (ad buṭint) akken ma llant i lmend n uqbal n uṛabul-a deg Useqqamu n yizerfan n umdan.
Ɣef leḥsab n uɣmis-a, imḍebbren isṛayiliyen bnan d akken ad d-yili udɣar (lbuṭ) i lmend n uqbal n uṛabul-a deg wussan ay d-yetteddun deg Useqqamu anda timura taɛṛabin sɛant aṭas n yimeddukal.
S waya, kra n yidiplumatiyen ispṛayiliyen bdan-d, ɣef leḥsab n teɣbalut-a, amciweṛ deg thara, akked yimaslaḍen iǧehden n Useqqamu n yizerfan n umdan akken ad reglen abrid i uqbal n uṛabul-a.
Aɣmis-a isṛayili ayallas yenna-d d akken tezmer daɣ ad d-tili tḥemla n tezniwt i lmend n tukksa n ttehmat mgal yigen isṛayili s usbeyyen d akken ṭṭrad ay yennuɣ deg Ɣezza yella-d « s uqader n yilugan igraɣlanen ».
Ifalesṭiniyen ad ccetkin ass n lexmis i Ccṛeɛ n uɛaqeb agraɣlan
Qrib aseggas sdeffir tḥemla-nni taserdasit mgal Ɣezza, Ifalesṭiniyen nnan-d d akken ad ssersen ass n lexmis akaram-nsen amezwaru ɣer Ccṛeɛ n uɛaqeb agraɣlan i lmend n beddu n uḥtac ɣef tejrimin n ṭṭrad tisṛayiliyin.
Akaram-a ad yettunefk i temwekkelt Fatou Bensouda ass n 25 Yunyu, ɣef leḥsab n wakken ay d-yenna Ammar Hijazi, yiwen n yimḍebber n tɣawsiwin n uzɣar deg Falesṭin, yerna akaram-a ad ilin deg-s yiferdisen ɣef tegnit d leḥsabat yeqqnen ɣer tuḍḍfa tisṛayilit, assehres, aḥbas n medden ur igin acemma d tsebbiwin ay d-tettaf Isṛayil akken ad tneɣ Ifalesṭiniyen. S waya, iswi n ukaram-a netta d asseqneɛ n Massa Bensouda akken ad terẓem, « war leɛḍil », aḥtac.
Akaram-a ur d-yettakf ara ttfaṣil, imi Ifalesṭiniyen smenyafen ad ǧǧen aya i teswiɛt niḍen, ɣef leḥsab n ṛṛay ara teddem temwekkelt, ɣef wakken ay d-yenna yimḍebber-a afalesṭini.
Mass Hijazi yenna-d d akken akaram-a ara as-d-yettunefken « ad yili d amatu, d leḥsabat kan, d acu kan yesskanay-d udem aberkan n wayen ay tetteg Isṛayil d ssebbat ay aɣ-yeǧǧan ad nxemmem d akken timwekkelt tezmer ad terẓem aḥtac s uqader n Uẓayer (n Ṛuma ay d-yesbedden Ccṛeɛ n Uɛaqeb agraɣlan) ».
Ccɣel n ussukku n tiṭ ɣef temsalt n Falesṭin ay yettunefken i temwekkelt-a yebda-d war ma yesɛa assaɣ ɣer wadaf n Falesṭin ɣer Ccṛeɛ n uɛaqeb agraɣlan, imi timwekkelt-a tettwawekkel akken ad tcaṛeɛ wid ay yettekkan deg tejrimin timeqranin akk mgal lqanun agraɣlan.
