Asebter amenzawi
Tamsalt n Algerie Telecom: ccṛeɛ yettwawexxer ɣer 9 Yulyu
LEZZAYER TAMANEƔT – Ccṛeɛ n deffir n truẓi n uselway-anemhal amatu n Algerie Telecom, Mohamed Boukhari d urgaz n yiweẓla adzayri-aluxembourgi Chani Mejdoub, yettwawexxer ɣer wass n lexmis 9 Yulyu deg Uxxam n ccṛeɛ n truẓi n Lezzayer Tamaneɣt. I usmekti, tin-a n yimetthumen ttwacaṛɛen ɣef tjuɛal.
Snat n tkebbaniyin ticinwatin n temsawla tazirazt, ZTE d Huawei (ɣabent seg ccṛeɛ) ay yettwacaṛɛen daɣ deg temsalt-a yerna ad yettwaɛawed ccṛeɛ-nsent tikkelt-a.
Mohamed Boukhari d Chani Mejdoub yettwaḥkem fell-asen deg 2012 deg uxxam n ccṛeɛ yemmuzzgen n Sid Mḥemmed s 18 n yiseggasen n lḥebs. Deg Dujembeṛ yezrin, axxam n ccṛeɛ n truẓi n Lezzayer Tamaneɣt yessenqes-asen-d leḥkem-nsen n lḥebs ɣer 15 n yiseggasen.
Ma d snat-nni n tkebbaniyin ticinwatin, ZTE Algerie d Huawei Algerie, yettwakkes-asent uzref akken ad sɛunt leɛqudat deg Lezzayer i tallit n useggas, yerna 3 seg yikataren-nsent ay irewlen yettwaḥkem fell-asen s 10 n yiseggasen n lḥebs.
Mi rẓan ccṛeɛ-a deg uxxam n ccṛeɛ anafella, taɣdemt teɣtes ad tɛawed ad tcaṛeɛ sin-a n yimetthumen d snat-nni n tkebbaniyin ticinwatin.
Tamsalt-a tettwawexxer imi sin-nni n yimetthumen werɛad ur ten-id-wwin ara ɣer Lezzayer Tamaneɣt akken ad ɛawden ad ttwacaṛɛen.
Agensas n useqqamu n yimwekklen yenna-d d akken Mohamed Boukhari atan deg lḥebs n Ɛin Leḥǧeṛ, deg Ssɛida, ma d Mejdoub Chani wwin-t ɣer lḥebs n Lbuṛj Buɛṛiṛiǧ ass n letniyen, 3 n wusan uqbel ma iɛedda deg ccṛeɛ.
« Ur ten-id-newwi ara ɣer Lezzayer Tamaneɣt, maca ad nesseḥbiber akken ass n 9 Yulyu ad ḥedṛen ccṛeɛ », ɣef wakken ay d-yenna yimwekkel amatu i lqaḍi.
Mejdoub Chani, seg yidis, ɣer-s 44 n wussan aya seg wasmi ay iga asunded n laẓ ɣef lǧal n leḥkem ay as-ḥekmen s lḥebs (10 n yiseggasen) deg temsalt-nni n ubrid amazzal Agmuḍ-Ataram.
Ibugaṭuten n Mejdoub Chani wten-d deg wawway-nnes ass n letniyen ɣer lḥebs n Lbuṛj Buɛṛiṛiǧ, 3 n wussan uqbel ma iɛedda deg ccṛeɛ deg Lezzayer Tamaneɣt.
« Awway n umectari-inu (Mejdoub Chani) seg lḥebs n Lḥeṛṛac ɣer win n Lbuṛj Buɛṛiṛiǧ 3 kan n wussan uqbel ccṛeɛ-nnes deg Lezzayer d ayen yeffɣen i ṣṣwab yerna ur yettwaqbal ara akk », ɣef wakken ay d-yenna Ukerwa Belarif.
« Ẓriɣ amectari-inu tikkelt taneggarut uqbel ma wwin-t ɣer Lbuṛj Buɛṛiṛiǧ. Ufiɣ-t-in yefcel yerna rran-as asiṛum », ay d-yenna ubugaṭu-nni i tɣemsa.
« Ur ẓriɣ ara amek ay yella imir-a, maca yessefra ad yeḥbes asunded-nnes n laẓ lexmis-a imi ara iɛeddi deg ccṛeɛ », ɣef wakken ay d-iwekked.
Sin-a n yimetthumen ttwacaṛɛen deg 2012 ɣef « ussired n yidrimen d tjuɛal » ay d-yellan gar 2003 d 2006 deg Algerie Telecom. Tixeṣṣarin-a qqnent ɣer leɛqudat ay yettunefken deg unrar n temsawla d Internet, ɣef wakken ay d-yenna uṛabul n uwexxer n ccṛeɛ.
Tamsalt-a tettwakcef-d mi tettunefk lewṣaya n uḥtac i Luxembourg, deg ukatar n uḥtac deg temsalt-nni n ubrid amazzal Agmuḍ-Ataram, dɣa d aḥtac-nni ay d-ikecfen tijuɛal ay fkant tkebbaniyin ticinwatin i sin-a n yimetthumen akken ad tent-id-ṣaḥen leɛqudat.
Axxam n ccṛeɛ yemmuzzgen (yetxeṣṣeṣen) deg Lezzayer Tamaneɣt yebda-d imir-nni kan aḥtac deg temsalt-a.
