Asebter amenzawi
Iɣlanen Yeddukklen: tiɣri i usseɛjel n tukksa n listiɛmaṛ seg Uneẓruf Utrim
NEW YORK (Iɣlanen Yeddukklen) – Timura yettekkan deg useqqamu ay d-yelhan s tukksa n ussehres (listiɛmaṛ) deg Yiɣlanen Yeddukklen gren-d tiɣri i usseɛjel n tukksa n ussehres seg Uneẓruf Utrim s ussuddes, war leɛḍil, n tsefrant n ugguccelman akken ad yezmer uɣref aṣeḥrawi ad tt-id-yefru s tlelli ɣef uzekka-nnes.
Deg tɣimit ay d-yellan i ussekyed n temsalt taṣeḥrawit deg uxxam n Yiɣlanen Yeddukklen gar 15 d 25 Yunyu, timura ay yettekkan d tmura timanayin n useqqamu-a n Yiɣlanen Yeddukklen, grent-d tiɣri i Meṛṛuk « akken ad teg lwaǧeb-nnes agraɣlan s uqader n uzref ur yettwankaṛen n Yiṣeḥrawiyen akken ad tt-id-frun ɣef uzekka-nsen s ussefɛel n Uɣawas n ferru n 1991 ay yesɛedda Useqqamu n tɣellist n Yiɣlanen Yeddukklen s unemzal ».
S waya, igensasen n Venezuela, Ecuador, Kuba, Nicaragua, Bulivya, Lezzayer, Tafriqt n Unẓul d Sierra Leone ḥettetent-d d akken Iɣlanen Yeddukklen sɛan tamasit deg wayen yerzan ferru n taluft n Uneẓruf Utrim.
Imi tamsalt n Uneẓruf Utrim teqqel ɣer tukksa n ussehres, « d Iɣlanen Yeddukklen ay yessefken ad sfeɛlen, s umɛawen d Tdukli Tafriqit, tineɣtusin iwatan n Ugraw Amatu d Useqqamu n Tɣellist ay yesteɛṛfen s uzref ur yettwankaṛen n uɣref aṣeḥrawi i ugguccelman d uzarug », ɣef wakken ay d-nnan yigensasen n tmura ay d-yettwabedren sufella-a.
Igensasen ay d-yessawlen deg temlilit-a nnan-d daɣ d akken tecɣeb-iten temsalt n urkaḍ n yizerfan n umdan deg wakalen yettwaḍḍfen n Uneẓruf Utrim d uɣellet yeffɣen i lqanun n teɣbula tigamanin n tmurt-a.
Deg temsalt-a daɣ, aseqqamu iḥettet-d d akken d Iɣlanen Yeddukklen ay yessefken ad d-ḥettmen ɣef Meṛṛuk ad tqader lqanun agraɣlan d urkawal agraɣlan n yizerfan n umdan.
Aseqqamu n tukksa n ussehres yessefk ad yessefɛel s tidet lewṣaya-nnes deg wayen yerzan Aneẓruf Utrim s ussefɛel n tneɣtust 1514 ay yerzan tukci n uzarug i tmura d yiɣerfan yettwashersen (yettwasteɛmṛen).
Wid ay yettekkan deg tɣimit-a gren-d daɣ tiɣri akken ad d-gren deg leḥsab issumar n ugensas n Terni n Polisario deg Yiɣlanen Yeddukklen, Ahmed Boukhari, d issumar ay d-yebder deg usarag amnaḍan ɣef tukksa n ussehres ay d-yellan deg Mayu n 2015. I lmend n waya, imttekkiyen deg tɣimit-a gren-d tiɣri i useqqamu-nsen akken ad d-yeg tiɣimit niḍen ɣef wawal ɣef Uneẓruf Utrim am wakken ara gen tuzzya akken ad rzun ɣef wakalen yettwaḍḍfen.
Wid ay d-yessawlen deg tɣimit-a cekṛen-d aɛewwel n Tdukli Tafriqit deg wayen yerzan tukksa n ussehres seg Uneẓruf Utrim yellan d tahrest taneggarut deg Tefriqt, am wakken ay d-cekṛen daɣ imenɣi uzrif n uɣref aṣeḥrawin akken ad tt-id-yefru ɣef uzekka-nnes.
Idisan ay d-yessawlen deg temlilit-a nnan-d d akken bedden ɣer leṛyuy ay d-yefrurin seg Tdukli Tafriqit, yerna ṛṛay aneggaru d win n 15 Yunyu 2015, d win ay yeqqlen d taneɣtust ay d-yegren tiɣri i Ugraw amatu n Yiɣlanen Yeddukklen akken ad d-yessefru ass deg ara d-tili tsefrant i ugguccelman n Uneẓruf Utrim.
Aselway n useqqamu uzzig, anmahal ikwaduṛi, Xavier Lasso Mendoza, iɛawed iwekked-d, deg tgara, aɛewwel n useqqamu-a akken ad d-yelhu s temsalt n Uneẓruf Utrim.
Adiplumati-a yenna-d d akken aseqqamu la yessefray ad yemciweṛ d Tseqqamut n temsalt tisertiyin tuzzigin d tukksa n ussehres n Ugraw amatu n Yiɣlanen Yeddukklen akken ad d-tili terzi ɣef wakalen iṣeḥrawiyen.
