Asebter amenzawi
Tanṭagt n Susa: ɛeqlen 17 seg 38-nni ay yemmuten (leḥsab amaynut)
TUNES – Ttwaɛeqlen 17 n yimdanen seg 38-nni ay yemmuten deg tenṭagt n wass n laṛebɛa deg teftist deg Tunes, yerna llan gar-asen ladɣa Yibriṭaniyen, Ibiljikiyen d Walmaniyen, ɣef wakken ay d-nnan yiduba, war ma fkan-d acḥal n yimdanen ay yemmuten seg yal tamurt.
«Ttwaɛeqlen 17 n yimdanen ay yemmuten deg tenṭagt-nni tarebrabt », ay d-yenna uɣlif n tdawsa deg yiwen n ulɣu, am wakken ay d-yenna d akken imdanen-a seg Briṭanya Tameqrant, Lalman, Irland, Biljik d Puṛtugal.
Yiwen n yimḍebber n uɣlif yenna-d d akken 12 n tfekkiwin ay yettwaɛeqlen: 9 n Yibriṭaniyen, yiwet n Tbiljikit, yiwen n Walmani d yiwet n Tirlandit.
Seg yidis niḍen, 23 seg 39-nni n yimejraḥ ay yeffɣen seg usbiṭar, ɣef leḥsab n ulɣu n uɣlif.
Iduba ɛeyynen-d d akken aɛqal n wid yemmuten d ayen ay izemren ad yeḍḍef akud, imi aṭas seg wid yemmuten ay yellan lsan kan iceḍḍiḍen n uɛumu mi d-tella tenṭagt-nni, yerna ur llin ara sɛan lekwaɣeḍ ɣer-sen.
38 n meden ay yettwenɣen, ɣef leḥsab n yiduba, mi iqerres fell-asen yiwen n unelmad atunsi ay yerran iman-nnes d aḥewwas. Tanṭagt-a tella-d deg usensu n Riu Imperial Marhaba deg usagen n Kantaoui, sdat Susa, 140 n yikilumitren ɣef Tunes. Anelmad ay igan taxeṣṣart-a ula d netta yettwenɣ.
