ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵍⴻⵎⵄⴰⵡⵏⴰ ⵏ ⵢⵉⵣⵔⵓⵣⴰⵖ ⵉⵚⴻⵃⵔⴰⵡⵉⵢⴻⵏ: ⴰⵜⵜⴻⴽⴽⵉ ⵏ ⵍⴻⵣⵣⴰⵢⴻⵔ « ⵓⵔ ⵢⴻⵣⵎⵉⵔ ⴰⴷ ⵢⴻⵜⵜⵡⴰⵇⴻⵢⵢⴻⵎ ⵡⴰⵣⴰⵍ-ⵏⵏⴻⵙ » (ⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ

ⵍⴻⵣⵣⴰⵢⴻⵔ – ⴰⵜⵜⴻⴽⴽⵉ ⵏ ⵍⴻⵣⵣⴰⵢⴻⵔ ⴷⴻⴳ ⵓⵄⴰⵡⴻⵏ ⵏ ⵢⵉⵣⵔⵓⵣⴰⵖ ⵉⵚⴻⵃⵔⴰⵡⵉⵢⴻⵏ « ⵓⵔ ⵢⴻⵣⵎⵉⵔ ⴰⴷ ⵢⴻⵜⵜⵡⴰⵇⴻⵢⵢⴻⵎ ⵡⴰⵣⴰⵍ-ⵏⵏⴻⵙ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⴳⴻⵏⵙⴰⵙ ⵏ ⵓⵙⴻⵇⵇⴰⵎⵓ ⵓⵏⵏⵉⴳ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵢⵉⵣⵔⵓⵣⴰⵖ (ⵀⵛⵔ) ⴷⴻⴳ ⵍⴻⵣⵣⴰⵢⴻⵔ, ⵀⴰⵎⴷⵉ ⴱⵓⴽⵀⴰⵔⵉ.

« ⵏⴻⴽⴽⵏⵉ ⴷ ⵉⵏⴰⴳⴰⵏ ⵖⴻⴼ ⵓⵜⵜⴻⴽⴽⵉ-ⴰ ⵎⴻⵖⵖⵔⴻⵏ ⴰⵟⴰⵙ ⴰⵢ ⴷ-ⵜⴻⵜⵜⴰⴽⴼ ⵍⴻⵣⵣⴰⵢⴻⵔ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵜⴰⵍⵍⴰⵍⵜ ⵜⴰⵍⵙⴰⵏⵜ ⵉ ⵢⵉⵎⴷⴰⵏⴻⵏ-ⴰ. ⴰⵢⴰ ⵢⴻⵙⵙⴽⴰⵏⴰⵢ-ⴷ ⴰⵄⴻⵡⵡⴻⵍ ⵏ ⵍⴻⵣⵣⴰⵢⴻⵔ ⴰⴽⴽⴻⵏ ⴰⴷ ⵜⵄⴰⵡⴻⵏ ⵉⵣⵔⵓⵣⴰⵖ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴱⵓⴽⵀⴰⵔⵉ ⵉ ⵜⵏⴻⴳⴳⴰ ⵏ ⵢⵉⵙⴰⵍⴰⵏ ⵏ ⵍⴻⵣⵣⴰⵢⴻⵔ.

ⵎⴰⵙⵙ ⴱⵓⴽⵀⴰⵔⵉ ⵢⴻⵙⵎⴻⴽⵜⵉ-ⴷ ⴷ ⴰⴽⴽⴻⵏ ⵍⴻⵣⵣⴰⵢⴻⵔ ⴷ ⵜⴰⵎⵓⵔⵜ ⴷⴻⴳ ⴷⴷⵔⴻⵏ ⵢⵉⵣⵔⵓⵣⴰⵖ ⵉⵚⴻⵃⵔⴰⵡⵉⵢⴻⵏ ⵓⴳⴰⵔ ⵏ 40 ⵏ ⵢⵉⵙⴻⴳⴳⴰⵙⴻⵏ ⴰⵢⴰ, ⵢⴻⵔⵏⴰ ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⵜⵜⴻⴽⴽⵉ ⵏ ⵍⴻⵣⵣⴰⵢⴻⵔ ⴷⴻⴳ ⵜⴻⵎⵙⴰⵍⵜ-ⴰ ⴷ ⴰⵢⴻⵏ ⴰⵢ ⴷ-ⵢⴻⵙⵙⴽⴰⵏⴰⵢⴻⵏ « ⵜⴰⵎⵙⴻⵜⵍⴻⵍⵜ ⵜⵓⵔⵎⵉⴷⵜ » ⵖⴻⵔ ⵢⵉⴷⵉⵙ ⵏ ⵢⵉⵣⵔⵓⵣⴰⵖ ⵉⵚⴻⵃⵔⴰⵡⵉⵢⴻⵏ ⵢⴻⵔⵏⴰ « ⵢⵉⵡⴻⵏ ⵓⵔ ⵢⴻⵣⵎⵉⵔ ⴰⴷ ⵜⵜ-ⵢⴻⵏⴽⴻⵕ ».

« ⵎⴰⵣⴰⵍ-ⴰⵖ ⵏⴻⵜⵜⴰⵔⵔⴰ ⵜⴰⵊⵎⵉⵍⵜ ⴷ ⵜⴰⵎⴻⵇⵔⴰⵏⵜ ⵉ ⵓⵏⴰⴱⴰⴹ ⴷ ⵓⵖⵔⴻⴼ ⵉⴷⵣⴰⵢⵔⵉⵢⴻⵏ ⵖⴻⴼ ⵓⴱⴷⴰⴷ-ⵏⵙⴻⵏ ⴷ ⵜⴻⵎⵙⴻⵜⵍⴻⵍⵜ-ⵏⵙⴻⵏ ⵖⴻⵔ ⵢⵉⴷⵉⵙ ⵏ ⵢⵉⵣⵔⵓⵣⴰⵖ, ⵍⴰⴷⵖⴰ ⵉⵣⵔⵓⵣⴰⵖ ⵉⵚⴻⵃⵔⴰⵡⵉⵢⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ. ⵙⴻⴳ ⵢⵉⴷⵉⵙ ⵏⵉⴹⴻⵏ, ⴰⴳⴻⵏⵙⴰⵙ ⵏ ⵓⵙⴻⵇⵇⴰⵎⵓ ⵓⵏⵏⵉⴳ ⵏ ⵢⵉⵣⵔⵓⵣⴰⵖ ⵢⴻⵏⵏⴰ-ⴷ ⴷ ⴰⴽⴽⴻⵏ ⴰⵙⴻⵏⴷⵓⵇ ⵏ ⵜⵓⵄⵊⵉⵍⵉⵏ ⵏ ⵜⵍⵓⴼⴰ ⵜⴰⵍⵙⴰⵏⵉⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⴷ ⵢⴻⵜⵜⵡⴰⵙⵙⴻⵇⴷⴻⵛ ⵉ ⵓⵄⴰⵡⴻⵏ ⵏ ⵢⵉⵣⵔⵓⵣⴰⵖ ⵉⵚⴻⵃⵔⴰⵡⵉⵢⴻⵏ ⵢⴻⵍⵍⵓⵥⴻⵏ.

« ⴰⵀⵉⵍ ⴰⵎⴰⴹⵍⴰⵏ ⵏ ⵜⵓⵞⵞⵉⵜ ⴰⴷ ⵢⴻⵙⵙⵓⵜⴻⵔ, ⵙ ⵍⴻⵎⵄⴰⵡⵏⴰ ⵏ ⵓⵙⴻⵇⵇⴰⵎⵓ ⵓⵏⵏⵉⴳ ⵏ ⵢⵉⵣⵔⵓⵣⴰⵖ, ⵙⴻⴳ ⵓⵙⴻⵏⴷⵓⵇ ⵏ ⵜⵓⵄⵊⵉⵍⵉⵏ ⵏ ⵜⵍⵓⴼⴰ ⵜⴰⵍⵙⴰⵏⵉⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴰⴽⴽⴻⵏ ⴰⴷ ⴷ-ⴼⴽⴻⵏ ⵉⴷⵔⵉⵎⴻⵏ ⵉ ⵍⴻⵎⵄⴰⵡⵏⴰ ⵏ ⵢⵉⵣⵔⵓⵣⴰⵖ ⵉⵚⴻⵃⵔⴰⵡⵉⵢⴻⵏ ⵢⴻⵍⵍⵓⵥⴻⵏ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴱⵓⴽⵀⴰⵔⵉ ⴰⵢ ⵢⴻⵜⵜⵡⴰⵍⵉⵏ ⴷ ⴰⴽⴽⴻⵏ ⵜⴰⴳⵏⵉⵜ ⵏ ⵢⵉⵣⵔⵓⵣⴰⵖ « ⵍⴰ ⵜⴻⵙⵙⴰⴳⴰⴷ » ⵙⴻⴳ ⵢⵉⴷⵉⵙ ⵏ ⵜⵓⵞⵞⵉⵜ.

ⵏⵏⵉⴳ ⵡⴰⵢⴰ, ⵢⴻⵏⵏⴰ-ⴷ ⴷ ⴰⴽⴽⴻⵏ ⵜⴰⵍⵍⴰⵍⵜ ⵜⴰⵍⵙⴰⵏⵜ ⴰⵢ ⵃⵡⴰⴵⴻⵏ, ⵎⴻⵏⵖⵉⵔ ⵜⵓⵞⵞⵉⵜ, ⵜⴻⵜⵜⵡⴰⵇⴻⵢⵢⴻⵎ ⵖⴻⵔ 33 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ, ⵢⴻⵔⵏⴰ ⴰⵍⴰ 10 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵓⵍⴰⵕⴻⵏ ⴰⵢ ⴷ-ⵉⵡⴻⵊⴷⴻⵏ ⵉ ⵓⵙⴻⴳⴳⴰⵙ ⵏ 2015.

ⴰⴳⴻⵏⵙⴰⵙ ⵏ ⵓⵙⴻⵇⵇⴰⵎⵓ ⵓⵏⵏⵉⴳ ⵏ ⵢⵉⵣⵔⵓⵣⴰⵖ ⵢⴻⵏⵏⴰ-ⴷ, ⴷⴻⴳ ⵜⴻⵎⵙⴰⵍⵜ-ⴰ, ⴷ ⴰⴽⴽⴻⵏ ⵜⵉⵏⴻⴳⴳⵉⵡⵉⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ « ⴰⴷ ⵔⵏⵓⵏⵜ ⵍⵎⴻⵊⵀⵓⴷ-ⵏⵙⴻⵏⵜ ⵙ ⵙⵏⴰⵜ ⵏ ⵜⵉⴽⴽⴰⵍ » ⴰⴽⴽⴻⵏ ⴰⴷ ⴷ-ⴰⴼⴻⵏⵜ ⵉⴷⵔⵉⵎⴻⵏ ⴰⵢ ⵢⴻⵙⵙⴻⴼⴽⴻⵏ ⵉ ⵓⴹⵎⴰⵏ ⵏ ⵜⵓⵞⵞⵉⵜ ⵉ ⵢⵉⵣⵔⵓⵣⴰⵖ ⵉⵚⴻⵃⵔⴰⵡⵉⵢⴻⵏ.

ⴷⴻⴳ ⵡⴰⵙⵙ ⴰⵎⴰⴹⵍⴰⵏ ⵏ ⵢⵉⵣⵔⵓⵣⴰⵖ ⴰⵢ ⵢⴻⵜⵜⵡⴰⵙⴼⵓⴳⵍⴻⵏ ⴷⴻⴳ 20 ⵢⵓⵏⵢⵓ, ⵎⴰⵙⵙ ⴱⵓⴽⵀⴰⵔⵉ ⵢⴻⵏⵏⴰ-ⴷ ⴷ ⴰⴽⴽⴻⵏ ⵜⴰⴳⵏⵉⵜ ⵏ ⵢⵉⵣⵔⵓⵣⴰⵖ ⵉⵚⴻⵃⵔⴰⵡⵉⵢⴻⵏ « ⵙⵉⵎⴰⵍ ⵍⴰ ⵜⴻⵜⵜⴻⵇⵇⴰⵍ ⵓⵔ ⵜⴻⵜⵜⵡⴰⵃⵎⴰⵍ ⴰⵔⴰ », ⴰⵎ ⵡⴰⴽⴽⴻⵏ ⴰⵢ ⴷ-ⵉⴳⴻⵔ ⵜⵉⵖⵔⵉ ⵉ ⵓⵎⵖⵉⵡⴰⵏ ⴰⴳⵔⴰⵖⵍⴰⵏ ⴰⴽⴽⴻⵏ « ⴰⴷ ⵉⴽⴻⵎⵎⴻⵍ ⴰⴷ ⵢⴻⴱⴷⴻⴷ ⵉ ⵡⴰⵢⴻⵏ ⴰⵢ ⵃⵡⴰⴵⴻⵏ ⵢⵉⵣⵔⵓⵣⴰⵖ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ.