Asebter amenzawi
Lemɛawna n yizruzaɣ iṣeḥrawiyen: attekki n Lezzayer « ur yezmir ad yettwaqeyyem wazal-nnes » (Iɣlanen Yeddukklen
LEZZAYER – Attekki n Lezzayer deg uɛawen n yizruzaɣ iṣeḥrawiyen « ur yezmir ad yettwaqeyyem wazal-nnes », ɣef wakken ay d-yenna ugensas n Useqqamu Unnig n Yiɣlanen Yeddukklen i Yizruzaɣ (HCR) deg Lezzayer, Hamdi Bukhari.
« Nekkni d inagan ɣef uttekki-a meɣɣren aṭas ay d-tettakf Lezzayer deg wayen yerzan tallalt talsant i yimdanen-a. Aya yesskanay-d aɛewwel n Lezzayer akken ad tɛawen izruzaɣ », ɣef wakken ay d-yenna Mass Bukhari i Tnegga n Yisalan n Lezzayer.
Mass Bukhari yesmekti-d d akken Lezzayer d tamurt deg ddren yizruzaɣ iṣeḥrawiyen ugar n 40 n yiseggasen aya, yerna yenna-d d akken attekki n Lezzayer deg temsalt-a d ayen ay d-yesskanayen « tamsetlelt turmidt » ɣer yidis n yizruzaɣ iṣeḥrawiyen yerna « yiwen ur yezmir ad tt-yenkeṛ ».
« Mazal-aɣ nettarra tajmilt d tameqrant i unabaḍ d uɣref idzayriyen ɣef ubdad-nsen d temsetlelt-nsen ɣer yidis n yizruzaɣ, ladɣa izruzaɣ iṣeḥrawiyen », ɣef wakken ay d-yenna. Seg yidis niḍen, agensas n Useqqamu Unnig n Yizruzaɣ yenna-d d akken Asenduq n tuɛjilin n tlufa talsanin n Yiɣlanen Yeddukklen ad yettwasseqdec i uɛawen n yizruzaɣ iṣeḥrawiyen yelluẓen.
« Ahil amaḍlan n tuččit ad yessuter, s lemɛawna n Useqqamu Unnig n Yizruzaɣ, seg Usenduq n tuɛjilin n tlufa talsanin n Yiɣlanen Yeddukklen akken ad d-fken idrimen i lemɛawna n yizruzaɣ iṣeḥrawiyen yelluẓen », ɣef wakken ay d-yenna Mass Bukhari ay yettwalin d akken tagnit n yizruzaɣ « la tessagad » seg yidis n tuččit.
Nnig waya, yenna-d d akken tallalt talsant ay ḥwaǧen, menɣir tuččit, tettwaqeyyem ɣer 33 n yimelyunen n yidulaṛen, yerna ala 10 n yimelyunen n yidulaṛen ay d-iwejden i useggas n 2015.
Agensas n Useqqamu Unnig n Yizruzaɣ yenna-d, deg temsalt-a, d akken tineggiwin n Yiɣlanen Yeddukklen « ad rnunt lmejhud-nsent s snat n tikkal » akken ad d-afent idrimen ay yessefken i uḍman n tuččit i yizruzaɣ iṣeḥrawiyen.
Deg wass amaḍlan n yizruzaɣ ay yettwasfuglen deg 20 Yunyu, Mass Bukhari yenna-d d akken tagnit n yizruzaɣ iṣeḥrawiyen « simal la tetteqqal ur tettwaḥmal ara », am wakken ay d-iger tiɣri i umɣiwan agraɣlan akken « ad ikemmel ad yebded i wayen ay ḥwaǧen yizruzaɣ », ɣef wakken ay d-yenna.
