Asebter amenzawi
Arraz ameqran n tkurt tamafagt n tlawin: Lezzayer terna Ustṛalya s 3 ɣer 0
TALDYKORGAN (Kazaxstan) – Taɣlamt tadzayrit n tkurt tamafagt n tlawin terna ass n lḥedd tamtilt-nnes tustṛalit s ugmuḍ n 3 n yiḥricen ɣer 0 (25-19, 25-22, 25-13) deg Taldykorgan, deg yiwet n temlilit deg wass wis 3 yerna d aneggaru deg tuzzya n uɛeddi n Warraz Ameqran.
Deg snat n temliliyin timezwura uqbel ta, Tidzayriyin xeṣrent sdat Kazaxstan d Kuba s 3 ɣer 0.
Asleɣmay n teɣlamt tadzayrit François Salvagni yumar (yefṛeḥ) s rrbeḥ-a, yerna yenna-d deg yiwen n usarag n tɣemsa: « Aql-aɣ numar aṭas yerna bɣiɣ ad snemmreɣ timaririn-inu acku timlilit-nni tella-d tewɛeṛ aṭas. Nurar timlilit yelhan yerna yewɛeṛ fell-aneɣ ad netturar dima mliḥ. Yessefk daɣ ad nhenni Ustṛalya imi ay terbeḥ aḥric-nnes wis sin ».
Seg yidis-nnes, taqebṭant n teɣlamt tadzayrit, Fatima-Zohra Oukazi, teckeṛ-d rrbeph-a ay d-yusan deffir snat n lexṣarat.
« Nurar yiwet n temlilit yelhan yerna ttwaliɣ d akken rrbeḥ-a nuklal-it. La nɛerreḍ ad nesselhu aswir-nneɣ yal tikkelt deg ara nurar. Lmufid netta aql-aɣ newjed akken ad nurar deg telɣuɣa ay d-yetteddun ara d-yilin deg Lezzayer Tamaneɣt », ɣef wakken ay d-tenna.
Deg temlilit-a, Redouani Amina tufrar-d imi d nettat ay yessadfen aṭas akk n tenqiḍin (12), deg wakud deg Tustṛalit Sophie Godfrey tessadef 9 n tenqiḍin, ma d Safia Boukhina tessadef 8.
Deg usettef, Kuba d Kazaxstan ay d timezwura deg tegrawt n N s 6 n tenqiḍin i yiwet, maca werɛad ur urarent ara yiwet n temlilit, ma d Lezzayer terbeḥt-d 3 n tenqiḍin deg wakud deg Ustṛalya d nettat ay d taneggarut s 0 n tenqḍin.
Taɣlamt n Lezzayer ay yettwasettfen d tis snat deg telɣuɣa n Tefriqt, ad d-teqqel dindin ɣer tmurt akken ad turar d teɣlamin n tegrawt Q n Warraz Ameqran gar 3 d 5 Yulyu deg Ccraga (Lezzayer Tamaneɣt).
