Asebter amenzawi
Polisario tger-d tiɣri i tkebbaniyin yellan deg Uneẓruf Utrim akken ad qadren ṛṛay-nnes
BERNE – ɣef leḥsab n yiwen n ulɣu n uɣlif aṣeḥrawi n usselɣu ay d-yuwḍen ass n lḥedd ɣer Tnegga n Yisalan n Lezzayer, Mohamed Khaddad, asemyuddas aṣeḥrawi ay ixeddmen d MINURSO yenna-d d akken ad d-tebdu yiwet n tḥemla n usselɣu ara d-iḥazen tikebbaniyin ay ixeddmen deg Uneẓruf Utrim akken ad qadrent lqanun alsan, yerna ad ḥebsent aɣellet n teɣbula tigamanin war ma teqbel-asent terni n Polisario yellan d tagensast tawḥidt n uɣref aṣeḥrawi.
Tirni n Polisario ad d-tebdu taḥemla-a akken ad asent-d-ssefhem i tkebbaniyin-a d akken ma gant aya, atenti ffɣent i lqanun yerna yessefk ad xedment ala d Terni n Polisario d Tegduda taɛṛabt taṣeḥrawit tamegdayt deg wayen yerzan aɣellet n teɣbula n Uneẓruf Utrim, ɣef wakken ay d-yenna Mass Khaddad deg yiwet n tseɣrut.
Dɣa deg temsalt-a, tikebbaniyin ay la ixeddmen deg Uneẓruf Utrim yessefk ad xedment d tedbelt taṣeḥrawit, acku ulac lqanun agraɣlan ay yesteɛṛfen s « tedbelt n lfeɛl » ay d-tḥettem Meṛṛuk ɣef tmurt-a yerna tadbelt-a terkeḍ « s tɣara tufḍiḥt » lqanun agraɣlan imi ay d-tefka i yiman-nnes « tanaya » deg Uneẓruf Utrim.
Takti n tḥemla-a n usselɣu tella-d sdeffir ma yestenya Polisario, ass n 23 Yunyu 2015, deg Berne, deg Sswis, n « Yimyawayen n Geneve n 1949 » d Upruṭukul I n taluft yellan gar-as d Meṛṛuk, d apruṭukul ay yefkan azref i Polisario akken ad tili « d adabu ay d-yettgensisen aɣref n Uneẓruf Utrim yerna yettnaɣ i uzref-nnes akken ad yeḥkem iman-nnes i yiman-nnes » (Amagrad 96.3 n Upruṭukul yernan ɣer Yimtawayen n Geneve n 1949).
Taseɣrut ay yettwastenyan deg Berne d tin ay yeqbel daɣ Useqqamu afidiṛali aswisi, yerna akken kan ay tettwastenya, tettwazen i wakk timura niḍen ay tt-yestenyan akken ad yebdu ussefɛel-nnes.
Dɣa deg temsalt-a, Tirni n Polisario twekked-d d akken tɛuhed ad tessefɛel imtawayen n Geneve yerna tenna-d d akken « tɛewwel akken ad tesseqdec akk udmawen n lqanun agraɣlan akken ad tessiweḍ ɣer yiswi-nnes, tasefrant n ugguccelman, yerna ad temcaṛeɛ ɣef wakk timsal ay twala watant », ɣef wakken ay d-tenna teftart-nni.
Seg yidis niḍen, Tirni n Polisario tenna-d d akken Meṛṛuk tettwaḥseb d tamurt « yeḍḍfen » akal ur yellin ara nnes ɣef leḥsab n Yimtawayen n Geneve, am wakken ay d-tesmekti d akken Ccṛeɛ agraɣlan iḥettet-d d akken Meṛṛuk « ur tesɛi ara azref akken ad d-tessuter tanaya » ɣef Uneẓruf Utrim.
