Asebter amenzawi

Iɣlanen Yeddukklen bɣan ad d-lhun s temsalt n wid yenḍerren deg Yaman, ma d imenɣi la yettkemmil

LEZZAYER TAMANEɣT – Iɣlanen Yeddukklen bɣan ad d-lhun s tegnit taweɛṛant deg llan yimdanen yenḍerren seg ṭṭrad, ula ma llan wuguren n tɣellist (laman) d imeqranen deg unrar, yerna mazal la yettkemmil yimenɣi ass n lḥedd deg tmurt-a, ladɣa deg temnaḍt n tlisa akked Tgelda Tasaɛudit.

Tagnit n yimdanen yenḍerren seg ṭṭrad deg Yaman simal la tettzad, ula ma Iɣlanen Yeddukklen la ttkemmilen lmeǧhud-nsen akken ad ɛawnen idisan yemxaṣamen akken ad d-afen tifrat tasertit i taluft ay iḥuzan tamurt-a.

Tanarit n Yiɣlanen Yeddukklen i ussemyuddes n tɣawsiwin talsanin (OCHA) tenna-d dakken la tettxemmim ad d-tḥaz ugar n yidrimen i uqabel n tuɛjilin d uɛawen n yimelyunen n yiɣarimen iyamaniyen ay yettwaḍḍfen d imeṛhan deg yimenɣi.

Seg yidis-nnes, anmazul n umaru amatu n tɣawsiwin talsanin, asemyaddas n tuɛjilin, Stephen O’Brien, yenna-d dakken Asenduq alemmas n Yiɣlanen Yeddukklen i tgermanin tuɛjilin ad yernu ad d-iḥaz 25 n yimelyunen n yidulaṛen.

Idrimen-a ad ttwasqedcen i ussukkes n yimdanen yenḍerren deg tmurt-a, d ufraq n wučči, aserɣu, isafaren, ttawil n tuɛjilin, aman n tissit d tɣawsiwin n tezdeg i Yiyamaniyen yeḥwaǧen.

Seg yidis niḍen, Iɣlanen Yeddukklen ssutren-d ad d-yeqqel ussiweḍ n sselɛa i Yaman s yiɣerruba imsenziyen akken ur tettlaẓ ara tmurt-a. « Yessefk ad d-qqlen yiɣerruba imsenziyen » ɣer yisugan (lmerṣat) n Yaman acku tamurt-a teqqen s 90% ɣer wayen ay d-tettaǧew seg tmura tibeṛṛaniyin, ɣef wakken ay d-yenna Mass O’Brien.

Lexṣaṣ n yiserɣa d ayen ay yeswaɣen imukan n udawi, yerna, ma ulac, 160 seg yimukan-a ay iɣelqen. « Anagraw n tdawsa qrib ad yeḥbes akk », ɣef wakken ay d-yenna Mass O’Brien.

Kra n yidiplumatiyen n Yiɣlanen Yeddukklen ttehmen Tagelda Tasaɛudit s uḥettem n « tergult tawlalt » ɣef Yaman deg ukatar n tḥemla ay d-tebda seg tgara n Meɣres ɣer yidis n tmura taɛṛabin niḍen mgal yiɣewwaɣen iciɛiyen iḥutiyen d yimsisan-nsen.

Medden atni deg yir tagnit

Deg tegnit iweɛṛen am ta, 15-nni n tmura n Useqqamu n tɣellist (laman) « ḥettetent-d dakken iḥar lḥal ad tadef sselɛa ɣer tmurt-a i lmend n uɛawen n wid yenḍerren, ladɣa imi tameddurt n yimezdaɣen n Yaman teqqen ɣer waǧaw n wučči d yiserɣa seg uzɣar ».

Aseqqamu yenna-d dakken « tecɣeb-it aṭas temsalt n yir tagnit deg llan medden deg Yaman, yerna yezmer lḥal ad ten-iḥaz ula d laẓ », yerna iga ifadden i yidisan ara d-iṣeddqen akken ad d-ṣeddqen war cceḥḥa.

Timura n Useqqamu ɛawdent grent-d tiɣri i uḥbas n yimenɣi i lmend n uɛawen n wid yenḍerren yerna ssutren i yidisan yemxaṣamen deg Yamen ad qqlen « war ccerḍ yerna s nneyya zeddigen » ɣer lemcawṛat n talwit, ladɣa imi ay xeṣrent lemcawṛat-nni n Geneve ay d-yellan ddaw leɛnaya n Yiɣlanen Yeddukklen.

Yerna yimenɣi ɣef tlisa gar Yaman d Tgelda Tasaɛudit

Yettwenɣ yiwen n uɛessas n tlisa asaɛudi yerna yejreḥ wayeḍ mi d-ttewten s tmeẓdiyin ay d-qerrsen fell-asen seg Yaman. Tiyita-a mgal yiɛessasen n tlisa tella-d ass n ssebt deg temnaḍt n Jizan deg unẓul n Tgelda Tasaɛudit.

Iduba isaɛudiyen ur d-ufin ara anwa ay ten-id-iwten, maca iɣewwaɣen iḥutiyen ay la kkaten yiɣallen isaɛudiyen 3 n wayyuren aya, wten acḥal d tikkelt iɣallen imsellḥen isaɛudiyen ɣer daxel n tmurt-nsen.

Ass n laṛebɛa yezrin, sin n yiserdasen n yiɣallen n wakal isaɛudiyen ay yettwenɣen mi d-qerrsen fell-asen s lbumbat seg wakal ayamani deg temnaḍt n Jazan. Yettwenɣ daɣ yiwen n uɛessas n tlisa asaɛudi deg tenqiḍt n uzgar n tlisa n Alab, deg temnaḍt n Assir.

Ass n letniyen, yettwenɣ daɣ yiwen n udufesyan imaṛati yettekkan deg temsisit, deg yiwen n umbaddel n yiqerrisen deg temnaḍt n Najran, ɣef tlisa gar Yaman d Tgelda Tasaɛudit.

Ma ulac, 44 n yimdanen, gar-asen ama d iserdasen, ama d iɣermanen, ay yemmuten seg tgara n Meɣres seg yiqerrisen am wi.

Seg yidis niḍen, tenker tmes ass n ssebt deg yiwet n tṣeffayt n upitṛul deg Ɛaden, deg unẓul n Yaman, mi wten yiɣewwaɣen asagen s lbumbat akken ur ttaǧǧan ara yiwen n uɣerrabu n lemɛawna ad d-iqerreb.

Tamsisit tga ass n ssebt « ma ulac, 15 n tyitiwin tigenwanin » deg yiḥricen yemgerraden n Ɛaden.

ɣef leḥsab n Yiɣlanen Yeddukklen, imenɣi deg Yaman yegla yagi s 2.800 n tmeddurin, gar-asent 1.400 n yiɣarimen, am wakken ay jerḥen 13.000 n yimdanen seg wasmi ay yenker ccwal deg Meɣres.

(Sɣur Rafik CHIBANE)