ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵍⵖⴻⵍⵍⴰ ⵏ ⵍⴽⵉⴼ ⵍⴰ ⵜⵔⴻⵏⵏⵓ ⵙ ⵡⴰⵟⴰⵙ ⵙⴻⴳ ⵓⵙⴻⴳⴳⴰⵙ ⴰⵔ ⴰⵙⴻⴳⴳⴰⵙ ⴷⴻⴳ ⵎⴻⵕⵕⵓⴽ

ⵠⵉⴻⵏⵏⴰ – ⴰⴼⴰⵔⴻⵙ ⵏ ⵍⴽⵉⴼ ⵍⴰ ⵉⵔⴻⵏⵏⵓ ⵙ ⵡⴰⵟⴰⵙ ⵙⴻⴳ ⵓⵙⴻⴳⴳⴰⵙ ⴰⵔ ⴰⵙⴻⴳⴳⴰⵙ ⴷⴻⴳ ⵎⴻⵕⵕⵓⴽ, ⴰⵢ ⵢⴻⵇⵇⵍⴻⵏ ⴷ ⵏⴻⵜⵜⴰⵜ ⴰⵢ ⴷ ⵜⴰⵎⵓⵔⵜ ⵜⴰⵎⴻⵣⵡⴰⵔⵓⵜ ⴰⵢ ⴷ-ⵉⵅⴻⴷⴷⵎⴻⵏ ⴰⵔⴻⴽⵜⵉ ⵏ ⵍⴽⵉⴼ ⴷⴻⴳ ⵓⵎⴰⴹⴰⵍ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵕⴰⴱⵓⵍ ⴰⵙⴻⴳⵙⴰⵏ ⵏ ⵜⵏⴰⵔⵉⵜ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵖⴻⴼ ⵜⴻⵀⵢⵓⴼⵉⵏ ⴷ ⵜⴻⵊⵔⵉⵎⵜ (ⵧⵏⵓⴷⵛ) ⵉ ⵓⵙⴻⴳⴳⴰⵙ ⵏ 2015. ⵜⴰⵖⴱⴰⵍⵓⵜ-ⴰ ⵜⴻⵏⵏⴰ-ⴷ ⴷ ⴰⴽⴽⴻⵏ « ⵜⵉⵎⵏⴰⴹⵉⵏ ⵜⵉⵎⴻⵇⵔⴰⵏⵉⵏ ⵏ ⵓⵙⴼⵓⵍⵍⴻⵃ ⵏ ⵍⴽⵉⴼ ⴷⴻⴳ ⵎⴻⵕⵕⵓⴽ ⵣⴳⴰⵏⵜ-ⴷ ⴷⴻⴳ ⵜⴻⵎⵏⴰⴹⵜ ⵏ ⵔⵔⵉⴼ ⵢⴻⵍⵍⴰⵏ ⴷ ⵢⵉⵡⴻⵜ ⵙⴻⴳ ⵜⴻⵎⵏⴰⴹⵉⵏ ⵜⵉⴳⴻⵍⵍⵉⵍⵉⵏ ⴰⴽⴽ ⵏ ⵜⵎⵓⵔⵜ, ⵢⴻⵔⵏⴰ ⵉⴼⴻⵍⵍⴰⵃⴻⵏ ⴰⵢ ⵢⴻⵙⴼⵓⵍⵍⵓⵃⴻⵏ ⵍⴽⵉⴼ ⵓⵔ ⵢⵓⵡⵉⴹ ⴰⵔⴰ ⵔⵔⴱⴻⵃ-ⵏⵙⴻⵏ ⵖⴻⵔ ⵜⵛⴻⵀⵕⵉⵜ ⵜⴰⵍⴻⵎⵎⴰⵙⵜ ». ⴰⵕⴰⴱⵓⵍ-ⴰ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴳⴰⵏ-ⵜ-ⵉⴷ ⵙ ⵍⴻⵃⵙⴰⴱⴰⵜ ⴰⵢ ⴷ-ⵢⴻⴼⴽⴰ ⵓⵏⴰⴱⴰⴹ ⴰⵎⴻⵕⵕⵓⴽⵉ. ⵙ ⵡⴰⵢⴰ, ⵖⴻⴼ ⵍⴻⵃⵙⴰⴱ ⵏ ⵓⵕⴰⴱⵓⵍ-ⴰ, ⵎⴻⵕⵕⵓⴽ ⵜⴻⵍⵍⴰ ⵜⴻⵙⵄⴰ ⴷⴻⴳ 2013, 47.196 ⵏ ⵢⵉⵇⴻⵟⵟⴰⵔⴻⵏ ⵏ ⵡⴰⴽⴰⵍ ⵉ ⵓⵙⴼⵓⵍⵍⴻⵃ ⵏ ⵜⴻⵀⵢⵓⴼⵜ-ⴰ, ⵢⵉⵍⵉ, ⵖⴻⴼ ⵍⴻⵃⵙⴰⴱ ⵏ ⴽⵔⴰ ⵏ ⵢⵉⵎⴰⵏⴰⵢⴻⵏ, ⴰⵎⴹⴰⵏ-ⴰ ⵢⴻⵣⵎⴻⵔ ⴰⴷ ⵢⵉⵍⵉ ⵎⴻⵖⵖⴻⵔ ⵙ ⵙⵏⴰⵜ ⵏ ⵜⵉⴽⴽⴰⵍ ⴷⴻⴳ ⵜⵉⴷⴻⵜ. Ɣⴻⴼ ⵓⵎⴻⴷⵢⴰ, ⴰⵕⴰⴱⵓⵍ-ⴰ ⵢⴻⴱⴷⴻⵔ-ⴷ ⴷ ⴰⴽⴽⴻⵏ ⵉⵎⴻⵥⵍⴰ ⵏ ⵜⵖⴻⵍⵍⵉⵙⵜ ⵏ ⵎⴻⵕⵕⵓⴽ ⴹⴹⴼⴻⵏ-ⴷ 200 ⵏ ⵢⵉⵟⵓⵏⴻⵏ ⵏ ⵜⴻⵀⵢⵓⴼⵉⵏ, ⴷⴻⴳ ⵡⴰⴽⵓⴷ ⴷⴻⴳ ⵜⴰⴷⵡⴰⵏⵜ ⵜⴰⴼⵕⴻⵏⵙⵉⵙⵜ ⵜⴻⵏⵏⴰ-ⴷ ⴷ ⴰⴽⴽⴻⵏ ⴰⵍⴰ 39 ⵏ ⵢⵉⵟⵓⵏⴻⵏ ⴰⵢ ⴷ-ⵢⴻⵜⵜⵡⴰⴹⴹⴼⴻⵏ. ⵜⵉⵍⵖⴰ-ⴰ ⵙⵙⴻⵡⵀⴰⵎⴻⵏⵜ ⵢⴻⵔⵏⴰ ⵓⵔ ⵢⴻⵣⵎⵉⵔ ⵢⵉⵡⴻⵏ ⴰⴷ ⵜⴻⵏⵜ-ⵢⴰⵎⴻⵏ, ⵉⵎⵉ ⵎⴻⵕⵕⵓⴽ ⵜⴻⵜⵜⵡⴰⵙⵙⴻⵏ ⴷ ⴰⴽⴽⴻⵏ ⵜⴻⴼⴽⴰ ⴰⴼⵓⵙ ⴷⴻⴳ ⵓⵙⴼⵓⵍⵍⴻⵃ ⵏ ⵍⴽⵉⴼ, ⵢⴻⵔⵏⴰ ⵉⵎⴹⴻⴱⴱⵔⴻⵏ ⵉⵎⴻⵇⵔⴰⵏⴻⵏ ⵏ ⵜⴻⵀⵢⵓⴼⵉⵏ ⴷⴻⴳ ⵜⵎⵓⵔⵜ-ⴰ ⴰⵜⵏⵉ ⴷⴻⴳ ⵢⵉⵙⵡⵉⵔⴻⵏ ⵓⵏⵏⵉⴳⴻⵏ ⵏ ⵓⵡⴰⵏⴰⴽ, ⵖⴻⴼ ⵡⴰⴽⴽⴻⵏ ⴰⵢ ⴷ-ⴱⴻⴷⵔⴻⵏⵜ ⴰⵟⴰⵙ ⵏ ⵜⴻⵖⴱⵓⵍⴰ, ⴳⴰⵔ-ⴰⵙⴻⵏⵜ ⵓⵍⴰ ⴷ ⵜⵉⴼⵜⴰⵔⵉⵏ ⵜⵉⵎⴰⵔⵉⴽⴰⵏⵉⵢⵉⵏ ⴰⵢ ⴷ-ⵢⴻⵜⵜⵡⴰⴽⴻⵛⴼⴻⵏ ⴷⴻⴳ ⵡⵉⴽⵉⵍⴻⴰⴽⵙ. ⵉⴷⵓⴱⴰ ⵉⵎⴻⵕⵕⵓⴽⵉⵢⴻⵏ, ⴰⴽⴽⴻⵏ ⴰⴷ ⵚⵚⵔⴻⵏ ⵉⵎⴰⵏ-ⵏⵙⴻⵏ ⵖⴻⴼ ⵜⴻⵎⵙⴰⵍⵜ ⵏ ⵢⵉⴳⵔⴰⵏ-ⴰ ⵏ ⵜⴻⵀⵢⵓⴼⵉⵏ ⴷⴻⴳ ⵜⵎⵓⵔⵜ-ⵏⵙⴻⵏ, ⵏⵏⴰⵏ-ⴷ ⴷ ⴰⴽⴽⴻⵏ ⴰⵢⴻⵏ ⴰⵢ ⵍⴰ ⵢⴻⵜⵜⴻⴳ ⵓⵏⴰⴱⴰⴹ ⴰⵎⴻⵕⵕⵓⴽⵉ ⵏⴻⵜⵜⴰ ⴷ « ⵜⴰⵏⴻⴼⵍⵉⵜ ⵜⴰⵎⵍⴻⵍⵍⴰⵢⵜ » ⵏ ⵜⴻⵎⵏⴰⴹⵉⵏ ⵜⵉⴳⴻⵍⵍⵉⵍⵉⵏ. ⴰⴼⴰⵔⴻⵙ ⵏ ⵍⴽⵉⴼ ⵍⴰ ⵢⴻⵜⵜⵏⴻⵔⵏⵉ ⵙ ⵡⴰⵟⴰⵙ ⵙⴻⴳ ⵓⵙⴻⴳⴳⴰⵙ ⴰⵔ ⴰⵙⴻⴳⴳⴰⵙ, ⵢⴻⵔⵏⴰ ⵍⴰ ⴷ-ⵢⴻⵜⵜⴱⴰⵏ ⵡⴰⵢⴰ ⵙ ⵜⴻⵙⵎⴻⴽⵜⵉⵡⵉⵏ ⵏ ⵍⴽⵉⴼ ⴰⵢ ⵍⴰ ⵢⴻⵜⵜⵡⴰⴹⴹⴰⴼⴻⵏ. ⵙ ⵡⴰⵢⴰ, ⵜⴰⴳⴻⵍⴷⴰ ⵏ ⵎⴻⵕⵕⵓⴽ ⵜⴻⵇⵇⴻⵍ ⴷ ⵜⵓⴳⴳⵣⴰ ⵏ ⵜⵉⴷⴻⵜ ⵉ ⵜⵎⵓⵔⴰ ⴰⵢ ⴷ-ⵢⴻⵣⵣⵉⵏ ⴼⴻⵍⵍ-ⴰⵙ ⴷ ⵜⵓⵕⵓⴼⵜ. ⵎⴻⵕⵕⵓⴽ ⴷ ⵏⴻⵜⵜⴰⵜ ⴰⵢ ⴷ ⵜⴰⵖⴱⴰⵍⵓⵜ ⵜⴰⵎⴻⵣⵡⴰⵔⵓⵜ ⵏ ⵍⴽⵉⴼ ⴰⵢ ⵍⴰ ⵢⴻⵜⵜⵏⵓⵣⵓⵏ ⴷⴻⴳ ⴼⵕⴰⵏⵙⴰ ⴷ ⵜⵓⵕⵓⴼⵜ, ⵖⴻⴼ ⵍⴻⵃⵙⴰⴱ ⵏ ⵢⵉⵎⴻⵥⵍⴰ ⵏ ⵜⴻⴷⵡⴰⵏⵜ ⵜⴰⴼⵕⴻⵏⵙⵉⵙⵜ. ⴱⵉⵜⵜ ⵜⴰⵎⵓⵔⵜ-ⴰ, ⵢⴻⵣⵎⴻⵔ ⵍⵃⴰⵍ ⵓⵔ ⵢⴻⵍⵍⵉ ⵛⵛⴻⴽ ⴷ ⴰⴽⴽⴻⵏ ⴷ ⵏⴻⵜⵜⴰⵜ ⴰⵢ ⴷ ⵜⴰⵖⴱⴰⵍⵓⵜ ⵜⴰⵡⵃⵉⴷⵜ ⵏ ⵍⴽⵉⴼ ⴰⵢ ⵍⴰ ⵢⴻⵜⵜⵏⵓⵣⵓⵏ ⴷⴻⴳ ⴼⵕⴰⵏⵙⴰ, ⵉⵎⵉ ⴷⴻⴳ 2014, 157,3 ⵏ ⵢⵉⵟⵓⵏⴻⵏ ⵏ ⵍⴽⵉⴼ ⴰⵢ ⵢⴻⵜⵜⵡⴰⴹⴹⴼⴻⵏ ⴷⴻⴳ ⴼⵕⴰⵏⵙⴰ, ⵢⴻⵔⵏⴰ ⵜⴰⵙⵎⴻⴽⵜⴰ-ⴰ ⵜⴻⵔⵏⴰ ⵙ 84% ⵖⴻⴼ ⵍⴻⵃⵙⴰⴱ ⵏ 2013. ⴷⴻⴳ ⵓⵕⴰⴱⵓⵍ-ⵏⵏⴻⵙ ⴰⵎⴰⴹⵍⴰⵏ ⵏ 2015 ⵖⴻⴼ ⵜⴻⵀⵢⵓⴼⵉⵏ ⴰⵢ ⴷ-ⵢⴻⴼⴼⵖⴻⵏ ⴰⵙⵙ ⵏ ⵍⵊⴻⵎⵄⴰ, ⵜⵏⴰⵔⵉⵜ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵖⴻⴼ ⵜⴻⵀⵢⵓⴼⵉⵏ ⴷ ⵜⴻⵊⵔⵉⵎⵜ ⵜⴻⵏⵏⴰ-ⴷ, ⵙⴻⴳ ⵢⵉⴷⵉⵙ ⵏⵉⴹⴻⵏ, ⴷ ⴰⴽⴽⴻⵏ ⵎⴻⵕⵕⵓⴽ ⴰⴷ ⵜⴽⴻⵎⵎⴻⵍ, ⵖⴻⵔ ⵢⵉⴷⵉⵙ ⵏ ⵜⵎⵓⵔⴰ ⵏ ⵡⴰⴷⴷⴰ ⴷ ⵙⵒⴻⵏⵢⵓⵍ, ⴰⴷ ⵜⴻⵜⵜⵓⵔⴰⵔ ⴷⴷⵓⵕ ⵏ ⵜⵎⵓⵔⵜ ⴰⵢⵙⴻⴳ ⵉⵇⴻⵍⵍⴻⵄ ⵍⴽⵉⴼ ⵖⴻⵔ ⵜⵎⵓⵔⴰ ⵏⵉⴹⴻⵏ ⵏ ⵓⵎⴰⴹⴰⵍ. « ⵜⵉⵎⵓⵔⴰ ⵏ ⵡⴰⴷⴷⴰ, ⵎⴻⵕⵕⵓⴽ ⴷ ⵙⵒⴻⵏⵢⵓⵍ ⵜⵜⵡⴰⴱⴻⴷⵔⴻⵏⵜ-ⴷ ⴷⴻⴳ ⵍⴻⵛⵖⴰⵍ ⵉⵃⴻⵔⴼⵉⵢⴻⵏ ⵏ ⵜⵓⴹⴹⴼⴰ ⵏ ⵜⴻⵀⵢⵓⴼⵉⵏ ⴷ ⴰⴽⴽⴻⵏ ⴷ ⵏⵉⵜⴻⵏⵜⵉ ⴷ ⵜⵉⵎⵓⵔⴰ ⵜⵉⴳⴻⵊⴷⴰⵏⵉⵏ ⴷⴻⴳ ⴰⵢ ⵉⵇⴻⵍⵍⴻⵄ ⵏⴻⵖ ⴰⵢⵖⴻⴼ ⵢⴻⵜⵜⵄⴻⴷⴷⵉ ⵍⴽⵉⴼ ⴷⴻⴳ ⵎⵔⴰⵡ ⵏ ⵢⵉⵙⴻⴳⴳⴰⵙⴻⵏ ⵉⵏⴻⴳⴳⵓⵔⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵜⴻⵏⵏⴰ ⵜⵏⴰⵔⵉⵜ-ⴰ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ. « ⴽⵔⴰⴹⵜ-ⴰ (3) ⵏ ⵜⵎⵓⵔⴰ ⴰⴷ ⴽⴻⵎⵎⵍⴻⵏⵜ ⴰⴷ ⵜⵜⵓⵔⴰⵔⴻⵏⵜ ⴷⴷⵓⵕ-ⴰ ⵖⴻⴼ ⵍⴻⵃⵙⴰⴱ ⵏ ⵍⴻⵃⵙⴰⴱⴰⵜ ⴰⵢ ⴷ-ⵢⴻⵍⵍⴰⵏ ⴳⴰⵔ 2010 ⴷ 2014 », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵜⵜⵡⴰⴱⴷⴻⵔ ⴷⴻⴳ ⵓⵕⴰⴱⵓⵍ-ⴰ. ⵏⵏⵉⴳ ⵡⴰⵢⴰ, « ⴰⵖⵔⴰⴱ-ⵏⵏⵉ ⵏ ⵍⵄⴰⵕ » ⴰⵢ ⵜⴻⴱⵏⴰ ⵎⴻⵕⵕⵓⴽ ⴷⴻⴳ ⵓⵏⴻⵥⵔⵓⴼ ⵓⵜⵔⵉⵎ ⴷ ⵢⵉⵡⴻⵏ ⵙⴻⴳ ⵢⵉⵎⵓⴽⴰⵏ ⵉⵎⴻⵇⵔⴰⵏⴻⵏ ⵉ ⵓⵙⵄⴻⴷⴷⵉ ⵏ ⵜⴻⵀⵢⵓⴼⵉⵏ ⵖⴻⵔ ⵜⴻⵎⵏⴰⴹⵜ ⵏ ⵜⵎⵓⵔⴰ ⵏ ⵙⵙⴰⵃⴻⵍ « ⴰⴽⴽⴻⵏ ⴰⴷ ⵜⵛⴻⵡⵡⴻⵍ (ⵜⴻⵎⵏⴰⴹⵜ-ⴰ) ⵢⴻⵔⵏⴰ ⴰⴷ ⴷ-ⵜⴱⴰⵏ ⵎⴻⵕⵕⵓⴽ ⴷ ⵜⴰⵎⵓⵔⵜ ⵉⵔⴻⴽⴷⴻⵏ ⵢⴻⵔⵏⴰ ⴷ ⵜⵓⵙⴽⵉⵔⵜ ».