Asebter amenzawi

Iserdasen isṛayiliyen ḥebsen aɣerrabu-nni n tlelli ay yellan yetteddu ɣer ɣezza

LQUDS YETTWAṬṬFEN – Tagriwa tisṛayilit teḍḍef, ass n letniyen taṣebḥit, aɣerrabu-nni ay yettekkan deg tanawt n tlelli ay la yetteddun ɣer tesfift n Ɣezza, ɣef wakken ay d-nnan tawilat n yisalan. Iserdasen n tegriwa tisṛayilit ulyen ɣer uɣerrabu n Marianne ay yellan yebɛed s wazal n 100 n yimilen ɣef yiri n lebḥeṛ n Ɣezza, yerna beddlen-as yiserdasen-nni abrid i uɣerrabu-nni akken ad t-awyen ɣer temdint n Ashdod. Iserdasen n tegriwa tisṛayulit ulyen yerna fettcen aɣerrabu-nni deg waman igraɣlanen akken ur d-yettili ara urkaḍ n tergult-nni tawlalt ay d-yettwaḥettmen ɣef tesfift n Ɣezza. Aɣerrabu-a d netta ay d amezwaru seg yiwet n tanawt umi semman « Tanawt n tlelli tis kraḍt (3) », i lmend n wawwaḍ ɣer Ɣezza d urkaḍ n tergult-nni ay d-tḥettem Isṛayil, yerna iswi n tḥemla-a netta d ajbad n lwelha ɣef tergult-nni d ussiweḍ n lemɛawna i wid yenḍerren deg Ɣezza. Imeɣnasen ay yeddan deg uɣerrabu-nni n Marianne nnan-d i terga n yisalan n Al Jazeera d akken iserdasen isṛayiliyen « gan ccɣel n yiqerṣanen yerna mmɣen-d ɣef uɣerrabu-nneɣ deg waman igraɣlanen ». Isṛayil tḥettem-d targult ɣef Ɣezza seg wasmi ay yeḍḍef umussu n Ḥamas tamnaḍt-a deg 2007. Deg 2010, iserdasen n tegriwa tisṛayilit ḥebsen yiwet n tanawt n yiɣerruba (amur ameqran deg-sen d iṭerkiyen) ay yeddan akken ad tɛawen ifalesṭiniyen deg tesfift n ɣezza, yerna iserdasen ay iẓedmen ɣef yiɣerruba-a nɣan 9 n yimdanen.