Asebter amenzawi
Assileɣ d ssrabes n uswir igerrzen i usnerni n tmerrit
LEZZAYER– Aneɣlaf n uheyyi n wakal, n tmerrit d tenḍi, Amar Ghoul, iḥettet-d ass n lḥedd deg Lezzayer, d akken yessefk ad d-yili ussileɣ d ussumer n yimeẓla (ssrabes) n uswir unnig i lmend n tneflit n tmerrit d tdamsa yexḍan iserɣa.
Deg yiwet n tfuga ay d-yellan i lmend n wass aɣelnaw n tmerrit (25 Yunyu), aneɣlaf yesmekti-d d akken yessefk ad d-yili ussileɣ n yixeddamen ay ixeddmen deg uḥric n tmerrit d usselhu n yimeẓla akken ad yettwarfed uswir n tmerrit yerna ad yettekki waya deg lebni n tdamsa yexḍan apitṛul.
Ccerḍ niḍen ay yessefken ad yili i tneflit n tmerrit deg Lezzayer (yellan d tamurt yesɛan tizemmar d timeqranin deg tmerrit) netta d adellel i yimukan n tmerrit d uɣellet n yifarisen iwejden deg yimukan-a.
Aya yeḥwaǧ, deg tazwara, abeddel n lɛeqleyya n medden d umɛawen gar akk imeẓla ay yeqqnen ɣer tmerrit, ama d tadbelt tadigant, ama d ufrinen, ama d medden n menwala, akken ad srebḥen tamerrit deg Lezzayer.
Asfugel unṣib n Wass aɣelnaw n tmerrit yudef deg ukarar n lecɣal yezwaren i lmend n tneflit n uḥric-a yerna aya d assefɛel n lewṣayat ay d-yellan deg yiwen n wass n tezrawin ɣef tneflit n tmerrit tadigant ay d-yellan deg Dujembeṛ n 2011 deg Lezzayer.
Aneɣlaf n tmerrit ixebber-d daɣ, deg tegnit-a, d akken tennulfa-d tiddukla taɣelnawt n ttawilat n yisalan yemmuzzgen (yetxeṣṣeṣen) deg tmerrut (Tirictin n tmerrit).
Iswi agejdan n tiddukla-a tamaynut netta d asseǧhed n dduṛ n yineɣmasen idzayriyen deg usmal n tmerrit deg Lezzayer, yerna ccɣel-nsen ad yeḍfer taneflit n tmerrit akken ad tettwassen Lezzayer deg uḥric-a.
Tiddukla-a tebɣa daɣ ad tili d akatar n uxemmem ḍ yissumar i lmend n ferru n wuguren yellan deg tmerrit.
Ad yettunefk warraz aɣelnaw n « Trictin n tmerrit » yal aseggas deg 22 Ṭuber i lmend n wass aɣelnaw n tɣemsa, i umahil (axeddim) imxeyyer akk deg tɣemsa.
Asfugel n wass aɣelnaw n tmerrit yella-d daɣ d tagnit i tririt n tejmilt n waṭas n wudmawen n tmurt, amezwaru deg-sen d aselway n tegduda, Abdelaziz Bouteflika, ɣef wakk lmeǧhud ay gan i usmal d tneflit n tmerrit.
