Asebter amenzawi
Yenqes waǧaw n ukeffay d sskeṛ seg tmura n uzɣar deg 5 n wayyuren imezwura n useggas-a
LEZZAYER TAMANEƔT – Tafatuṛt n waǧaw n yifarisen n ukeffay (aɣebbar n ukeffay, lidam ay d-yettwassuddmen seg ukeffay am wudi d ufrir) d sskeṛ (sskeṛ n ubiṭrab, sskeṛ n tɣanimt, asiru n ulaktuz d ulaktuz aquran) tenqes deg 5 n wayyuren imezwura n useggas n 2015. S waya, aǧaw n yifarisen n ukeffay yesqam-d 519,06 n yimelyunen n yidulaṛen deg 5 n wayyuren imezwura n useggas-a, yili aseggas yezrin, ttwaǧwen-d 840,86 n yimelyunen n yidulaṛen seg yifarisen-a deg 5 n wayyuren imezwura, yerna yenqes waǧaw n yifarisen-a s 38,27% ɣef wakken ay d-yenna Wammas aɣelnaw n tsenselkimt d taddadanin n tedwant (CNIS) i Tnegga n Yisalan n Lezzayer. D acu kan, ula ma tafatuṛt tenqes, tasmekta n yifarisen n ukeffay ay d-yettwaǧwen terna s 172.940 n yiṭunen gar Yennayer d Mayu yezrin, yili, aseggas yezrin, ttwaǧwen-d 165.567 n yiṭunen deg tallit-nni. S waya, tasmekta n waǧaw terna s 4,45%. Deg wayen yerzan sskeṛ, Lezzayer tuǧew-d 365,7 n yimelyunen n yidulaṛen deg 5 n wayyuren imezwura n 2015. Ma aseggas yezrin, tuǧew-d 403,18 n yimelyunen n yidulaṛen deg tallit-nni. S waya, tafatuṛt n sskeṛ tenqes s 9,3% ɣef leḥsab n yilindi. Ma d tasmekta n sskeṛ ay d-yettwaǧwen, tenqes ula d nettat, imi aseggas-a, ttwaǧwen-d 847.145 n yiṭunen, yili aseggas yezrin ttwaǧwen-d 874.035 n yiṭunen deg semmus n wayyuren imezwura n useggas. S waya, tenqes tesmekta s 3,07%. Deg 2014, aǧaw n yifarisen n ukeffay yuweḍ ɣer 1,9 d amelyaṛ n yidulaṛen, ma d win n sskeṛ yuweḍ ɣer 861,05 n yimelyunen n yidulaṛen. Deg 5 n wayyuren imezwura n 2015, ayen ay d-tuǧew Lezzayer d ifarisen n tuččit yuweḍ ɣer 19,23% seg ujemmal n wayen akk ay d-tuǧew seg uzɣar, yerna tafatuṛt n waya tuweḍ ɣer 4,3 n yimelyaṛen n yidulaṛen, yili aseggas yezrin, Lezzayer tuǧew-d 4,7 n yimelyaṛen n yidulaṛen n tuččit. S waya, tafatuṛt tamatut n tuččit tenqes-d s 8,65%. Aǧaw, s umata, yenqes s 10,22% gar Yennayer d Mayu n 2015, yerna yuweḍ ɣer 22,33 n yimelyaṛen n yidulaṛen.
