Asebter amenzawi
Amesni n temdinin: asenfar n umiṭru deg yigenni i lmend n ussenqes n lḥeṛs ɣef yibriden n Lezzayer Tamaneɣt
LEZZAYER – Anemhal amatu n tkebbanit n umiṭru n Lezzayer (EMA), Mass Aomar Hadbi, yenna-d d akken lebni n umiṭru agenwan deg Lezzayer Tamaneɣt ara yeqqnen Tinemsal (n Ḥay Lbadṛ) ɣer Chevalley d yiwet seg tekta yelhan « i ussifses n tiddit n medden, ula ma tizrawin n usenfar-a werɛad ur d-bdint ara ». « Tuqqna n Ḥay Lbadṛ ɣer Chevalley s umiṭru agenwan d takti yelhan, maca tizrawin n usenfar-a werɛad ur bdint ara », ɣef wakken ay d-yenna Mass Hadbi i Tnegga n Yisalan n Lezzayer, am wakken ay d-yenna d akken taswiɛt-a, tadyant tameqrant ara d-yilin deg tkebbanit-nnes d arẓam n uḥric n umiṭru ara yeqqnen Ḥay Lbadṛ d Lḥeṛṛac. Takti-a n usenfar n umiṭru agenwan yebder-itt-id i tikkelt tamezwarut uneɣlaf aqbur n umesni, Amar Ghoul, mi yerza deg 2014 ɣef ucanṭi-a n Ḥay Lbadṛ-Lḥeṛṛac. Imir-nni, ikataren n tkebbanit n Cosider gan-d yiwen n uqeddem umi semman « Izirig amaynu wis 3 n umiṭru n Lezzayer Tamaneɣt », yerna heyyan-d aqeddem-a s umɛawen d kra n tkebbaniyin n lebni tifṛensisin. Aneɣlaf aqbur d unemhal amatu n EMA nnan-d d akken tettwaheyyan-d tmakiḍt i usenfar-a, yerna xebbren-d taɣemsa d akken yessefk, qbel, ad d-ilint tezrawin uqbel ma yebda-d uxeddim ɣef usenfar-a n ussemɣer n umiṭru n Lezzayer Tamaneɣt. Lemmer ad yebdu usenfar-a, izirig-a yezmer ad yettwabnu deg wazal n 3 n yiseggasen d uzgen yerna ad yessawaḍ medden seg Tnemsal ɣer Tqubbet, Jolie Vue, Garidi, les Sources, Said Hamdine, Ḥidṛa, Aɣaram n Malki, Benɛeknun, Ɛin Llah d Chevalley. Abrid-a ttekkent fell-as aṭas n tkeṛṛusin ay yetteddun ɣer utaram (lɣerb) n Lezzayer Tamaneɣt. Asmi ara d-yewjed yizirig-a, ad yettwaqqen ɣer yizirig-nni ara d-yalin seg Umṛaḥ n Yimeɣrusen (Ccuhada) ɣer Chevalley, yerna ad yeqqel ubrid n umiṭru n Lezzayer Tamaneɣt yebges-d akk i temdint. Taswiɛt-a, amiṭru n Lezzayer yesɛa yiwen kan n yizirig, ɣezzif 8,5 n yikilumitren yerna yessawaḍ medden ɣer 10 n teɣsar seg Tafura-Tasreqqest Tameqrant arma d Ḥay Lbadṛ. Amiṭru agenwan d win ara iserrḥen ibriden n Lezzayer Tamaneɣt yerna lebni-nnes ad d-yessiger 30% n yidrimen ɣef leḥsab n lebni n umiṭru n ddaw tmurt ay yeḥwaǧen taɣuzi d waṭas n yidrimen. S waya, takebbanit n EMA tettwali d akken iduba sɛan lfayda meɣɣren ugar lemmer ad qeblen asenfar n umiṭru agenwan. Takti-a daɣ tenfeɛ imi ara teǧǧ takebbanit n Cosider ad d-teg ticcurka d tegrawin tifṛensisin n Alstom d VSL (n Bouygues Construction) ay yemmuzzgen (yetxeṣṣeṣen) deg ṣṣenf-a n lebni. ɣef leḥsab n tewriqt tateknit, izirig-a ad yesɛu 11 n teɣsar yerna ad yessawaḍ medden deg 20 n tedqiqin seg Ḥay Lbadṛ ɣer Chevalley. 90 n tsinin ara yilin gar tmacint d tayeḍ.
