Asebter amenzawi
Arraz Ameqran n Lezzayer Tamaneɣt n tkurt tamafagt n tlawin: « d tagnit niḍen i tmerniwt n ttejṛiba n teɣlamt taɣelnawt » (Tafidiṛalit)
LEZZAYER – Tazeɣɣa takkaddalt n umeɣrus « Tahar-Belakhdar » n Ccraga ad d-yili deg-s, gar 3 d 5 Yulyu 2015, Warraz Ameqran n tkurt tamafagt n tlawin, tagrawt Q, deg taɣlamt taɣelnawt tadzayrit ad tezmer ad tkemmel assewjed-nnes i ttiɛadat ay d-yetteddun, ɣef wakken ay d-yenna ass n ttlata unmazul amenzu n uselway n Tfidiṛalit tadzayrit n tkurt tamafagt (FAVB).
« Ta d timsizwert ay yesɛan azal-nnes, am tidak yezrin. Seg melmi kan ay turar teɣlamt-nneɣ timsizwert icuban ta deg Taldyjorgan, deg Kazaxstan, yerna tenfeɛ-itt temsizwert-a. Ma d ttiɛad-a n Lezzayer Tamaneɣt ad d-yili d akemmel i ussewjed-a ara yeǧǧen taɣlamt taɣelnawt ad d-terbeḥ ugar n ttejṛiba », ɣef wakken ay d-yenna Mehdi Aberkan i Tnegga n Yisalan n Lezzayer.
Timsizwert-a ad d-tili daɣ d tagnit i teɣlamin ara yettekkin akken ad d-rnunt tinqiḍin yerna ad sselhunt asettef-nsent deg umaḍal, am wakken ara qqiment dima wejdent i temsizwert.
« Taɣlamt n Lezzayer n tlawin ad turar timliliyin-nnes deg yiḍ (10s10 n yiḍ) ɣef lǧal n Remḍan, yerna deg yiḍ daɣ ara tesleɣmu. Deg temsizwert-a, ad turar mgal Ustṛalya (wukud turar yagi deg Kazaxstan), Miksik d Kenya wukud texṣer deg temlilit n tneggarut n telɣuɣa n Tefriqt ay d-yellan seg melmi kan deg Nairobi », ɣef wakken ay d-yenna unmazul amenzu n uselway n Tfidiṛalit.
Seg melmi kan, deg temsizwert n Taldykorgan (Kazaxstan) n Warraz Ameqran n 2015, Lezzayer terna Ustṛalya (s 3 ɣer 0), ma deg Warraz Ameqran n 2014, Lezzayer terbeḥ-d yiwen n uḥric mgal Miksik d sin mgal Bulgaṛya.
ɣef leḥsab n tqebṭant n teɣlamt, Fatima-Zohra Oukazi, timsizwert n Taldykorgan terra-d laman deg wulawen n tmaririn, ladɣa sdeffir ma rnant Ustṛalya, am wakken ay d-twekked d akken taɣlamt-nnes « tewjed akken ad turar deg temsizwert ay d-yetteddun deg Lezzayer Tamaneɣt ».
ɣef leḥsab n wayen ay aɣ-d-yuwḍen seg Tfidiṛalit tadzayrit n tkurt tamafagt, taɣlamt n Ustṛalya tuweḍ-d ɣer Lezzayer ass n letniyen, ma d tiɣlamin n Miksik d Kenya ad d-awḍent ass n ttlata.
Taɣlamt tadzayrit attan deg usensu n Dar Diaf, deg Ccraga, deg wakud deg tiɣlamin tinebgawin ad ttwaszedɣent deg usensu n Dar Diaf n Bucawi.
Ahil n Warraz Ameqran n Lezzayer Tamaneɣt/Tazeɣɣa takkaddalt n Ccraga:
Ljemɛa, 3 Yulyu 2015:
5s10 n tmeddit: Miksik - Kenya
10s10 n tmeddit : Lezzayer - Ustṛalya
Ssebt, 4 Yulyu 2015:
5s10 n tmeddit: Ustṛalya - Kenya
10s00 n tmeddit: Lezzayer - Miksik
Lḥedd 5 Yulyu 2015:
5s10 n tmeddit: Ustṛalie - Miksik
10s10 n tmeddit : Algérie - Kenya
