Asebter amenzawi
Takurt n uḍar: Djamel Benlameri yettaxer seg Yilemẓiyen Inaddalen n Leqbayel
LEZZAYER – Amḥaddi Djamel Benlameri ur yessaweḍ ara ad yemsefham d tmehla n Yilemẓiyen Inaddalen n Leqbayel (tamɣunt 1ut n tkurt n uḍar n Lezzayer) i uɛawed n uqeyyem n lexlaṣ-nnes yerna yettaxer seg teɣlamt-a deg la yetturar seg 2012, ɣef wakken ay d-tenna tmehla n teɣlamt-a i Tnegga n Yisalan n Lezzayer. Taɣlamt n Yilemẓiyen Inaddalen n Leqbayel yesɛan Mohand Cherif Hannachi d aselway-nnes, tewjed ad temciweṛ d teɣlamt niḍen i lmend n tukci n Benlamri ay d-mazal yesɛa leɛqed arma d 2016, yerna tamehla n teɣlamt-a tenna-d d akken ad tefk amarir-a i « teɣlamt ara d-ixellṣen ugar ». Benlameri (25 n yiseggasen) yudef ɣer teɣlamt n Yilemẓiyen Inaddalen n Leqbayel deg 2012 yerna yella, uqbel, yetturar deg NA Ḥusin Day. Amarir-a yeqqel d yiwen seg wuẓwiren akk n teɣlamt n Tmurt n Leqbayel. Seg yidis niḍen, taɣlamt n Yilemẓiyen Inaddalen n Leqbayel tessadef-d 7 n yimariren imaynuten: Salim Boumechra (seg USM Lḥeṛṛac, 2 n yiseggasen), Amar Benmelouka (2 n yiseggasen), Mohamed Boulaouidet (seg Olympique Lemdeyya, 2 n yiseggasen), Lyes Seddiki (seg RC Laṛebɛa, 2 n yiseggasen), Ahmed Gagaa (seg Paradou AC, d areḍḍal n useggas), Koceila Berchiche (seg MC Lezzayer) d Faouzi Rahal (seg MO Bgayet). Taɣlamt n Yilemẓiyen Inaddalen n Leqbayel ṛuḥen-as daɣ aṭas n yimariren am Mekkaoui, Benoufela d Yedroudj. Imariren n teɣlamt n Yilemẓiyen Inaddalen n Leqbayel ddan ass n ttlata ɣer Tunes akken ad gen tannant n ussewjed deg temnaḍt n Ḥemmam Bourguiba, d tannant deg ara turar teɣlamt-a kra n temliliyin n timmidwa.
