ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵍⴻⵣⵣⴰⵢⴻⵔ ⵜⴻⴼⵕⴻⵃ ⵉⵎⵉ ⴰⵢ ⵜⴻⵜⵜⵡⴰⵙⵙⴻⵖⵣⴻⴼ ⵍⴻⵡⵚⴰⵢⴰ ⵏ ⵎⵉⵏⵓⵙⵎⴰ

ⵍⴻⵣⵣⴰⵢⴻⵔ – ⵍⴻⵣⵣⴰⵢⴻⵔ ⵜⵓⵎⴰⵔ (ⵜⴻⴼⵕⴻⵃ) ⵙ ⵓⵙⵙⴻⵖⵣⴻⴼ ⵏ ⵍⴻⵡⵚⴰⵢⴰ ⵏ ⵜⵓⵖⴷⴰⴹⵜ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴷⴻⴳ ⵎⴰⵍⵉ (ⵎⵉⵏⵓⵙⵎⴰ) ⴰⵔⵎⴰ ⴷ 30 ⵢⵓⵏⵢⵓ 2016, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵍⴰⵕⴻⴱⵄⴰ ⵓⵏⴻⵟⵟⴰⵇ ⵏ ⵓⵖⵍⵉⴼ ⵏ ⵜⵖⴰⵡⵙⵉⵡⵉⵏ ⵏ ⵓⵣⵖⴰⵔ, ⴰⴱⴷⴻⵍⴰⵣⵉⵣ ⴱⴻⵏⴰⵍⵉ ⵛⵀⴻⵔⵉⴼ. « ⵏⵓⵎⴰⵔ ⵙ ⵓⵙⵄⴻⴷⴷⵉ ⵏ ⵜⵏⴻⵖⵜⵓⵙⵜ 2227 (2015) ⵏ ⵓⵙⴻⵇⵇⴰⵎⵓ ⵏ ⵜⵖⴻⵍⵍⵉⵙⵜ ⵉ ⵍⵎⴻⵏⴷ ⵏ ⵓⵙⵙⴻⵖⵣⴻⴼ ⵏ ⵍⴻⵡⵚⴰⵢⴰ ⵏ ⵜⵓⵖⴷⴰⴹⵜ ⵜⴰⴳⴻⵜⵙⴻⴽⵜⴰⵏⵜ ⵢⴻⵏⵏⵓⵎⵎⴷⴻⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉ ⵓⵙⵙⴻⵔⴽⴻⴷ ⴷⴻⴳ ⵎⴰⵍⵉ (ⵎⵉⵏⵓⵙⵎⴰ) », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴱⴻⵏⴰⵍⵉ ⵛⵀⴻⵔⵉⴼ ⴷⴻⴳ ⵢⵉⵡⴻⵜ ⵏ ⵜⵙⴻⵖⵔⵓⵜ ⵉ ⵜⵏⴻⴳⴳⴰ ⵏ ⵜⵖⴻⵎⵙⴰ ⵏ ⵍⴻⵣⵣⴰⵢⴻⵔ. « ⵕⵕⴰⵢ-ⴰ ⵢⴻⵙⵙⴽⴰⵏⴰⵢ-ⴷ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, « ⵍⴻⴱⵖⵉ ⵏ ⵓⵎⵖⵉⵡⴰⵏ ⴰⴳⵔⴰⵖⵍⴰⵏ ⵙ ⵓⵎⴰⵜⴰ ⴰⴽⴽⴻⵏ ⴰⴷ ⵉⴽⴻⵎⵎⴻⵍ ⴰⴱⴷⴰⴷ-ⵏⵏⴻⵙ ⵖⴻⵔ ⵢⵉⴷⵉⵙ ⵏ ⵍⵎⴻⴵⵀⵓⴷ ⵉ ⵓⵙⵙⴻⵔⴽⴻⴷ ⵏ ⵎⴰⵍⵉ ⴷ ⵓⵙⵙⴻⴼⵄⴻⵍ ⵏ ⵓⵎⵜⴰⵡⴰ ⵏ ⵜⴰⵍⵡⵉⵜ ⴷ ⵓⵎⵙⵓⵖⴰⵍ ». « ⵍⴻⵣⵣⴰⵢⴻⵔ, ⵙ ⵢⵉⵙⴻⵎ-ⵏⵏⴻⵙ ⴷ ⵜⵉⵎⴹⴻⴱⴱⴻⵔⵜ ⴷⴻⴳ ⵜⴻⴱⴷⴰⵎⵎⴰⵙⵜ ⵢⴻⵔⵏⴰ ⴷ ⵜⴰⵙⴻⵍⵡⴰⵢⵜ ⵏ ⵓⵙⴻⵇⵇⴰⵎⵓ ⵏ ⵓⴹⴼⴰⵔ, ⵜⴳⴰ ⴰⴽⴽ ⴰⵢⴻⵏ ⵓⵎⵉ ⵜⴻⵣⵎⴻⵔⵜ, ⵖⴻⵔ ⵢⵉⴷⵉⵙ ⵏ ⵢⵉⴷⵉⵙⴰⵏ ⵏⵉⴹⴻⵏ ⴰⵢ ⵢⴻⵜⵜⴻⴽⴽⴰⵏ, ⴰⴽⴽⴻⵏ ⴰⴷ ⵜⴻⵙⵙⴻⴷⴷⵓ ⵍⴻⵎⵛⴰⵡⵕⴰⵜ ⵏ ⵜⴰⵍⵡⵉⵜ ⴰⴽⴽⴻⵏ ⵢⴻⵍⵀⴰ ⴷⴻⴳ ⵓⴽⴰⵜⴰⵔ ⵏ ⵓⴽⴰⵍⴰ ⵏ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ, ⵢⴻⵔⵏⴰ ⴰⵙⵙ-ⴰ ⴰⵍⴰ ⵜⵓⵎⴻⵔⵜ ⴰⵔⴰ ⵜⵓⵎⴰⵔ ⵍⴻⵣⵣⴰⵢⴻⵔ ⵖⴻⴼ ⵓⴱⴷⴰⴷ ⴰⵢ ⵢⴻⴱⴷⴻⴷ ⵓⵎⵖⵉⵡⴰⵏ ⴰⴳⵔⴰⵖⵍⴰⵏ ⵖⴻⵔ ⵢⵉⴷⵉⵙ ⵏ ⵍⵎⴻⴵⵀⵓⴷ ⵉ ⵍⵎⴻⵏⴷ ⵏ ⵜⵓⵇⵇⵍⴰ ⵏ ⵓⵔⴽⴰⴷ ⴷ ⵜⴰⵍⵡⵉⵜ ⵖⴻⵔ ⵎⴰⵍⵉ, ⴷ ⵍⵎⴻⴵⵀⵓⴷ ⴰⵢ ⵍⴰ ⴷ-ⵢⴻⵜⵜⵉⵍⵉⵏ ⵉ ⵍⵎⴻⵏⴷ ⵏ ⵓⵙⵙⴻⴼⵄⴻⵍ ⵏ ⵢⵉⵃⴻⵣⵣⵉⴱⴻⵏ ⵏ ⵓⵎⵜⴰⵡⴰ ⵏ ⵜⴰⵍⵡⵉⵜ ⴷ ⵓⵎⵙⵓⵖⴰⵍ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ. « ⵏⵄⴰⵡⴻⴷ ⵏⵡⴻⴽⴽⴻⴷ-ⴷ ⴰⵡⵊⴰⴷ-ⵏⵏⴻⵖ ⵓⵎⵎⵉⴷ ⴰⴽⴽⴻⵏ ⴰⴷ ⵏⴽⴻⵎⵎⴻⵍ ⴰⵎⵄⴰⵡⴻⵏ-ⵏⵏⴻⵖ ⴰⵢ ⴷ-ⵢⴻⴼⴽⴰⵏ ⵢⴰⴳⵉ ⵍⴼⴰⵢⴷⴰ ⴷ ⵎⵉⵏⵓⵙⵎⴰ ⴰⴽⴽⴻⵏ ⴰⴷ ⵏⴻⵙⵙⴻⴵⵀⴻⴷ ⴰⵢⴻⵏ ⴰⵢ ⴷ-ⵢⴻⵜⵜⵡⴰⵃⴻⵕⵕⴻⵏ, ⵢⴻⵔⵏⴰ ⴰⴷ ⵏⴽⴻⵎⵎⴻⵍ ⴰⵎⴰⵀⵉⵍ (ⴰⵅⴻⴷⴷⵉⵎ) ⵏ ⵓⵙⴷⵓⵎⵓ ⵏ ⵜⴰⵍⵡⵉⵜ ⴷⴻⴳ ⵎⴰⵍⵉ ⵉ ⵍⴼⴰⵢⴷⴰ ⵏ ⵜⵎⵓⵔⵜ-ⴰ ⵜⴰⵏⴰⵔⴰⴳⵜ (ⵜⴰⵊⴰⵕⴻⵜ) ⴷ ⵜⵉⵏ ⵏ ⵡⴰⴽⴽ ⵜⴰⵎⵏⴰⴹⵜ ⵏ ⵙⵙⴰⵃⴻⵍ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵟⵟⴰⵇ. ⴰⵙⴻⵇⵇⴰⵎⵓ ⵏ ⵜⵖⴻⵍⵍⵉⵙⵜ ⵢⴻⵙⵄⴻⴷⴷⴰ ⴰⵙⵙ ⵏ ⵍⴻⵜⵏⵉⵢⴻⵏ, ⵙ ⵓⵏⵏⴻⵎⵣⴻⵍ, ⵜⴰⵏⴻⵖⵜⵓⵙⵜ ⵏ ⵓⵙⵙⴻⵖⵣⴻⴼ ⵏ ⵍⴻⵡⵚⴰⵢⴰ ⵏ ⵎⵉⵏⵓⵙⵎⴰ ⵉ ⵓⵙⴻⴳⴳⴰⵙ ⵏⵉⴹⴻⵏ.