Asebter amenzawi

Lezzayer tefṛeḥ imi ay tettwasseɣzef lewṣaya n MINUSMA

LEZZAYER – Lezzayer tumar (tefṛeḥ) s usseɣzef n lewṣaya n Tuɣdaḍt n Yiɣlanen Yeddukklen deg Mali (MINUSMA) arma d 30 Yunyu 2016, ɣef wakken ay d-yenna ass n laṛebɛa uneṭṭaq n uɣlif n tɣawsiwin n uzɣar, Abdelaziz Benali Cherif. « Numar s usɛeddi n tneɣtust 2227 (2015) n Useqqamu n tɣellist i lmend n usseɣzef n lewṣaya n Tuɣdaḍt tagetsektant yennummden n Yiɣlanen Yeddukklen i Usserked deg Mali (MINUSMA) », ɣef wakken ay d-yenna Mass Benali Cherif deg yiwet n tseɣrut i Tnegga n Tɣemsa n Lezzayer. « Ṛṛay-a yesskanay-d », ɣef wakken ay d-yenna, « lebɣi n umɣiwan agraɣlan s umata akken ad ikemmel abdad-nnes ɣer yidis n lmeǧhud i usserked n Mali d ussefɛel n umtawa n talwit d umsuɣal ». « Lezzayer, s yisem-nnes d timḍebbert deg tebdammast yerna d taselwayt n useqqamu n uḍfar, tga akk ayen umi tezmert, ɣer yidis n yidisan niḍen ay yettekkan, akken ad tesseddu lemcawṛat n talwit akken yelha deg ukatar n ukala n Lezzayer Tamaneɣt, yerna ass-a ala tumert ara tumar Lezzayer ɣef ubdad ay yebded umɣiwan agraɣlan ɣer yidis n lmeǧhud i lmend n tuqqla n urkad d talwit ɣer Mali, d lmeǧhud ay la d-yettilin i lmend n ussefɛel n yiḥezziben n umtawa n talwit d umsuɣal », ɣef wakken ay d-yenna. « Nɛawed nwekked-d awjad-nneɣ ummid akken ad nkemmel amɛawen-nneɣ ay d-yefkan yagi lfayda d MINUSMA akken ad nesseǧhed ayen ay d-yettwaḥeṛṛen, yerna ad nkemmel amahil (axeddim) n usdumu n talwit deg Mali i lfayda n tmurt-a tanaragt (tajaṛet) d tin n wakk tamnaḍt n Ssaḥel », ɣef wakken ay d-yenna uneṭṭaq. Aseqqamu n tɣellist yesɛedda ass n letniyen, s unnemzel, taneɣtust n usseɣzef n lewṣaya n MINUSMA i useggas niḍen.