Asebter amenzawi
Yaman: 279 n yigerdan ay yemmuten seg taggara n Meɣres (UNICEF)
ṢENƐA – Imenɣi yellan gar yiduba iyamaniyen d yiɣewwaɣen iḥutiyen yegla s wacḥal n twinas n yigerdan yerna jerḥen aṭas niḍen, ɣef wakken ay d-yenna UNICEF. Ma ulac, 279 n yigerdan ay yemmuten yerna jerḥen 402 niḍen seg tgara n Meɣres, deg yimenɣi ay inekren gar yiserdasen n unabapd d yiɣewwaɣen iḥutiyen, ɣef wakken ay d-yenna deg Geneve uneṭṭaq n Usenduq n Yiɣlanen Yeddukklen i tgerda (UNICEF), Christophe Boulierac. Aneṭṭaq-a yesmekti-d d akken amaru amatu n Yiɣlanen Yeddukklen, Ban Ki-moon, iger-d tiɣri i « wakk idisan akken ad ḥebsen imenpqi yerna ad ssifessen assiweḍ n lemɛawna tuɛjilt i wid ay tt-yeḥwaǧen ». UNICEF tejbed-d daɣ lwelha n ṛṛay anagdud agraɣlan ɣef tegnit taweɛṛant deg tella tdawsa deg Yaman, yerna d imelyunen n yigerdan ay yellan deg umihi deg tmurt-a. Imi ay yeḥbes ubsaḍ, 2,6 n yimelyunen n yigerdan n ddaw n 15 n yiseggasen ay izemren ad aḍnen tabuzewwaɣt, ɣef wakken ay d-yenna Christphe Boulierac. Amḍan n yigerdan ay izemren ad aḍnen aḍḍanen iqesḥanen n uneffes yuweḍ ɣer 1,3 d amelyun, acku « aṭas n yisbiṭaren d wammasen n udawi ur la yetteddun ara akken iwata ». Imi ay tenqes tezdeg yerna xuṣṣen waman n tissit, 2,5 n yimelyunen n yigerdan ay izemren ad aḍnen aḍḍan n tazzla n tɛebbuḍt. Lexṣaṣ n wučči d ugur ameqran niḍen ay izemren ad iḥaz igerdan. ɣef leḥsab n UNICEF, deg 12 n wayyuren ay d-yetteddun, azal n 500.000 n yigerdan ay izemren ad aḍnen aḍḍan n tazzla n tɛebbuḍt seg gar 1,2 d amelyun n yigerdan. Imenɣi gar yiduba iyamaniyen d yiɣewwaɣen iḥutiyen iciɛiyen rnan deg teqseḥ deg Ɣuct n 2014. Deg Yennayer yezrin, yiwet n tegrawt timselleḥt n Yiḥutiyen, Ansar Allah, teḍḍef tamdint n Ṣenɛa, tamaneɣt n tmurt. Aselway Abd Rabo Mansour Hadi d unabaḍ n Khalad Mahfoud Bahah ttaxren ddaw lḥeṛs n yiɣewwaɣen. Aselway yedduri deg Ɛaden, maca mi d-uwḍen yiɣewwaɣen iciɛiyen ula ɣer temdint-a, terra-t tmara ad yeffeɣ seg tmurt. S ussuter sɣur Abd Rabbo Mansour Hadi, Tagelda Tasaɛudit (wukud beddent daɣ Beḥṛin, Qaṭar, Lekwit d Limaṛat taɛṛabin yeddukklen) tebda, seg 26 Meɣres, tiytiwin tigenwanin mgal Yiḥutiyen. Maṣer, Luṛdun, Meṛṛuk d Sudan ttekkant, ula d nitenti, deg temsisit-a.
