Asebter amenzawi
Ddula tɛewwel ad d-tessers talwit deg Tɣerdayt
TAɣERDAYT –Aneɣlaf n tɣawsiwin n daxel d tmazdayin tidiganin, Noureddine Bedoui, iwekked-d ass n lexmis deg Tɣerdayt d akken awanak (ddula) iɛewwel akken ad ikemmel lmeǧhud yerna ad d-yefk akk ayen yessefken akken ad d-yeqqel urkad ɣer twilayt-a. « Awanak iɛewwel akken ad ikemmel lmeǧhud i lmend n ussemsuɣal s lemɛawna n lɛeqqal d wid yettwassnen deg temnaḍt-a akken ad mqaraben wid yemxaṣamen gar-asen (imalikiyen d yibbaḍiyen), ɣef wakken ay d-iwekked Mass Bedoui ay yemlalen d yigensasen n tmetti taɣarimt, ufrinen d kra seg wid yettwassnen deg Tɣerdayt. D acu kan, yenna-d uneɣlaf d akken « iswi ay nebɣa ad t-naweḍ ur yezmir ara ad d-yili war attekki n tidet n wid yettwassnen d lɛeqqal n sin n yidisan ay terza temsalt akken ad bedden ɣer yidis n wayen ay d-yessumer uwanak i lmend n tuqqla n urkad deg temnaḍt-a. Mass Bedoui iger-d tiɣri akken ad d-tettwalmed temsirt seg umezruy aɣelnaw yerna ad yettwaḍfer ubrid n urkawal n talwit d umsuɣal aɣelnaw d wazalen d wansayen n tmetti tadzayrit. ɣef leḥsab n uneɣlaf, « tidyanin yesseḥzanen ay yettḥazen seg-a ɣer da Taɣerdayt d ccɣel n wid ay yebɣan ad snekren lfetna d ccwal » yerna bɣan ad zerɛen beḍḍu gar yimezdaɣen n wilyat-a. « Tidyanin-a n diri sɛant ssebbat yemgerraden, maca ttekkant deg yinguzen uffiren n kra n yidisan ay yebɣan ad swaɣen taɣellist (laman) d urkad n tmurt-nneɣ », ɣef wakken ay d-iɛeyyen. Dɣa deg temsalt-a, aneɣlaf iɛeyyen-d d akken « tagnit-a, ala d icenga n tmurt ara d-yesfaydin seg-s », am wakken ay d-yenna d akken ɣef lǧal ccwal-a, tenqes tnezzut, tamerrit d tdamsa deg twilayt-a. Mass Bedoui ifuṛes tagnit-a akken ad d-yesmekti s teɣri ay d-iger uselway n tegduda, Abdelaziz Bouteflika, i lmend n tukci n wazal i umciweṛ, i umsuref d umsefham ayɣef yettweṣṣi Lislam d yimenzayen n umqader. Mass Bedoui yuweḍ ass n lexmis taṣebḥit ɣer twilayt n Tɣerdayt, yerna yedda yid-s unemhal amatu n tɣellist taɣelnawt, ajiniṛal-amajuṛ Abdelghani Hamel, agensas n unzaḍ amatu n temsetla taɣelnawt, d yimura imuta n yiɣlifen yemgerraden. Deg terzi-a, Mass Bedoui yesselwi tafugla n ussenṣeb n tseqqamut tagraɣlift ara d-yelhun s unadi wamek ara tettwasserked tegnit deg twilayt-a.
