Asebter amenzawi
Lezzayer twet-d « s teqseḥ » deg txazabit tarebrabt mgal yiserdasen imaṣriyen deg Sinay
LEZZAYER – Lezzayer tessaẓer « s teqseḥ », s yiles n uneṭṭaq n uɣlif n tɣawsiwin n uzɣar Abdelaziz Benali Cherif, tixazabiyin-nni tirebrabin ay d-yellan ass n laṛebɛa mgal yiserdasen imaṣriyen deg temnaḍt n Sinay (Maṣer), yerna glant s waṭas seg yirgazen n tɣellist (laman). Deg yiwet n tseɣrut ay d-iga i Tnegga n Yisalan n Lezzayer, Mass Benali Cherif iɛawed iwekked-d ass n lexmis tamsetlelt n Lezzayer ɣer yidis n uɣref d unabaḍ imaṣriyen, am wakken ay d-yenna d akken « inṭagen-a ay d-yellan ɣef teswiɛt mgal yimukan n yigen d tenqiḍin n ussefqed deg ugafa n Sinay glan s wacḥal n teɣtas gar yiserdasen d yirgazen n tɣellist, d ccɣel arebrab amelɣun ay nessaẓer s teqseḥ ». « Aɣref amaṣri agmat ad yessiweḍ, war ccek, ad yeddukkel akken ad iqabel rrebrab d wid ay igan tajrimt-a tucmit, taweḥcit, ur yesɛin tamtilt », ɣef wakken ay d-yenna Mass Benali Cherif ay d-yernan d akken « iɣallen imsellḥen imaṣriyen maci d ccɣel am wa ara ten-yessenhezzen ». Lezzayer « ay yenḍerren mliḥ seg twuɣa n rrebrab tettɛawad tettwekkid-d tamsetlelt-nnes n tegmat ɣer yidis n unabaḍ d uɣref imaṣriyen yerna tettɛawad-d i teɣri-nnes i lmend n usdukkel n lmeǧhud n wakk timura i lmend n yimenɣi mgal rrebrab d yixeṣṣaren imihawen ayyes ay d-igellu ɣef tɣellist (laman) d talwit deg umaḍal », ɣef wakken ay d-yenna Mass Benali Cherif.
