Asebter amenzawi

Lezzayer tefṛeḥ s tuqqla n wassaɣen idiplumatiyen gar Kuba d Yiwanaken Yeddukklen

LEZZAYER – Lezzayer tumar (tefṛeḥ) s tuqqla n wassaɣen idiplumatiyen gar Kuba d Yiwanaken Yeddukklen, d assaɣen ay yebbin ugar n 50 n yiseggasen, yerna Lezzayer tettwali aya d « isali yessumaren » ay d-yettbecciren s « uzekka yelhan », ɣef wakken ay d-yenna ass n lexmis uneṭṭaq n uɣlif n tɣawsiwin n uzɣar, Abdelaziz Benali Cherif. « Tuqqla, deg wayyur-a n Yulyu n 2015, n wassaɣen idiplumatiyen gar Kuba d Yiwanaken Yeddukklen, sdeffir ma bbin 50 n yiseggasen, d urẓam n tuɣdaḍin tidiplumatiyen deg tmunaɣ n snat-a n tmura, d isali yessumaren yerna yettbeccir-d s uzekka yelhan, ama i yiɣerfan n Kuba d Yiwanaken Yeddukklen, ama i wakk iɣerfan n temnaḍt-a, ama anda niḍen », ɣef wakken ay d-yenna uneṭṭaq deg yiwet n tseɣrut i Tnegga n Yisalan n Lezzayer. Mass Benali Cherif ihenna inabaḍen n Yiwanaken Yeddukklen d Kuba ɣef usurif-a ay gan ɣer sdat, « yerna nesɛa assirem d akken asurif-a ay d-yellan deg ubrid n umqarab ad t-id-ḍefren yisurifen niḍen, ladɣa tukksa n tergult ay d-yettwaḥettmen ɣef Kuba, yerna d aya ara ifaken akala n ussagnu n wassaɣen gar snat-a n tmura tinaragin (tijiratin) », ɣef wakken ay d-yenna. Aselay amarikani Barack Obama yenna-d, ass n laṛebɛa, d akken qqlen-d wassaɣen idiplumatiyen gar Yiwanaken Yeddukklen d Kuba, sdeffir ma bbin ugar n 50 n yiseggasen ɣef lǧal n ccwal ay d-yellan deg umgaru asemmaḍ, am wakken ay d-yenna Obama d akken aya ad yili d beddu n tallit tamaynut. Assaɣen idiplumatiyen gar Kuba d Yiwanaken Yeddukklen yebbi-ten uselway amarikani John F. Kennedy deg 1961. Aɣtas-a yella-d ɣef lǧal n umqarab ay d-yellan gar yigrawalen n Fidel Castro d Tdukli Tasuvyatit. Ssebba niḍen nettat tukksa ay asen-yekkes unabaḍ akubi ayla-nsen i Yimarikaniyen deg Kuba.