Asebter amenzawi
Aǧaw n tkeṛṛusin: taluft n tkeṛṛusin ay yettwaḥebsen ur tettɛeṭṭil ara ad tefru
LEZZAYER TAMANEƔT – Ugur n tkeṛṛusin ay yettwaḥebsen deg kra n yisugan (lmerṣat) seg wasmi ay yettwassefɛel uzmam n ccuruḍ ay yessefk ad t-qadrent tkebbaniyin yesnuzuyen tikeṛṛusin, ad yefru deg wussan ay d-yetteddun, ɣef wakken ay d-yenna ass n lexmis uneɣlaf n temguri d lminat, Abdesselam Bouchouareb deg yiwet n tseɣrut i Tnegga n Yisalan n Lezzayer. « Ti maci d tikeṛṛusin ay yettwaḥebsen (deg yisugan). Ta d tasekkirt ay d-yettwaswejden akken ad tent-id-ssuffɣen. Tamsalt-a ad tefru seg-a ɣef kra n wussan », ɣef wakken ay d-yenna deg yijifeṛ n yiwet n tɣimit ay d-yellan i tuttriwin timawiyin deg Useqqamu n uɣlan. Aneɣlaf yenna-d d akken tamsalt-a terza amḍan d ameẓyan n tkeṛṛusin ay d-yettwassutren uqbel 15 Yebrir (azemz aydeg yettwassefɛel uzmam-nni amaynu n ccuruḍ), kra seg-sent ttwaxellṣent s tebṛat n usmad, ma d amur ameqran seg-sent, ttwaxellṣent s ḍḍmana n lexlaṣ s lekwaɣeḍ (remdoc). « Yal ṣṣenf n uxelleṣ ad as-d-neg tifrat ayyes ara tfak tsekkirt n waǧaw yerna ad d-ffɣent tkeṛṛusin-nni (ay d-yettwaǧwen) », ɣef wakken ay d-yenna Mass Bouchouareb. Kra seg tkeṛṛusin-a d iduba inagduden ay ten-id-yessutren, ɣef wakken ay d-yenna uneɣlaf, am wakken ay d-yerna d akken ta d « tallit n tukkit » ay yessefken ad d-tili i lmend n ussefɛel ummid n yilugan ay yesseddayen aǧaw n tkeṛṛusin timaynutin. Tikeṛṛusin ay d-yeqqimen deg tegnit-a drusit mliḥ ɣef leḥsab n ujemmal n tkeṛṛusin ay d-yettwaǧawen, ɣef wakken ay d-iwekked uneɣlaf. Amḍan n tkeṛṛusin ay d-mazal ttwaḥebsent deg yisugan yuweḍ ɣer 4.000, yerna atenti imir-a deg usagen n Jijel, ɣef leḥsab n teɣbula n uɣlif n temguri. Seg yidis niḍen, Mass Bouchouareb ixebber-d d akken aɣlif-nnes yelha-d ussan-a, s umɛawen n yiɣlifen niḍen, gar-asen win n tnezzut, s wayen ay yessefken ad d-yettwassewjed i ussefɛel n turagin n waǧaw n tkeṛṛusin, am wakken ay d-yenna d akken aǧaw n tkeṛṛusin timaynutin ur yettɛeddi ara i 400.000 i useggas, akken ay d-yenna uqbel ula d aɣlif n tnezzut. Seg tama niḍen, mi d-yerra ɣef tuttriwin timawiyin n Useqqamu n uɣlan, aneɣlaf ixebber-d d akken la d-ttwaheyyayen yisenfaren imguranen i twilayin n unẓul. Dɣa, deg temsalt-a, yebder-d lebni n yiwet n lluzin n uxdam n zzǧaǧ deg Adrar, d tin ara yesɛun tazmert n ufares n 150.000 n yiṭunen deg useggas, yerna tella-d s ticcurka gar tkebbanit tanagdudt, takebbanit tusligt d tkebbanit tabeṛṛanit, am wakken ara tettwabnu lluzin tamaynut n usiman ara yesɛun tazmert n ufares n 1,5 d amelyun n yiṭunen deg useggas. Dima deg temsalt-a, Mass Bouchaoureb ixebber-d d akken la d-ttilint tezrawin i lmend n lebni n snat n lluzinat niḍen n zzǧaǧ deg twilayin n Tmenɣest d Illizi.
