Asebter amenzawi

Libya: Aseqqamu n tɣellist la ttḥettiten idisan yemxaṣamen akken ad msefhamen

Nyu YuRK (Iɣlanen Yeddukklen) – Aseqqamu n tɣellist (laman) iger-d tiɣri, ass n laṛebɛa, i tegrawin tilibiyin yemxaṣamen akken ad msefhament ɣef umtawa aserti, yiwen wass uqbel ma qqlent ɣer lemcawṛat. Deg yiwet n tseɣrut ay sɛeddant tmura n Useqqamu n tɣellist s umsefham gar-asent, « grent-d tiɣri i yimttekkiyen (deg lemcawṛat) akken ad msefhamen ɣef unabaḍ n tukkit yerna ad stenyin asenfar » n umtawa ay d-ssumren Yiɣlanen Yeddukklen « deg wussan ay d-yetteddun ». Anabaḍ n tdukli « ad yili deg leṣlaḥ n uɣref alibi d uzekka-nnes, acku d aya ara ifaken tilufa n tsertit d tɣellist, yerna ad yeǧǧ tamurt ad tqabel tuggza la yettnernin n rrebrab ». Libya teɣli deg ccwal seg wasmi ay yeɣli unhil n Mouammar Al Guedhafi deg 2011. Ass-a, tamurt-a tesɛa 2 n yimnan d 2 n yinabaḍen ay la yettnaɣen ɣef udabu. Yiwen n unabaḍ atan deg Ṭrables, ma d wayeḍ atan deg Ṭubruq (deg ugmuḍ), yerna d aneggaru-a ayyes yesteɛṛef umɣiwan agraɣlan. Asenfar amezwaru ay d-yettwaheyyan deg Yiɣlanen Yeddukklen i umtawa gar Yilibiyen d win yessefran ad d-yettwassebded unabaḍ n tdukli taɣelnawt ara yeḍḍfen aseggas. Iwanaken Yeddukklen d semmus n tmura tuṛufiyin (Tagelda Yeddukklen, Fṛansa, Lalman, Ṭṭalyan d Spenyul) gren-d tiɣri ass n laṛebɛa, deg yiwet n tseɣrut tucrikt, i sin-nni n yimnan ilibiyen akken ad qeblen asenfar n umtawa ay d-ssumren Yiɣlanen Yeddukklen.