Asebter amenzawi
Aɣerbaz imineg n yisensa n Lezzayer: assileɣ i uswir agraɣlan
LEZZAYER – Aɣerbaz imineg n yisensa d ussečči n Lezzayer Tamaneɣt (ESHRA) d aɣsur anagdud ay yessedday Uɣerbaz aswisi n Lausanne, yerna iswi-nnes netta d assileɣ n yixeddamen n yisensa akken ad awḍen ɣer uswir agraɣlan. Aɣerbaz-a yerẓem-it ass n ssebt uneɣlaf amenzu Abdelmalek Sellal, yerna anesmal-nnes d Takebbanit n ussefti deg yisensa. Iswi n uɣerbaz-a netta d assileɣ n yikataren ara yessefraken iɣsar isensanen d yimerrayen s yilugan igraɣlanen akken ad awḍen ɣer uswir unnig n ugerrez. Aɣerbaz n ESHRA yeqfel aseggas seg wasmi ay yella, yerna ixeddem ddaw lewṣaya n uɣlif n ulmud imineg d unadi ussnan. Agerdas ara d-yawi unelmad seg ussileɣ-a d win ara yesselken, daɣ, uɣerbaz n yisensa aswisi n Lausanne, ɣef wakken ay d-yenna unemhal amatu n ESHRA, Xavier Chlapowski. Igerdasen-a d turagt ara d-yawi unelmad deg 3 n yiseggasen (anagraw n LMD) yerna ad as-t-id-yefk uɣlif n ulmud imineg, d turagt tagraɣlant n ussefrek asensan ara d-yefk uɣerbaz n yisensa n Lausanne deg 4 n yiseggasen. Aɣerbaz-a yezga-d deg Ɛin Lebnyan (deg utaram [lɣerb] n Lezzayer Tamaneɣt), yerna yesqam-d lebni-nnes 13,3 n yimelyaṛen n yidinaṛen. Yesɛa 800 n yimukan i yinelmaden, 400 n wusuten i yinelmaden yettnusun, 20 n wusuten i yinerzafen, 27 n tmudrutin i yinelmaden d 7 n tmudrutin n « duplex ». Yettwabna uɣerbaz n ESHRA deg yiwet n tjumma n 78.000 n yimitren imkuẓen yerna yesɛa tidumṣukiwin titrarin, ttawilat n teknussna tamaynut, yerna asselmed n ussefrek asensan deg uɣerbaz-a yedda mliḥ ɣer sdat. Almad deg uɣerbaz-a s lexlaṣ yerna yesqamay-d 900.000 n yidinaṛen i useggas. Asmal amezwaru deg-s 48 n yinelmaden, d wid yellan ttnusun din, yerna seg melmi kan ay fuken aseggas-nsen amezwaru deg uɣerbaz-a. S waya, inelmaden ara d-yawin lbak aseggas-a ad zemren ad ḍefren assileɣ deg uɣerbaz-a s lexlaṣ, maca ad ilin wid ara d-yesfaydin seg lemɛawna ama seg tkebbaniyin tinagdudin, ama seg tkebbaniyin tusligin ay ixeddmen deg unrar n tmerrit, gar-asent Takebbanit n ussefti deg yisensa. Iselmaden, deg uɣerbaz-a, llan gar-asen Yidzayriyen d yibeṛṛaniyen ay ixeddmen deg tenwalin yesɛan ttawilat d itraren, dɣa d aya ara yeǧǧen inelmaden ad awḍen ɣer uswir n ugerrez d unnig. Aɣerbaz aswisi n Lausanne yettazen-d, daɣ, seg-a ɣer da, ikataren ɣer Lezzayer akken « ad ɛassen » amahil (axeddim) n uɣerbaz n ESHRA, ɣef wakken ay d-yenna unemhal-nnes. Inelmaden ay izerrwen deg uɣerbaz-a ssiliɣen-ten-id deg waṭas n yinurar, ama deg ummager, ama deg ussefrek, ama deg ussewwi, yerna ttgen-asen assileɣ deg unrar deg yisensa ama deg Lezzayer, ama deg uzɣar. Annanen n unrar ttilin-d deg umesdis wis 3 d umesdis wis 7 n ussileɣ-nsen ama deg unrar n ussefrek asensan, ama deg tmezzugin yemgerraden niḍen. Dɣa deg temsalt-a, inelmaden n uɣerbaz n ESHRA ttekkan deg urẓam n uɣerbaz n Mariott deg Qsenṭina, am wakken ay llan kra seg-sen ay yettekkan deg Tmesrit n ccikula ay d-yellan seg melmi kan deg Lezzayer Tamaneɣt. Aɣerbaz-a yesɛa daɣ taneččit sdaxel-is i usselmed, yerna taneččit-a treẓẓem 3 n tikkal i dduṛt (ttlata, laṛebɛa d lexmis). Arẓam n uɣerbaz-a d win ay d-yellan i lmend n usseǧhed d ussali n uswir n yixeddamen n unrar n tmerrit, ladɣa imi Lezzayer attan ad tebdu aṭas n yisenfaren n ussefti deg unrar-a, ɣef wakken ay d-yenna uneɣlaf n uheyyi n wakal, n tmerrit d tenḍi, Amar Ghoul. Azal n 20 n yisuda niḍen n ussileɣ deg tmerrit ara yettwareẓmen seg-a ɣer 2020.
