ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵙⴻⵇⵇⴰⵎⵓ ⵏ ⵢⵉⵣⴻⴼⴰⵏ ⵏ ⵓⵎⴷⴰⵏ ⵉⴳⴻⵔ-ⴷ ⵜⵉⵖⵔⵉ ⵉ ⵓⵛⴰⵕⴻⵄ ⵏ ⵢⵉⵎⴹⴻⴱⴱⵔⴻⵏ ⵏ ⵜⴻⵊⵔⵉⵎⵉⵏ ⵏ ⵟⵟⵔⴰⴷ ⴷⴻⴳ ⵖⴻⵣⵣⴰ

ⴳⴻⵏⴻⵠⴻ – ⴰⵙⴻⵇⵇⴰⵎⵓ ⵏ ⵢⵉⵣⴻⵔⴼⴰⵏ ⵏ ⵓⵎⴷⴰⵏ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵉⴳⴻⵔ-ⴷ ⵜⵉⵖⵔⵉ, ⴰⵙⵙ ⵏ ⵍⵊⴻⵎⵄⴰ, ⵉ ⵓⵛⴰⵕⴻⵄ ⵏ ⵢⵉⵎⴹⴻⴱⴱⵔⴻⵏ ⵏ ⵜⴻⵊⵔⵉⵎⵉⵏ ⵏ ⵟⵟⵔⴰⴷ ⴰⵢ ⴷ-ⵢⴻⵍⵍⴰⵏ ⴷⴻⴳ ⵡⵓⵙⵙⴰⵏ-ⵏⵏⵉ ⵏ ⵓⵜⵄⴻⴷⴷⵉ ⵉⵙⵕⴰⵢⵉⵍⵉ ⵖⴻⴼ ⵜⴻⵙⴼⵉⴼⵜ ⵏ ⵖⴻⵣⵣⴰ ⴷⴻⴳ ⵓⵏⴻⴱⴷⵓ ⵏ 2014, ⴷ ⴰⵜⵄⴻⴷⴷⵉ ⴰⵢ ⵢⴻⴳⵍⴰⵏ ⵙ 2.200 ⵏ ⵢⵉⵎⴷⴰⵏⴻⵏ ⵢⴻⵔⵏⴰ ⴰⵎⵓⵔ ⴰⵎⴻⵇⵔⴰⵏ ⵙⴻⴳ-ⵙⴻⵏ ⴷ ⵉⵖⴰⵔⵉⵎⴻⵏ. ⴷⴻⴳ ⵢⵉⵡⴻⵜ ⵏ ⵜⵏⴻⵖⵜⵓⵙⵜ ⴰⵢ ⵉⵄⴻⴷⴷⴰⵏ ⵙ ⵢⵉⵡⴻⵜ ⵏ ⵜⴻⴳⵜⵉ ⴷ ⵜⴰⵎⴻⵇⵔⴰⵏⵜ, ⴰⵙⴻⵇⵇⴰⵎⵓ-ⴰ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵢⴻⵏⵏⴰ-ⴷ ⴷ ⴰⴽⴽⴻⵏ ⵢⴻⵙⵙⴻⴼⴽ « ⴰⴽⴽ ⵉⵎⴹⴻⴱⴱⵔⴻⵏ ⴷⴻⴳ ⵓⵔⴽⴰⴹ ⵏ ⵍⵇⴰⵏⵓⵏ ⴰⵍⵙⴰⵏ ⴰⴳⵔⴰⵖⵍⴰⵏ ⴷ ⵍⵇⴰⵏⵓⵏ ⴰⴳⵔⴰⵖⵍⴰⵏ ⵏ ⵢⵉⵣⴻⵔⴼⴰⵏ ⵏ ⵓⵎⴷⴰⵏ ⴰⴷ ⵜⵜⵡⴰⵛⴰⵕⵄⴻⵏ ⵖⴻⴼ ⵡⴰⵢⴻⵏ ⴰⵢ ⴳⴰⵏ ⵙⴷⴰⵜ ⵛⵛⵕⵓⵄⴰⵜ ⵏ ⵓⵄⴰⵇⴻⴱ ⵉⵖⴻⵍⵏⴰⵡⴻⵏ ⴷ ⵢⵉⴳⵔⴰⵖⵍⴰⵏⴻⵏ, ⴷⴻⴳ ⵛⵛⵕⴻⵄ ⵉⵡⴰⵜⴰⵏ, ⴷ ⵓⵄⴷⵉⵍ ⵢⴻⵔⵏⴰ ⴷ ⵉⵎⵣⵉⵔⴻⴳ ». ⵜⴰⵏⴻⵖⵜⵓⵙⵜ-ⴰ ⵜⵇⴻⴷⴷⴻⵎ-ⵜⵜ-ⵉⴷ ⵒⴰⴽⵉⵙⵜⴰⵏ, ⵢⴻⵔⵏⴰ 45 ⵏ ⵜⵎⵓⵔⴰ ⴰⵢ ⵉⴱⴻⴷⴷⴻⵏ ⵖⴻⵔ ⵢⵉⴷⵉⵙ-ⵏⵏⴻⵙ, ⴳⴰⵔ-ⴰⵙⴻⵏⵜ ⵍⵍⴰⵏⵜ ⵓⵍⴰ ⴷ ⴼⵕⴰⵏⵙⴰ, ⵜⴰⴳⴻⵍⴷⴰ ⵢⴻⴷⴷⵓⴽⴽⵍⴻⵏ ⴷ ⵍⴰⵍⵎⴰⵏ. ⴰⵍⴰ ⵉⵡⴰⵏⴰⴽⴻⵏ ⵢⴻⴷⴷⵓⴽⵍⴻⵏ ⴷⴻⵖⵔⴻⵏ (ⴱⴱⵓⵟⵉⵏ) ⵎⴳⴰⵍ ⵜⵏⴻⵖⵜⵓⵙⵜ-ⴰ, ⵎⴰ ⴷ 5 ⵏ ⵜⵎⵓⵔⴰ ⵏⵉⴹⴻⵏ, ⴳⴰⵔ-ⴰⵙⴻⵏⵜ ⵍⵀⴻⵏⴷ ⴷ ⴽⴻⵏⵢⴰ, ⵓⴳⵍⴻⵏⵜ. ⴰⴳⴻⵏⵙⴰⵙ ⴰⴼⴰⵍⴻⵙⵟⵉⵏⵉ ⴷⴻⴳ ⵓⵙⴻⵇⵇⴰⵎⵓ-ⴰ, ⵉⴱⵔⴰⵀⵉⵎ ⴽⵀⵔⴰⵉⵙⵀⵉ, ⵢⴻⵛⴽⴻⵕ-ⴷ ⴰⵙⵄⴻⴷⴷⵉ ⵏ ⵓⴹⵔⵉⵙ-ⴰ ⴰⵢ ⴷ-ⵢⴻⵍⵍⴰⵏ ⴷ ⴰⴽⴻⵎⵎⴻⵍ ⵉ ⵓⵙⵙⵓⴼⴼⴻⵖ ⵏ ⵓⵕⴰⴱⵓⵍ-ⵏⵏⵉ ⵏ ⵜⵙⴻⵇⵇⴰⵎⵓⵜ ⵏ ⵜⵙⴻⵙⵜⴰⵏⵜ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵖⴻⴼ ⵟⵟⵔⴰⴷ ⵏ ⵖⴻⵣⵣⴰ ⴰⵢ ⴷ-ⵢⴻⵏⵏⴰⵏ ⴷ ⴰⴽⴽⴻⵏ « ⵢⴻⵣⵎⴻⵔ ⵍⵃⴰⵍ ⴰⴷ ⵉⵍⵉⵏⵜ ⵍⵍⴰⵏⵜ-ⴷ ⵜⴻⵊⵔⵉⵎⵉⵏ ⵏ ⵟⵟⵔⴰⴷ » ⴷⴻⴳ-ⵙ. ⴷⴻⴳ 29 ⵢⵓⵏⵢⵓ, ⵎⵉ ⴷ-ⵢⴻⵜⵜⵡⴰⵇⴻⴷⴷⴻⵎ ⵓⵕⴰⴱⵓⵍ-ⵏⵏⵉ, ⵜⴰⵙⴻⵍⵡⴰⵢⵜ ⵏ ⵜⵙⴻⵇⵇⴰⵎⵓⵜ, ⵎⴰⵔⵢ ⵎⵛⴳⵧⵡⴰⵏ ⴷⴰⵠⵉⵙ ⵜⵡⴻⴽⴽⴻⴷ-ⴷ ⴷ ⴰⴽⴽⴻⵏ ⵜⵉⵍⵖⴰ ⴰⵢ ⴷ-ⵢⴻⵜⵜⵡⴰⵍⴻⵇⴹⴻⵏ ⵙⵙⴽⴰⵏⴰⵢⴻⵏⵜ-ⴷ ⴷ ⴰⴽⴽⴻⵏ « ⵉⵙⵕⴰⵢⵉⵍ ⵜⴻⵔⴽⴻⴹ ⴰⵔⴽⴰⴹ ⴷ ⵓⴼⴹⵉⵃ ⵍⴻⵇⵡⴰⵏⵉⵏ ⴰⵍⵙⴰⵏⴻⵏ ⵉⴳⵔⴰⵖⵍⴰⵏⴻⵏ ⴷ ⵢⵉⵣⴻⵔⴼⴰⵏ ⵏ ⵓⵎⴷⴰⵏ ⵢⴻⵔⵏⴰ (…) ⴽⵔⴰ ⵙⴻⴳ ⵢⵉⵔⴽⴰⴹⴻⵏ-ⴰ ⴷ ⵜⵉⵊⵔⵉⵎⵉⵏ ⵏ ⵟⵟⵔⴰⴷ ». ⵓⵍⴰ ⵎⴰ ⴰⵙⴻⵇⵇⴰⵎⵓ ⵏ ⵢⵉⵣⴻⵔⴼⴰⵏ ⵏ ⵓⵎⴷⴰⵏ ⵓⵔ ⵢⴻⵙⵄⵉ ⴰⵔⴰ ⵜⴰⵣⵎⴻⵔⵜ ⴰⴷ ⵢⴰⵎⴻⵕ ⵛⵛⵕⴻⵄ ⵏ ⵓⵄⴰⵇⴻⴱ ⴰⴳⵔⴰⵖⵍⴰⵏ ⴰⴷ ⴷ-ⵢⴻⵍⵀⵓ ⵙ ⵜⴻⵎⵙⴰⵍⵜ-ⴰ, ⵜⴰⵏⴻⵖⵜⵓⵙⵜ-ⴰ ⵜⴳⴻⵔ-ⴷ ⵜⵉⵖⵔⵉ ⵉ ⵢⵉⵙⵕⴰⵢⵉⵍⵉⵢⴻⵏ ⴷ ⵢⵉⴼⴰⵍⴻⵙⵟⵉⵏⵉⵢⴻⵏ « ⴰⴽⴽⴻⵏ ⴰⴷ ⵎⵄⴰⵡⴰⵏⴻⵏ ⵙ ⵓⴱⵔⵉⴷ ⵓⵎⵎⵉⴷ ⴷⴻⴳ ⵜⵙⴻⵙⵜⴰⵏⵜ ⵏ ⵛⵛⵕⴻⵄ ⵏ ⵓⵄⴰⵇⴻⴱ ⴰⴳⵔⴰⵖⵍⴰⵏ ⴷ ⵙ ⴽⵔⴰ ⵏ ⵜⵙⴻⵙⵜⴰⵏⵜ ⵏⵉⴹⴻⵏ ⴰⵢ ⵉⵣⴻⵎⵔⴻⵏ ⴰⴷ ⵜⴻⵜⵜⵡⴰⵔⵥⴻⵎ ». ⴷⴻⴳ ⵜⵓⵎⵎⵖⵉⵡⵉⵏ ⵏ ⵓⵜⵄⴻⴷⴷⵉ ⴰⵢ ⵜⴳⴰ ⵉⵙⵕⴰⵢⵉⵍ ⵎⴳⴰⵍ ⵜⴻⵙⴼⵉⴼⵜ ⵏ ⵖⴻⵣⵣⴰ ⴷⴻⴳ 2014, ⴰⵣⴰⵍ ⵏ 2.200 ⵏ ⵢⵉⴼⴰⵍⴻⵙⵟⵉⵏⵉⵢⴻⵏ (ⴳⴰⵔ-ⴰⵙⴻⵏ 1.500 ⵏ ⵢⵉⵖⴰⵔⵉⵎⴻⵏ) ⴰⵢ ⵢⴻⵜⵜⵡⴻⵏⵖⴻⵏ ⵖⴻⴼ ⵍⴻⵃⵙⴰⴱ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⵢⴻⵔⵏⴰ ⵜⵜⵡⴰⵙⴷⴻⵔⵎⴻⵏ ⵓⴳⴰⵔ ⵏ 100.000 ⵏ ⵢⵉⵅⵅⴰⵎⴻⵏ.