Asebter amenzawi
Tatlitit: Souad Ait Salem ad tettekki deg Wuraren Ifriqiyen (timsizzelt n 5000 n yimitren)
LEZZAYER–Tadzayrit Souad Ait Salem terbeḥ deg temsizzelt n 5000 n yimitren yerna tga-d agmuḍ adday ara tt-yeǧǧen ad tettekki deg Wuraren Ifriqiyen n 2015 ara d-yilin gar 4 d 23 Ctembeṛ deg Kungu-Brazzaville, imi ay d-tewwi agmuḍ n 15 n tedqiqin, 38 n tsinin ass n ljemɛa tameddit deg Lezzayer Tamaneɣt. Aït Salem (36 n yiseggasen) tessaweḍ ɣer ugmuḍ-a deg telɣuɣa tamnaḍant n « yimeqranen », ay d-yellan deg usuddis ulimpi n Mohamed-Boudiaf. Timsizwert-a tella-d deg wakud deg ay d-yella « wass aremḍani » wis sin ay d-tessuddes Tfidiṛalit tadzayrit n tatlitit deg wayyur-a imqeddes i lmend n uɛawen n yinaddalen n tedɣert akken ad gen igmaḍ-nsen addayen ara ten-yeǧǧen ad ttekkin deg ttiɛadat ay d-yetteddun, gar-asen Uraren Ifriqiyen ara d-yilin deg wayyur n Ctembeṛ ay d-yetteddun. Ula ma aṭas n yinaddalen ay yettekkan, ɣef wakken ay d-nnan yimsuddsen, deg wass aremḍani amezwaru ay d-yellan ass n 26 Yunyu yezrin, ula d yiwen n unaddal ur yessaweḍ ɣer yigmaḍ addayen. D Ait Salem ay d tanaddalt tamezwarut ay yessawḍen ɣer ugmuḍ adday deg temsizzelt n 5000 n yimitren deg wass aremḍani wis sin. D acu kan, inaddalen niḍen mazal-asen sin n wussan niḍen deg Remḍan-a (9 d 13 Yulyu) akken ad d-gen igmaḍ addayen.
