Asebter amenzawi
Takurt n uḍar: MC Lezzayer teqqel ɣer usleɣmu, 16 n yimariren ay iḥedṛen
LEZZAYER – Taɣlamt n MC Lezzayer (Tamɣunt 1 n tkurt n uḍar n Lezzayer) tebda ass n ljemɛa tameddit asleɣmu akken ad theyyi iman-nnes i tsemhuyt n 2015-2016 n tkurt n uḍar, yerna 16 n yimariren ay iḥedṛen deg usleɣmu-a ɣer yidis n usleɣmay apuṛtugali Artur Jorge. Aṭas n yimariren n teɣlamt-a, gar-asen Karaoui d Hachoud, ur yeḥdiṛen ara deg tɣimit-a tamezwarut n usleɣmu ay d-yellan deg usarir n « Ḥeǧǧuṭ » ay d-yezgan deg usuddis ulimpi n 5 Yulyu. Azal n 100 n yimfeṛṛǧen ay d-yusan ad ten-ẓren. Imeddukal n Sid Ahmed Aouadj ad ḍefren, seg wass n lḥedd d asawen, annan n ussewjed n 10 n wussan deg Tlemsan, sakkin, ad rnun yiwen n wannan sdeffir Remḍan deg Pulunya. Seg yidis n ussidef n yimariren imaynuten, taɣlamt n MC Lezzayer tessadef-d, ar imir-a 4 n yimariren imaynuten (Marzougui, Mokdad, Bouhenna d Demmou), d acu kan, mazal ad ternu ad d-tessidef aṭas n wiyaḍ. Taɣlamt-a attan la tetteddu ad d-tessidef amenṭag agraɣlan ityupi n Al-Ahly n Lqahira, Salaheddine Said, ara d-yasen ɣer Lezzayer ass n ttlata akken ad yestenyi leɛqed-nnes d Lmuludeyya. Seg yidis-nnes, aɛessas n yiswi Jonathan Matijas yestenya leɛqed n sin n yiseggasen d Lmuludeyya, maca yessefk ad d-yawi, deg wussan ay d-yetteddun, tabṛat n uslelli sɣur USM Belɛebbas, akken ad yezmer ad yurar deg MC Lezzayer. Seg yidis niḍen, aṭas n yimariren ay yettaxren seg teɣlamt-a am Djalit, Yachir, Ouali d Aksas. Armi d ass wis 29 (d aneggaru) n telɣuɣa n Lezzayer ay tessaweḍ teɣlamt n MC Lezzayer ad teḍmen tiɣimit-nnes deg Temɣunt 1ut. Taɣlamt-a ad tebdu tasemhuyt-nnes n 2015-2016 s yiwet n temlilit d CR Belouizdad deg tgara n dduṛt n 14 d 15 ɣuct ay d-yetteddun.
