Asebter amenzawi

Amḥaddi n JSK, Djamel Benlamri, yestenya leɛqed n sin n yiseggasen d ES Sṭif

SṬIF – Amḥaddi n Yilemẓiyen Inaddalen n Leqbayel, Djamel Benlamri (25 n yiseggasen) yestenya deg yiḍ n ljemɛa d ssebt leɛqed n sin n yiseggasen d teɣlamt n ES Sṭif, uqbel ma yerna ula d Ryad Kenich, amḥaddi n USM Lḥeṛṛac, yestenya ula d netta leɛqed d teɣlamt-a deg yiḍ-nni.

Sin-a n yimḥaddiyen imaynuten n ES Sḍif qqlen-d deg umkan n Demmou d Mellouli. Demmou yedda ad yurar d MC Lezzayer, ma d Mellouli yedda ɣer Al Qadissiyah (deg Tgelda Tasaɛudit). Awwaḍ n Benalmri d Kenich d ayen ara yesǧehden tamḥaddit n Sḍif, ladɣa imi taɣlamt-a tban-d d akken ur telhi ara temḥaddit-nnes deg temlilit taneggarut n temɣunt n yilɣuɣen n Tefriqt mgal USM Lezzayer, d timlilit deg texṣer ES Sḍif s 1 ɣer 2.

Aselway n ES Sṭif, Hassen Hamar, yenna-d, deg yijifeṛ n tfugla n ustenyi, d akken assidef n yimariren imaynuten ad yeḥbes s « ustenyi n leɛqed d umarir Abdennour Hadiouche d yiwen n umenṭag agraɣlan », maca ur d-yekcif ara isem n umenṭag-a.

Mi yettwatter ɣef ma yella ES Sḍif ad d-tessidef amarir agraɣlan Abdelmoumene Djabou (umi qrib ad ifak leɛqed deg Club Africain deg Tunes, yerna yedda wawal fell-as d akken yezmer ad d-yeqqel ɣer Sṭif), Hamar yenna-d: « Djabou atan yid-neɣ », maca ur d-yerni ara ugar n ttfaṣil ɣef waya.

Aselway n teɣlamt n Sḍif yellan d talɣuɣ n Tefriqt, yenna-d d akken lexṣara mgal USM Lezzayer, ass n ssebt yerzrin, d « asehwu kan yerna ur d-igi ara ccek deg wacemma », yerna yenna-d d akken imfeṛṛǧen n teɣlamt-a « ad ssnen udem n tidet n ES Sḍif seg-a ɣef kra n wussan, asmi ara turar mgal Lɛelma » (deg wass wis sin n tegrawt B n uḥric n tegrawin n temɣunt n yilɣuɣen).

I usmekti, taɣlamt n Sḍif tessadef-d yagi 3 n yimariren iminigen, yerna wi d Fares Hachi (Grenoble, Fṛansa), Adam Tobbal (issirmen n Fulham, Langliz) d Walid Chenine (Colomiers, Fṛansa). Nnig waya, terna tessadef-d issirmen Mehdi Boubakore (ASM Wehṛan) d Miloud Rebiai (WA Tlemsan).