Asebter amenzawi
Annar n 5 Yulyu iɛawed yerẓem
LEZZAYER – Asarir n 5 Yulyu 1962 (Lezzayer Tamaneɣt) iɛawed yerẓem akken ad d-ttilint deg-s temsizewrin tiɣelnawin d tegraɣlanin, 15 n wayyuren sdeffir ma yettwamdel akken ad asent-ɛawden i tṣeddarin d tuga-nnes.
D aneɣlaf amenzu, Abdelmalek Sellal, ay ireẓmen, ass n ssebt, tadumṣuka-a tanaddalt, sdeffir ma fuken lecɣal n uṣeggem-nnes, yerna yella-d waya deg yiwet n terzi n umahil (axeddim) ay iga Mass Sellal akken ad yessefqed kra n yimukan deg twilayt n Lezzayer.
Imuhal n usarir n 5 Yulyu fuken deg 25 Yebrir yezrin, yerna d iduba inagduden ay iɣetsen ad d-ilin i lmend n uṣeggem n umkan-a sdeffir ma mmuten sin n yimfeṛṛǧen mi tedrem yiwet n tṣeddart deg 21 Ctembeṛ 2013, mi d-tella temlilit gar USM Lezzayer d MC Lezzayer. Mi d-tella tedyant-a, yettwamdel usarir n 5 Yulyu akken ad d-tili tsestant, sakkin, yebda-d umahil i uṣeggem-nnes.
Asenfar n uṣeggem n usarir-a yettunefk i tnarit n tezrawt n « Egis France » (ay d-yettgensis Jean-Marie Charelet deg Lezzayer) d yiwet n tkebbanit tagtaɣlant, China state construction engineering corporation (CSCEC).
Asarir-a yeqqel, imir-a, yesɛa ṣṣifa icebḥen ugar, yerna yettwaṣṣeggem ɣef leḥsab n yilugan n ṣṣenɛa. Iduba inagduden ḥetteten-d, ladɣa, akken ad tili tɣellist (laman) deg uṣeggem-a, ladɣa deg tṣeddarin, akken ur ttɛawadent ara ad d-ilint tedyanin niḍen yesseḥzanen am tin akken ay d-yellan yagi.
Akken ad ddun yimuhal akken iwata yerna ad ttwaqadren « yilugan n tɣellist » ay d-yettwacerḍen, aneɣlaf aqbur n waddal, Mohamed Tahmi, d umtil-nnes n tnezduɣt d uheyyi n temdint, Abdelmadjid Tebboune, rzan acḥal d tikkelt akken ad sfeqden acanṭi-a.
S waya, 2300 n tmedlin n ubiṭun ay yettwakksen seg tṣeddarin n ufella n usarir n 5 Yulyu, yerna ssersen deg umkan-nsent tiɣerɣrin ara iḍemnen ugar n tɣellist.
Gar waya d wayen niḍen, aṭas n tkebbaniyin (tidzayriyin neɣ tibeṛṛaniyin) ay d-yettekkan deg usenfar-nni, ladɣa tid ay d-yelhan d uzemmem n tṣeddarin n ufella, assersi n yikersiyen imaynuten d ussersi n yigdilen imeqranen.
Anrar n usarir-a d yifeggagen n yisunan ttwaɛawden akk, yerna ssersen-as tuga tamaynut, d tatrart yerna tcuba tin n yisariren deg ara uraren timliliyin n Euro-2016 n tkurt n uḍar deg Fṛansa. Seg yidis niḍen, ula d abrid-nni n tatlitit yella-d deg-s umahil n usselhu.
ɣef leḥsab n teɣbula tunṣibin, aḥric amezwaru n yimuhal yelha-d ladɣa d ussersi n tmedlin n ubiṭun d usseǧhed n kra n tgejda ay irefden tiṣeddarin, yerna yesqam-d uḥric-a 1,5 d amelyaṛ n yidinaṛen.
Aḥric wis sin n usenfar yesqam-d 6,678 n yimelyaṛen n yidinaṛen yerna ddan-d deg-s yimuhal uɛjilen n ussetrer. Imuhal-a ḥuzan-d aɣram n waman, assersi n tuga tamaynut, assersi n yikersiyen imaynuten, assersi n unagraw n tɛessast s tkamriwin, ttawilat d umahil n ufus.
Asarir-a yettwarẓem i tikkelt tamezwarut ass n 17 Yunyu 1972, yerna yezmer ad yawi 70.000 n yimfeṛṛǧen. Maca tazmert-a tezmer ad ternu asmi ara fakent snat n tṣeddarin timaynutin s lebni.
