Asebter amenzawi
Surya: Unesco twet-d deg usedrem n tẓuri deg Tudmur
PARIS – Tanemhalt n Unesco, Irina Bokova, tessummel-d, ass n ljemɛa, assedrem n yimuhal (ixeddimen) n tẓuri ay yellan deg temdint taqburt n Tudmur ɣef ufus n yiferdisen n tegrawt ay isemman i yiman-nnes « Awanak Islaman » (Daɛec).
« Assedrem-a amaynu n tɣawsiwin tidelsanin deg udeg n Tudmur d ayen ay d-yesskanayen takriḍt d lqella n tmussni n tegrawin timeḍḍurfa d uḥqar ay ḥeqrent imezdaɣen umkan-nni d uɣref asuri », ɣef wakken ay d-tenna Massa Bokova deg yiwen n ulɣu.
Kra n yimaslaḍen n « Uwanak Islaman » rẓan, ass n ssebt, isebdaden n tmeḍlin d usebdad mechuṛen n Yizem n Atina yellan d asebdad awḥid seg ṣṣenf-nnes yerna ɛlay ugar n 3 n yimitren, ɣef wakken ay d-yenna ass n lexmis unemhal amatu n ugezdu n tɣawsiwin n Ugles d yisalayen deg Surya.
Asebdad-a tufa-t-id deg 1977 yiwet n tuɣdaḍt tasenzikant tapulunit deg ufakan n Al-Lat yerna yettwaxdem-d deg lqern amezwaru uqbel Sidna Ɛisa.
« Taruẓi n yisebdaden-nni n tmeḍlin n Tudmur deg yiwen n umṛaḥ anagdud, sdat lɣaci deg llan yigerdan d ahanay yessagaden s taccmutit-nnes », ɣef wakken ay d-tenna Irina Bokova.
« (Isebdaden-nni) d agerruj n telɣa ɣef yiceḍḍiḍen, isɣunen, ansayen d umezruy n uɣref asuri. Taruẓi-nsen d aneɛruḍ n ugzam n wassaɣen yellan gar yiɣerfan d umezruy-nsen, d agzam-nsen seg tmagit-nsen akken ad ssiwḍen ad ten-nehṛen », ɣef wakken ay d-tenna.
Irina Bokova tɛawed tger-d tiɣri i « wakk iɣellaten n ddin, aggagen d yilemẓiyen akken ad wliwlen mgal usseqdec n ddin yerna ad d-rren ɣef wid ay yesseqdacen tikerkas akken ad zerɛen kaṛuh ».
