Asebter amenzawi

Tiwaculin tidzayriyin ttṣerrifent 8% seg umeṣruf-nsent deg yiceṭṭiḍen

LEZZAYER – Tawacult tadzayrit tettṣerrif yal aseggas 8% seg yidrimen-nnes deg yiceṭṭiḍen d yirkasen, yerna aya yewweḍ, deg tlemmast, ɣer 58.000 n yidinaṛen i useggas, ɣef leḥsab n tsestant ay d-tga Tnarit taɣelnawt n taddadanin (ONS).

Deg 2011, tiwaculin tidzayriyin ṣerrfent, s ujemmal, 363,5 n yimelyaṛen n yidinaṛen ɣef yiceḍḍiḍen d yirkasen ɣef wakken ay d-tekcef tsestant-a ɣef wayen ay ttṣerrifen Yidzayriyen deg ussuder d uswir n tmeddurt n yixxamen.

« Amur ay yettwaṣerrafen deg yiceḍḍiḍen d yirkasen yella yezmer ad d-yili meɣɣer ugar » lemmer maci d tiḥuna ay yesnuzuyen iceḍḍiḍen iqburen, ɣef wakken ay d-yenna Mass Youcef Bazizi (anemhal n taddadanin tinmettiyin d yimedxulen deg ONS) i Tnegga n Yisalan n Lezzayer.

Talemmast n wanect ay tettṣerrif twacult tadzayrit deg yiceḍḍiḍen d yirkasen tuweḍ ɣer 58.021 yidinaṛen. S wawal niḍen, tawacult tadzayrit tettṣerrif, deg tlemmast, 4.835 n yidinaṛen i wayyur deg yiceḍḍiḍen d yirkasen, yerna yal amdan deg twacult yettwaṣerraf fell-as azal n 9.900 n yidinaṛen i wayyur, ɣef leḥsab n tsestant-a.