Asebter amenzawi

Arraz Ameqran Amaḍlan n tkurt tamafagt: Lezzayer texṣer mham Miksik (2-3)

LEZZAYER – Timaririn tidzayriyin xeṣrent, ass n ssebt, mgal Miksik, deg wass wis sin n uḥric wis sin n tuzzya n uheyyi n Warraz Ameqran Amaḍlan n tkurt tamafagt n tlawin 2015 (tagrawt tis 3, Q), ay d-yellan gar 3 d 5 Yulyu deg tzeɣɣa n Umeɣrus Tahar-Belakhdar deg Ccraga (Lezzayer Tamaneɣt). Timlilit-a tfuk s « tie-break » yerna d Miksik ay tt-irebḥen s 3 n yiḥricen ɣer 2 (20-25, 25-22, 14-25, 25-21, 13-15).

I usmekti, taɣlamt n Lezzayer terbeḥ, ass n ssebt, tin n Ustṛalya s 3 ɣer 2. D acu kan, deg temlilit-a mgal Miksik, Tidzayriyin ur bdint ara urar mliḥ, yerna Timiksikiyin furṣent seg tuccḍiwin n teɣlamt tadzayrit, ladɣa deg uniwel d temḥaddit.

D Timiksikiyin ay irebḥen aḥric amezwaru s 25 ɣer 20.

Deg uḥric wis sin, Tidzayriyen refdent-d iman-nsent s wurar d afessas, am wakken ay sneqsent seg tuccḍiwin. D aya ay tent-yeǧǧan ad rebḥent aḥric-nni s ugmuḍ n 25 ɣer 22.

Sakkin, tamḥaddit n Lezzayer tella-d txuṣṣ cwiṭ yerna timaririn timiksiyin, ladɣa Andrea Rangel d Dulce Carranza, ssawḍent ad ssidfent aṭas n tenqiḍin. D aya ay yeǧǧan Miksik ad ternu ad terbeḥ aḥric wis 3 s 25 ɣer 14.

Deg uḥric wis 4, yerna s ussebɣes n ugdud n yimfeṛṛǧen, Tidzayriyin ssawḍent ad rebḥent aḥric-nni s 25 ɣer 21, yerna gant-d « tie-break ».