Asebter amenzawi

Aseggas deffir tummɣa tisṛayilit, imezdaɣen n Ɣezza atni deg tegnit n twaɣit

LEZZAYER – Imezdaɣen n Ɣezza, yellan d tamnaḍt tigellilt yerna teččuṛ d lɣaci, mazal-iten nḍerren seg tergult ay d-tḥettem fell-asen Isṛayil 9 n yiseggasen aya, yerna afmiḍi n trebbawt (ṣṣumaj) deg temnaḍt-a d yiwen seg yimeqranen akk deg umaḍal, ma d tagnit n waṭas n medden tuweḍ ɣer uswir n twaɣit, aseggas sdeffir ma mmɣen yiserdasen Isṛayiliyen fell-asen deg Yulyu n 2014.

Targult-a ay d-yettwaḥettmen deg Yunyu n 2006, tudef aseggas-nnes wis 9, texneq imezdaɣen n Ɣezza yerna simal la tettkemmil la tgellu s tmeddurin n medden ay yeddren deg tegnit n twaɣit. I usmekti, 1,8 d amelyun n Yifalesṭiniyen ay izedɣen deg Ɣezza yerna nḍerren mliḥ seg wasmi ay tɛeddan fell-asen yiserdasen isṛayiliyen aseggas yezrin. Imḍanen ara d-nefk swadda-a ttwaddmen-d seg uṛabul n 14 Yunyu 2015 yerna sskanayen-d ixeṣṣaren ayyes ay d-tegla tergult-a:

ɣef leḥsab n Tbanka tamaḍlant, targult-a taqesḥant tessenqes afaris agensi azegzaw (PIB) n Ɣezza s 50% seg wasmi ay d-yella utɛeddi aserdasi n unebdu yezrin, yerna tamnaḍt-a teqqel ur tessaǧaw acemma ɣer uzɣar. Afmiḍi n trebbawt (ṣṣumaj) yuweḍ ɣer 44%, iɛedda i 60% ɣer yilemẓiyen yerna « ulac ccek, d netta ay d afmiḍi ameqran akk deg umaḍal », ɣef leḥsab n Tbanka Tamaḍlant. Nnig waya, 80% seg yimezdaɣen n wakal n Ɣezza ay yeddren s lemɛawna tagraɣlant, yerna ugar n 40% seg-en ddren ddaw umnaṛ n lexṣaṣ.

Tettwaḥṛes tlelli n tikli n yimdanen

ɣef leḥsab n uṛabul n 2015, 535 n yimuḍinen ifalesṭiniyen, gar-asen 86 n yigerdan, umi ur d-yettunefk ara ttesriḥ akken ad dawin beṛṛa i Ɣezza deg 2014. 160 n yimuḍinen niḍen, gar-asen 16 n yigerdan, umi ur d-yettunefk ara ttesriḥ deg 2015.

Azal n 550 n yinelmaden umi ur d-yettunefk ara ttesriḥ akken ad ɛeddin i tenqiḍt n uɛeddi n Beit Hanoun (Erez) akken ad kemmlen tizrawin-nsen deg tesdawiyin tibeṛṛaniyin seg 2014 ar ass-a. Nnig waya, azal n 30.000 n Yifalesṭiniyen, gar-asen llan yimuḍinen d yinelmaden, ay mazal ttṛajun ad ɛeddin ɣer Maṣer seg tenqiḍt n uɛeddi n Rafah yellan d tanqiḍt n uɛeddi tawḥidt n Ɣezza ur yellin ddaw udabu n Isṛayil.

Lḥeṛs ɣef ussidef n ttawil n lebni

Isṛayil teḥṛes mliḥ aǧaw n ttawilat n lebni ɣer Ɣezza, yerna gar ttawilat-a yella ugerrac d yijdi, ifeggagen n wuzzal d usiman, d tiɣawsiwin ay yessefken i uɛawed n lebni n temnaḍt-a sdeffir ma tɛeddan fell-as yiserdasen isṛayiliyen deg unebdu yezrin. Afmiḍi n wadaf n ttawilat n lebni yuweḍ ɣer 0,2%, yerna s unya am wa, Ɣezza teḥwaǧ ugar n lqern akken ad tɛawed ad tettwabnu. I usmekti, atɛeddi isṛayili ɣef temnaḍt-a yegla s tmeddurt n 2.200 n Yifalesṭiniyen yerna yessedrem qrib akk tidumṣukiwin n Ɣezza.

Daɣ, 17.600 n twaculin ay mazal ur sɛint ixxamen imi ay asen-ttwasdermen yixxamen-nsen deg tummɣa tisṛayilit n 2014.

Lḥeṛs ɣef yiṣeyyaden n yiselman

Iṣeyyaden n yiselman sɛan ttesriḥ ad sbeɛden kan 6 n yimilen deg lebḥeṛ, yili tamnaḍt n ṣṣyada n yiselman deg-s 20 n yimilen ɣef wakken ay d-yettwabder deg Yimtawayen n Oslo n 1993. Tagriwa tisṛayilit teḍḍef 58 n yiṣeyyaden sdaxel talast-nni n 6 n yimilen deg 2014, yerna teḍḍef 13 niḍen deg 4 n wayyuren imezwura n 2015.

Azal n 1.400 n yiṭunen n yiselman ay yettwaxṣaren yal aseggas ɣef lǧal n lḥeṛs ɣef temnaḍt n ṣṣyada n yiselman deg Ɣezza, yerna d aya ay as-yessexṣaren 26 n yimelyunen n yidulaṛen i tdamsa n Ɣezza yal aseggas.

Adram n tdamsa n Ɣezza

72% seg lluzinat n Ɣezza ay iɣelqen seg 2007 ɣef lǧal n lḥeṛs aqesḥan ay d-yellan ɣef waǧaw n sselɛa seg uzɣar, yerna qrib ulac akk ayen ay la ssaǧawen seg Ɣezza. Assiǧew yenger qrib akk deg Ɣezza yerna axeddim n lluzinat yenqes s 60%. Ifellaḥen ay yesɛan akal deg « Temnaḍt n wadaf yettwalessesen » (Access Restricted Areas, ARA), ladɣa akal ay ibeɛden 300 n yimitren ɣef uɣrab Isṛayili, yettwagdel-asen ad adfen ɣer wakal-nsen, yerna win ara ẓren din yiserdasen isṛayiliyen, ad qerrsen fell-as akken ad t-nɣen. Yuɣ lḥal, 35% seg wakal iṣelḥen i tfellaḥt deg Ɣezza yezga-d deg temnaḍin timihawin deg zemren ad ttwenɣen Yifalesṭiniyen.

Adram n ttawilat n ufraq d ussizdeg n waman

Tasfift n Ɣezza ur tesɛi ara tiɣbula tigamanin yerna seg zik ay tt-xuṣṣen waman. Iɣlane Yeddukklen ɛeyynen-d yagi d akken tamnaḍt-a ad teqqel « ur yezmir win ara yeddren deg-s » seg-a ɣef semmus n yiseggasen –yerna amgaru n 2014 yessedrem akk tamnaḍt tamgurant ay yellan, yagi, meẓẓiyet. Sdeffir ma yettwaḍḍef wakal n Ɣezza, azgen seg wakal ay iṣelḥen i tfellaḥt d 85% seg teɣbula n yiselman qqlen Yifalesṭiniyen ur zmiren ad awḍen ɣer-sent (Iɣlanen Yeddukklen, aṛabul n 2012).

Nnig waya, 90 n yimelyunen n llitrat n waman yumsen (yerna ttwasekkren asekker ur yemmiden ara) ay yettenɣalen seg Ɣezza ɣer Yilel Agrakal ɣef lǧal n ugzam n trisiti d lexṣaṣ n ttawilat n lebni d tceqqufin n ubeddel i tmacinin n ussizdeg n waman yumsen. 97% seg waman ay yettwafraqen deg uẓeḍḍa n tɣiwant ur ṣliḥen ara i tissit.

Tilɣa-a ttwaleqḍent-d seg Tuddsa tamaḍlant n tdawsa deg 24 Mayu 2015, seg uɣlif afalesṭini n tɣawsiwin tiɣarimin deg 2 Yunyu 2015 d Tnarit n ussemyuddes n tɣawsiwin talsanin (OCHA) n Yiɣlanen Yeddukklen.

Sɣur Fatiha KHALEF