Asebter amenzawi

Yerna waǧaw n yirden d temẓin seg tmura n beṛṛa deg 5 n wayyuren imezwura n 2015

LEZZAYER – Aǧaw n yimendi (irden, timẓin d ukbal) yuweḍ ɣer 1,65 d amelyaṛ n yidulaṛen deg semmus n wayyuren imezwura n 2015, yili deg 2014, aǧaw deg semmus n wayyuren imezwura yesqam-d 1,45 d amelyaṛ n yidulaṛen. S waya, aǧaw yerna s 14,04% aseggas-a ɣef wakken ay d-tenna tedwant tadzayrit i Tnegga n Yisalan n Lezzayer.

Tasmekta ay d-yettwaǧwen tuweḍ ɣer 4,99 n yimelyunen n yiṭunen gar Yennayer d Mayu yezrin, yili deg 2014, 4,87 n yimelyunen n yiṭunen ay d-yettwaǧwen i tallit-nni, ɣef wakken ay d-yenna Wammas aɣelnaw n usselɣu d taddadanin n tedwant (CNIS).

Tafatuṛt n waǧaw n yirden tuweḍ ɣer 1,15 d amelyaṛ n yidulaṛen, yili aseggas yezrin, ttwaǧwen-d 975,11 n yimelyunen n yidulaṛen n yirden deg tallit-nni. S waya, aǧaw n yirden yerna s 18,56%.

Ula d tasmekta n yimendi terna, imi ay d-ttwaǧwen 3,66 n yimelyunen n yiṭunen n yimendi s ujemmal, yili aseggas yezrin ttwaǧwen-d 3,66 n yimelyunen n yiṭunen deg tallit-nni n gar Yennayer d Mayu. S waya, tasmekta n waǧaw terna s 21,34%.

Ttwaǧwen-d 435,98 n yimelyunen n yidulaṛen n yirden iquranen (886.764 n yiṭunen), yili deg 2014, ttwaǧwen-d 281,98 n yimelyunen n yidulaṛen (723.935 n yiṭunen). S waya, azal n waǧaw n yirden iquranen yernza s 54,61%.

Tafatuṛt n waǧaw n yirden ileqqaqen tesqam-d 720,15 n yimelyunen n yidulaṛen (2,77 n yimelyunen n yiṭunen, yili ilindi tesqam-d 693,12 n yimelyunen n yidulaṛen (2,29 n yimelyunen n yiṭunen) gar Yennayer d Mayu. Azal n waǧaw n yirden ileqqaqen yerna s 4% yerna tasmekta-nnes terna s 21%.

Deg wayen yerzan akbal (zzerriɛa d wayen niḍen), ttwaǧwen-d 398,47 n yimelyunen n yidulaṛen (1,93 d amelyun n yiṭunen), yili deg 5 n wayyuren imezwura n 2014, ttwaǧwen-d 394,27 n yimelyunen n yidulaṛen (1,56 d amelyun n yiṭunen), yerna azal n waǧaw-a yerna s 1,07%.

Deg wayen yerzan timẓin, Lezzayer tuǧew-d 96,34 n yimelyunen n yidulaṛen (396.830 n yiṭunen), yili deg 5 n wayyuren imezwura n 2014, ttwaǧwen-d 78,36 n yimelyunen n yidulaṛen (286.098 n yiṭunen). S waya, azal n waǧaw n temẓin yerna s 23%.

Deg 2014, tafatuṛt n waǧaw n yimendi tuweḍ ɣer 3,54 n yimelyaṛen n yidulaṛen, yerna terna s 12% ɣef leḥsab n 2013.

Aneɣlaf n tfellaḥt d tneflit n tmurt, Abdelkader Kadi, yenna-d, seg melmi kan, mi d-tebda tḥemla n tmegra d usserwet, d akken ula ma tagnit n tegnewt tella-d diri-tt aseggas-a, lɣella n yimendi ad taweḍ, lemmer d lebɣi, ɣer 43 n yimelyunen n yiqenṭaren, yili deg 2014, tefka-d 35 n yimelyunen n yiqenṭaren. S waya, lɣella n yimendi ad ternu s 20%.

Taḥemla n tmegra d usserwet n useggas-a ad d-tḥaz tajumma tamatut n 3,3 n yimelyuen n yiqeṭṭaren, gar-asen 1,5 d amelyun n yiqeṭṭaren i yirden iquranen, amelyun n yiqeṭṭaren i temẓin, 600.000 n yiqeṭṭaren i yirden ileqqaqen d 100.000 n yiqeṭṭaren i uẓekkun.

Iduba inagduden bɣan ad rnun afares n yimendi akken ad yaweḍ ɣer 69,9 n yimelyunen n yiqenṭaren deg 2019.

Timerniwt-a n lɣella ad d-tili ladɣa s tmerniwt n tjumma n wakal ay la yettwasswayen. Yuɣ lḥal, assway yerna iḥuza-d amelyun n yiqeṭṭaren n wakal deg sfulluḥen imendi. Nnig waya, yerna daɣ usseqdec n leɣbar, n zzerriɛat yettwasleknen d tmacinin n tfellaḥt.