ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵜⴰⴷⵓⴽⵍⵉ ⵜⴰⴼⵔⵉⵇⵉⵜ ⴰⴷ ⵜⵄⴰⵇⴻⴱ ⵉⵎⴹⴻⴱⴱⵔⴻⵏ ⵉⵙⴻⵔⵜⵉⵢⴻⵏ ⵉⴱⵓⵔⵓⵏⴷⵉⵢⴻⵏ ⴰⵢ ⵢⴻⵜⵜⴻⴽⴽⴰⵏ ⴷⴻⴳ ⵜⴻⴽⵔⵉⴹⵜ

ⴰⴷⴷⵉⵙ ⴰⴱⴻⴱⴰ – ⴰⵙⴻⵇⵇⴰⵎⵓ ⵏ ⵜⴰⵍⵡⵉⵜ ⴷ ⵜⵖⴻⵍⵍⵉⵙⵜ ⵏ ⵜⴷⵓⴽⵍⵉ ⵜⴰⴼⵔⵉⵇⵉⵜ ⵜⴻⵏⵏⴰ-ⴷ « ⵜⵄⴻⵡⵡⴻⵍ ⴰⴷ ⵜⴻⴷⴷⴻⵎ ⴰⴽⴽ ⵉⵃⴻⵣⵣⵉⴱⴻⵏ ⴰⵢ ⵢⴻⵙⵙⴻⴼⴽⴻⵏ » ⴰⴽⴽⴻⵏ ⴰⴷ ⵜⵄⴰⵇⴻⴱ ⵙ ⴽⵔⴰ ⵏ ⵢⵉⵎⴹⴻⴱⴱⴻⵔ ⴰⵙⴻⵔⵜⵉ ⴰⴱⵓⵔⵓⵏⴷⵉ ⴰⵢ ⵍⴰ ⵢⴻⵜⵜⴳⴻⵏ ⵜⵉⵖⴰⵡⵙⵉⵡⵉⵏ « ⴰⵔⴰ ⵢⴻⵙⵎⴻⵏⴷⴳⴻⵏ ⵜⵉⵎⴻⵙ ⵏ ⵜⴻⴽⵔⵉⴹⵜ ⵢⴻⵔⵏⴰ ⴰⴷ ⵜⴻⵔⴳⴻⵍ ⴰⴱⵔⵉⴷ ⵉ ⵜⵉⴼⵔⴰⵜ ⵜⴰⵙⴻⵔⵜⵉⵜ ⵉ ⵜⴰⵍⵓⴼⵜ-ⴰ ».

ⴰⵙⴻⵇⵇⴰⵎⵓ ⵏ ⵜⴰⵍⵡⵉⵜ ⴷ ⵜⵖⴻⵍⵍⵉⵙⵜ ⵢⴻⵏⵏⴰ-ⴷ, ⴷⴻⴳ ⵢⵉⵡⴻⵏ ⵏ ⵓⵍⵖⵓ ⴰⵙⵙ ⵏ ⵍⴻⵜⵏⵉⵢⴻⵏ ⴷ ⴰⴽⴽⴻⵏ « ⵢⴻⵛⵖⴻⴱ-ⵉⵜ ⵡⴰⵎⴻⴽ ⴰⵢ ⵍⴰ ⵜⴻⵜⵜⴻⴷⴷⵓ ⵜⴻⴳⵏⵉⵜ ⴷⴻⴳ ⴱⵓⵔⵓⵏⴷⵉ », ⵍⴰⴷⵖⴰ ⵎⵉ ⵖⴻⵜⵙⴻⵏ ⵢⵉⴷⵓⴱⴰ ⵉⴱⵓⵔⵓⵏⴷⵉⵢⴻⵏ « ⴰⴷ ⵙⵙⵓⴷⴷⴻⵏ ⵜⵉⴼⵔⴰⵏⵉⵏ ⵜⵉⵡⴰⵎⵏⵉⵢⵉⵏ ⴷ ⵜⴷⵉⴳⴰⵏⵉⵏ ⴰⵙⵙ ⵏ 29 ⵢⵓⵍⵢⵓ, ⵓⵍⴰ ⵎⴰ ⵜⴰⴷⵓⴽⵍⵉ ⵜⴰⴼⵔⵉⵇⵉⵜ ⴷ ⵓⵎⵖⵉⵡⴰⵏ ⵏ ⵜⴻⴼⵔⵉⵇⵜ ⵏ ⵓⴳⵎⵓⴹ ⴳⵔⴻⵏ-ⴷ ⵜⵉⵖⵔⵉ ⴰⴽⴽⴻⵏ ⴰⴷ ⵜⵜⵡⴰⵡⴻⵅⵅⵔⴻⵏⵜ ».

ⴰⵙⴻⵇⵇⴰⵎⵓ-ⴰ ⵢⴻⵏⵏⴰ-ⴷ ⴷⴰⵖ ⴷ ⴰⴽⴽⴻⵏ « ⵜⴻⵛⵖⴻⴱ-ⵉⵜ ⵜⴻⴳⵏⵉⵜ ⵜⴰⵡⴻⵄⵕⴰⵏⵜ ⴷⴻⴳ ⵍⵍⴰⵏ ⵢⵉⵎⴷⴰⵏⴻⵏ ⵖⴻⴼ ⵍⴵⴰⵍ ⵏ ⵜⴻⵣⵖⵉⵏⵜ ⴰⵢ ⵍⴰ ⴷ-ⵢⴻⵜⵜⵉⵍⵉⵏ ⵓⵙⵙⴰⵏ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵜⵜⵡⴰⴱⴷⴻⵔ ⴷⴻⴳ ⵓⴹⵔⵉⵙ-ⵏⵏⵉ.

ⴷⴻⴳ ⵢⴻⴱⵔⵉⵔ ⵢⴻⵣⵔⵉⵏ, ⵜⵉⵎⵎⴰⵣⵡⴻⵔⵜ ⵏ ⵒⵉⴻⵔⵔⴻ ⵏⴽⵓⵔⵓⵏⵣⵉⵣⴰ ⵖⴻⵔ ⵜⴻⴼⵔⴰⵏⵉⵏ ⵏ 15 ⵢⵓⵍⵢⵓ ⵜⴻⵜⵜⵡⴰⵇⴱⴻⵍ ⵙ ⵓⴱⵔⵉⴷ ⵓⵏⵚⵉⴱ, ⵢⵉⵍⵉ ⵢⴻⵜⵜⵡⴰⴼⵔⴻⵏ ⵢⴰⴳⵉ ⴷⴻⴳ 2005 ⴷ 2010. ⴷⵖⴰ ⴷ ⴰⵢⴰ ⴰⵢ ⴷ-ⵢⴻⵙⵏⴻⴽⵔⴻⵏ ⵜⵉⵎⴻⵙⴱⴰⵏⵉⵢⵉⵏ ⴷ ⵜⵉⵎⴻⵇⵔⴰⵏⵉⵏ, ⴷ ⵜⵉⴷ ⴰⵢ ⵜⴻⵎⵃⴻⵇ ⵜⴻⵎⵙⵓⵍⵜⴰ ⵙ ⵢⵉⵖⵉⵍ.

ⵙⴻⴳ ⵡⴰⵙⵎⵉ ⴰⵢ ⴷ-ⵜⴻⴱⴷⴰ ⵜⴻⵣⵖⵉⵏⵜ, ⴰⵣⴰⵍ ⵏ 70 ⵏ ⵎⴻⴷⴷⴻⵏ ⴰⵢ ⵢⴻⵎⵎⵓⵜⴻⵏ ⵢⴻⵔⵏⴰ ⵓⴳⴰⵔ ⵏ 140.000 ⵏ ⵢⵉⴱⵓⵔⵓⵏⴷⵉⵢⴻⵏ ⴰⵢ ⵉⵔⴻⵡⵍⴻⵏ ⵖⴻⵔ ⵜⵎⵓⵔⴰ ⵜⵉⵏⴰⵔⴰⴳⵉⵏ (ⵜⵉⵊⵉⵔⴰⵜⵉⵏ) ⵏ ⵕⵡⴰⵏⴷⴰ, ⵜⴰⵏⵣⴰⵏⵢⴰ ⴷ ⵜⴻⴳⴷⵓⴷⴰ ⵜⴰⵎⴻⴳⴷⴰⵢⵜ ⵏ ⴽⵓⵏⴳⵓ ⴰⴽⴽⴻⵏ ⴰⴷ ⵔⴻⵡⵍⴻⵏ ⵉ ⵜⴻⴳⵏⵉⵜ-ⴰ ⵉⵅⴻⵚⵔⴻⵏ.

ⴰⴷⴰⴱⵓ ⵏ ⴱⵓⵔⵓⵏⴷⵉ ⵢⴻⵙⵡⴻⵅⵅⴻⵔ ⵛⵡⵉⵟ ⵜⵉⴼⵔⴰⵏⵉⵏ ⵏ ⵓⵎⵏⵉ ⴷ ⵜⵖⵉⵡⴰⵏⵉⵏ, ⵎⴰⵛⴰ ⵢⵓⴳⵉ ⴰⴷ ⵢⴻⵔⵏⵓ ⴰⴷ ⵜⴻⵏⵜ-ⵢⴻⵙⵡⴻⵅⵅⴻⵔ ⵉⵎⵉ ⴰⵢ ⴷ-ⵢⴻⵏⵏⴰ ⴷ ⴰⴽⴽⴻⵏ ⵓⵔ ⵢⴻⴱⵖⵉ ⴰⵔⴰ ⴰⴷ ⴷ-ⵢⵉⵍⵉ ⵢⵉⵍⴻⵎ ⴷⴻⴳ ⵜⵙⵓⴷⴰ, ⵢⴻⵔⵏⴰ ⵜⴰⵙⴻⵍⵡⵉⵜ ⵏ ⵒⵉⴻⵔⵔⴻ ⵏⴽⵓⵔⵓⵏⵣⵉⵣⴰ ⴰⴷ ⵜⴼⴰⴽ ⴷⴻⴳ 26 ⵖⵓⵛⵜ.

ⵉⵎⵉ ⴰⵢ ⵢⴻⵙⵙⵖⴻⵔ ⵓⴷⴰⴱⵓ ⵏ ⴱⵓⵔⵓⵏⴷⵉ ⵉⵖⴻⴼ-ⵏⵏⴻⵙ, ⴰⵎⵖⵉⵡⴰⵏ ⴰⴳⵔⴰⵖⵍⴰⵏ ⵙ ⵍⴻⴽⵎⴰⵍ-ⵏⵏⴻⵙ ⵢⴻⵊⴱⴻⴷ ⵉⵎⴰⵏⴰⵢⴻⵏ-ⵏⵏⴻⵙ ⵏ ⵜⴻⴼⵔⴰⵏⵉⵏ, ⵎⴻⵏⵖⵉⵔ ⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ. ⵉⴳⵎⴰⴹ ⵏ ⵜⴻⴼⵔⴰⵏⵉⵏ ⵏ ⵓⵎⵏⵉ ⴷ ⵜⵖⵉⵡⴰⵏⵉⵏ ⵡⴻⵔⵄⴰⴷ ⵓⵔ ⴷ-ⴼⴼⵉⵖⴻⵏ, ⵎⴰⵛⴰ ⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵜⵜⵡⴰⵍⵉⵏ ⴷ ⴰⴽⴽⴻⵏ ⵓⵍⴰ ⵎⴰ ⴼⴼⵖⴻⵏ-ⴷ, ⵓⵔ ⵚⵍⵉⵃⴻⵏ ⴰⵔⴰ.

ⵉⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⵙⵙⵓⵜⵔⴻⵏ, ⵙⴻⴳ ⵢⵉⴷⵉⵙ ⵏⵉⴹⴻⵏ, ⴰⴷ ⴷ-ⵢⵉⵍⵉ « ⵓⵏⴰⴱⴰⴹ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ », ⴰ ⵡⵉⵏ ⵢⴻⴱⵖⵓⵏ ⵢⴻⵔⴱⴻⵃ ⴷⴻⴳ ⵜⴻⴼⵔⴰⵏⵉⵏ, ⵢⴻⵔⵏⴰ ⴰⵏⴰⴱⴰⴹ-ⴰ ⴰⴷ ⴷ-ⵢⴻⵙⵙⴻⴳⵔⴻⵡ « ⴰⵎⴰ ⴷ ⵡⵉⴷ ⴰⵢ ⵢⴻⵜⵜⴻⴽⴽⴰⵏ, ⴰⵎⴰ ⴷ ⵡⵉⴷ ⵓⵔ ⵢⴻⵜⵜⴻⴽⴽⴰⵏ ⴷⴻⴳ ⵜⴻⴼⵔⴰⵏⵉⵏ ».