Asebter amenzawi

Tadukli Tafriqit ad tɛaqeb imḍebbren isertiyen iburundiyen ay yettekkan deg tekriḍt

ADDIs ABEBA – Aseqqamu n talwit d tɣellist n Tdukli Tafriqit tenna-d « tɛewwel ad teddem akk iḥezziben ay yessefken » akken ad tɛaqeb s kra n yimḍebber aserti aburundi ay la yettgen tiɣawsiwin « ara yesmendgen times n tekriḍt yerna ad tergel abrid i tifrat tasertit i taluft-a ».

Aseqqamu n talwit d tɣellist yenna-d, deg yiwen n ulɣu ass n letniyen d akken « yecɣeb-it wamek ay la tetteddu tegnit deg Burundi », ladɣa mi ɣetsen yiduba iburundiyen « ad ssudden tifranin tiwamniyin d tdiganin ass n 29 Yulyu, ula ma Tadukli Tafriqit d Umɣiwan n Tefriqt n Ugmuḍ gren-d tiɣri akken ad ttwawexxrent ».

Aseqqamu-a yenna-d daɣ d akken « tecɣeb-it tegnit taweɛṛant deg llan yimdanen ɣef lǧal n tezɣint ay la d-yettilin ussan-a », ɣef wakken ay d-yettwabder deg uḍris-nni.

Deg Yebrir yezrin, timmazwert n Pierre Nkurunziza ɣer tefranin n 15 Yulyu tettwaqbel s ubrid unṣib, yili yettwafren yagi deg 2005 d 2010. Dɣa d aya ay d-yesnekren timesbaniyin d timeqranin, d tid ay temḥeq temsulta s yiɣil.

Seg wasmi ay d-tebda tezɣint, azal n 70 n medden ay yemmuten yerna ugar n 140.000 n Yiburundiyen ay irewlen ɣer tmura tinaragin (tijiratin) n Ṛwanda, Tanzanya d Tegduda Tamegdayt n Kungu akken ad rewlen i tegnit-a ixeṣren.

Adabu n Burundi yeswexxer cwiṭ tifranin n umni d tɣiwanin, maca yugi ad yernu ad tent-yeswexxer imi ay d-yenna d akken ur yebɣi ara ad d-yili yilem deg tsuda, yerna taselwit n Pierre Nkurunziza ad tfak deg 26 ɣuct.

Imi ay yessɣer udabu n Burundi iɣef-nnes, amɣiwan agraɣlan s lekmal-nnes yejbed imanayen-nnes n tefranin, menɣir Iɣlanen Yeddukklen. Igmaḍ n tefranin n umni d tɣiwanin werɛad ur d-ffiɣen, maca Iɣlanen Yeddukklen ttwalin d akken ula ma ffɣen-d, ur ṣliḥen ara.

Iɣlanen Yeddukklen ssutren, seg yidis niḍen, ad d-yili « unabaḍ n tdukli taɣelnawt », a win yebɣun yerbeḥ deg tefranin, yerna anabaḍ-a ad d-yessegrew « ama d wid ay yettekkan, ama d wid ur yettekkan deg tefranin ».