ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⵎⴰⵍⵉ: ⴰⵙⴻⵇⵇⴰⵎⵓ ⵏ ⵓⴹⴼⴰⵔ ⵏ ⵓⵎⵜⴰⵡⴰ ⵏ ⵜⴰⵍⵡⵉⵜ ⴰⴷ ⵢⴻⵇⵇⴻⵍ ⵖⴻⵔ ⵓⵅⴻⴷⴷⵉⵎ ⴷⴻⴳ 20 ⵢⵓⵍⵢⵓ

ⴱⴰⵎⴰⴽⵧ – ⴰⵙⴻⵇⵇⴰⵎⵓ ⵏ ⵓⴹⴼⴰⵔ ⵏ ⵓⵎⵜⴰⵡⴰ ⵏ ⵜⴰⵍⵡⵉⵜ ⴷ ⵓⵎⵙⵓⵖⴰⵍ ⴷⴻⴳ ⵎⴰⵍⵉ ⴰⴷ ⵢⴻⵇⵇⴻⵍ ⵖⴻⵔ ⵓⵎⴰⵀⵉⵍ (ⴰⵅⴻⴷⴷⵉⵎ) ⴷⴻⴳ 20 ⵢⵓⵍⵢⵓ ⴰⵢ ⴷ-ⵢⴻⵜⵜⴻⴷⴷⵓⵏ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⴰⵙⵙ ⵏ ⵜⵜⵍⴰⵜⴰ ⵓⵏⴻⵟⵟⴰⵇ ⵏ ⵜⵙⴻⵎⵢⵓⴷⴷⴻⵙⵜ ⵏ ⵢⵉⵎⵓⵙⵙⴰ ⵏ ⵓⵣⴰⵡⴰⴷ (ⵛⵎⴰ), ⵎⴰⵀⴰⵎⴰⴷⵧⵓ ⴷⵊⴻⵔⵢ ⵎⴰⵉⴳⴰ.

ⴰⵙⴻⵇⵇⴰⵎⵓ-ⴰ ⴰⵢ ⵜⴻⵙⵙⴻⵍⵡⴰⵢ ⵍⴻⵣⵣⴰⵢⴻⵔ « ⵢⴻⵃⴱⴻⵙ ⴰⵎⴰⵀⵉⵍ-ⵏⵏⴻⵙ ⵖⴻⴼ ⵍⴵⴰⵍ ⵏ ⵡⵓⴳⵓⵔⴻⵏ ⵏ ⵓⴳⴻⵏⵙⴻⵙ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷⴰⴽⴽⴻⵏ « ⴰⵙⵙⴻⴼⵄⴻⵍ ⵏ ⵓⵎⵜⴰⵡⴰ-ⴰ ⵢⴻⵙⵙⴻⴼⴽ ⴰⴷ ⵜ-ⴳⴻⵏ ⵢⵉⴷⵉⵙⴰⵏ ⴰⵢ ⵢⴻⵙⵜⴻⵏⵢⴰⵏ ⴰⵎⵜⴰⵡⴰ ⴰⵎ ⵜⵙⴻⵎⵢⵓⴷⴷⴻⵙⵜ ⵏ ⵢⵉⵎⵓⵙⵙⴰ ⵏ ⵓⵣⴰⵡⴰⴷ, ⵜⵉⵖⴻⵔⵖⴻⵔⵜ ⴷ ⵓⵏⴰⴱⴰⴹ ⵏ ⵎⴰⵍⵉ ».

ⵖⴻⴼ ⵍⴻⵃⵙⴰⴱ ⵏ ⵎⴰⵙⵙ ⵎⴰⵉⴳⴰ, ⵢⴻⵍⵍⴰⵏ ⴷⴰⵖ ⴷ ⴰⵏⵎⴰⵣⵓⵍ ⵏ ⵓⵙⴻⵍⵡⴰⵢ ⵏ ⵓⵎⵓⵙⵙⵓ ⴰⵖⴻⵍⵏⴰⵡ ⵏ ⵓⵙⵍⴻⵍⵍⵉ ⵏ ⵓⵣⴰⵡⴰⴷ (ⵎⵏⵍⴰ), « ⵉⵃⴰⵔ ⵍⵃⴰⵍ » ⴰⴷ ⵢⴻⵜⵜⵡⴰⵙⵙⴻⴼⵄⴻⵍ ⵓⵎⵜⴰⵡⴰ ⵏ ⵜⴰⵍⵡⵉⵜ ⴷ ⵓⵎⵙⵓⵖⴰⵍ ⴰⵢ ⴷ-ⵢⴻⵍⵍⴰⵏ ⵙⴻⴳ ⵓⴽⴰⵍⴰ ⵏ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ ⵢⴻⵔⵏⴰ ⵢⴻⵇⵇⴻⵍ ⴷ ⵏⴻⵜⵜⴰ ⴰⵢ ⴷ ⴰⴱⵔⵉⴷ ⵉ ⴼⴻⵔⵔⵓ ⵏ ⵜⴰⵍⵓⴼⵜ, ⵍⴰⴷⵖⴰ ⵉⵎⵉ « ⴰⴷ ⵍⴰ ⴷ-ⵜⵜⵉⵍⵉⵏⵜ ⵜⵅⴰⵣⴰⴱⵉⵢⵉⵏ ⵜⵉⵔⴻⴱⵔⴰⴱⵉⵏ ⴷ ⵜⵉⴷ ⵏ ⵢⵉⵖⴰⵍⵍⴻⵏ ⵏ ⵜⵉⵍⵍⴰⵙ ⴰⵢ ⵢⴻⵙⵄⴰⵏ ⴰⵀⵉⵍ ⵏⵉⴹⴻⵏ ⵎⴻⵏⵖⵉⵔ ⵡⵉⵏ ⵏ ⵜⴰⵍⵡⵉⵜ ».

« ⵎⵉ ⴰⵔⴰ ⵢⴻⵜⵜⵡⴰⵙⵙⴻⴼⵄⴻⵍ ⵓⵎⵜⴰⵡⴰ-ⴰ, ⴰⴷ ⴼⵔⵓⵏ ⴰⴽⴽ ⵡⵓⴳⵓⵔⴻⵏ-ⴰ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵟⵟⴰⵇ ⵏ ⵜⵙⴻⵎⵢⵓⴷⴷⴻⵙⵜ ⵏ ⵢⵉⵎⵓⵙⵙⴰ ⵏ ⵓⵣⴰⵡⴰⴷ (ⵛⵎⴰ).

ⵙⴻⴳ ⵢⵉⴷⵉⵙ ⵏⵉⴹⴻⵏ, ⵢⴻⵏⵏⴰ-ⴷ ⴷⴰⴽⴽⴻⵏ « ⴰⵏⴰⴱⴰⴹ ⵏ ⵎⴰⵍⵉ ⴷ ⵜⵙⴻⵎⵢⵓⴷⴷⴻⵙⵜ ⵏ ⵢⵉⵎⵓⵙⵙⴰ ⵏ ⵓⵣⴰⵡⴰⴷ ⵓⵔ ⵜⵜⵄⴻⴹⴹⵉⵍⴻⵏ ⴰⵔⴰ ⴰⴷ ⴷ-ⴱⵔⵓⵏ ⵉ ⵡⴰⴽⴽ ⵉⵎⴻⵃⴱⴰⵙ ⴰⵢ ⵢⴻⴹⴹⴻⴼ ⵢⴰⵍ ⵉⴷⵉⵙ ⵉ ⵡⴰⵢⴻⴹ », ⵎⴰⵛⴰ ⵓⵔ ⴷ-ⵢⴻⴼⴽⵉ ⴰⵎⴹⴰⵏ ⵏ ⵢⵉⵎⴻⵃⴱⴰⵙ-ⴰ.

« ⴰⵢⴰ ⴰⴽⴽⴻⵏ ⴰⴷ ⴷ-ⵏⴻⵙⵙⴽⴻⵏ ⴷⴰⴽⴽⴻⵏ ⴰⵇⵍ-ⴰⵖ ⴷⴻⴳ ⵓⴱⵔⵉⴷ ⵏ ⵜⴰⵍⵡⵉⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ, ; ⴰⵎ ⵡⴰⴽⴽⴻⵏ ⴰⵢ ⴷ-ⵢⴻⵔⵏⴰ ⴷⴰⴽⴽⴻⵏ ⴰⵙⵍⴻⵍⵍⵉ-ⴰ « ⵓⵔ ⵢⴻⵔⵣⵉ ⴰⵔⴰ ⵉⵔⴻⴱⵔⴰⴱⴻⵏ ».

« ⴰⵇⵍ-ⴰⵖ ⵏⴻⵎⵙⴻⴼⵀⴰⵎ ⴷ ⵓⵏⴰⴱⴰⴹ ⵢⴻⵔⵏⴰ ⵉⵎⴰⵙⵍⴰⴹⴻⵏ-ⵏⵏⴻⵙ ⵜⵜⵡⴰⵍⵉⵏ ⵜⵉⵖⴰⵡⵙⵉⵡⵉⵏ ⴰⴽⴽⴻⵏ ⴰⴷ ⵜⴻⵏⵜ-ⵏⴻⵜⵜⵡⴰⵍⵉ. ⵙⵄⴰⵏ ⵍⴻⴱⵖⵉ ⴰⴽⴽⴻⵏ ⴰⴷ ⴳⴻⵏ ⵜⴰⵍⵡⵉⵜ ⵢⴻⵔⵏⴰ ⵓⵍⴰ ⴷ ⵏⴻⴽⴽⵏⵉ ⵏⴻⴱⵖⴰ ⴰⵢⴰ. ⵜⵜⵡⴰⵍⵉⵖ ⴷⴰⴽⴽⴻⵏ ⵜⴰⵍⵡⵉⵜ ⴰⴷ ⴷ-ⵜⴻⴼⴼⴻⵖ ⵖⴻⵔ ⵜⵉⵍⴰⵡⵜ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⵎⴰⵉⴳⴰ.

ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⴳⴻⵏⵙⴻⵙ ⵏ ⵜⵙⴻⵎⵢⵓⴷⴷⴻⵙⵜ ⵏ ⵢⵉⵎⵓⵙⵙⴰ ⵏ ⵓⵣⴰⵡⴰⴷ ⴷⴻⴳ ⵓⴷⴰⴱⵓ, ⵎⴰⵙⵙ ⵎⴰⵉⴳⴰ ⵢⴻⵏⵏⴰ-ⴷ ⴷⴰⴽⴽⴻⵏ « ⵢⴻⵙⵙⴻⴼⴽ ⴰⴷ ⵏⴻⵜⵜⵡⴰⴳⴻⵏⵙⴻⵙ, ⵓⵍⴰ ⵎⴰ ⴰⵢⴰ ⵎⴰⵛⵉ ⴷ ⵛⵛⴻⵔⴹ ⴷⴻⴳ ⵓⵙⵙⴻⴼⵄⴻⵍ ⵏ ⵓⵎⵜⴰⵡⴰ. ⴷ ⴰⵛⵓ ⴽⴰⵏ, ⵓⵔ ⵏⴻⵙⵙⵓⵜⴻⵔ ⴰⵔⴰ ⵉⵖⵍⵉⴼⴻⵏ ⵉⴱⴰⵏⴻⵏ. ⵏⴻⵏⵏⴰ-ⴷ ⴽⴰⵏ ⴰⴷ ⵏⴻⵎⵛⵉⵡⴻⵕ ⴷ ⵓⵏⴰⴱⴰⴹ ⵖⴻⴼ ⴱⴻⴹⴹⵓ ⵏ ⵓⴷⴰⴱⵓ », ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵓⵏⴻⵟⵟⴰⵇ ⵏ ⵜⵙⴻⵎⵢⵓⴷⴷⴻⵙⵜ ⵏ ⵢⵉⵎⵓⵙⵙⴰ ⵏ ⵓⵣⴰⵡⴰⴷ.