Asebter amenzawi

Mali: Aseqqamu n uḍfar n umtawa n talwit ad yeqqel ɣer uxeddim deg 20 Yulyu

BAMAKO – Aseqqamu n uḍfar n umtawa n talwit d umsuɣal deg Mali ad yeqqel ɣer umahil (axeddim) deg 20 Yulyu ay d-yetteddun, ɣef wakken ay d-yenna ass n ttlata uneṭṭaq n Tsemyuddest n Yimussa n Uzawad (CMA), Mahamadou Djery Maiga.

Aseqqamu-a ay tesselway Lezzayer « yeḥbes amahil-nnes ɣef lǧal n wuguren n ugenses », ɣef wakken ay d-yenna, am wakken ay d-yerna dakken « assefɛel n umtawa-a yessefk ad t-gen yidisan ay yestenyan amtawa am Tsemyuddest n Yimussa n Uzawad, tiɣerɣert d unabaḍ n Mali ».

ɣef leḥsab n Mass Maiga, yellan daɣ d anmazul n uselway n Umussu aɣelnaw n uslelli n Uzawad (MNLA), « iḥar lḥal » ad yettwassefɛel umtawa n talwit d umsuɣal ay d-yellan seg ukala n Lezzayer Tamaneɣt yerna yeqqel d netta ay d abrid i ferru n taluft, ladɣa imi « ad la d-ttilint txazabiyin tirebrabin d tid n yiɣallen n tillas ay yesɛan ahil niḍen menɣir win n talwit ».

« Mi ara yettwassefɛel umtawa-a, ad frun akk wuguren-a », ɣef wakken ay d-yenna uneṭṭaq n Tsemyuddest n Yimussa n Uzawad (CMA).

Seg yidis niḍen, yenna-d dakken « anabaḍ n Mali d Tsemyuddest n Yimussa n Uzawad ur ttɛeḍḍilen ara ad d-brun i wakk imeḥbas ay yeḍḍef yal idis i wayeḍ », maca ur d-yefki amḍan n yimeḥbas-a.

« Aya akken ad d-nessken dakken aql-aɣ deg ubrid n talwit », ɣef wakken ay d-yenna, ; am wakken ay d-yerna dakken aslelli-a « ur yerzi ara irebraben ».

« Aql-aɣ nemsefham d unabaḍ yerna imaslaḍen-nnes ttwalin tiɣawsiwin akken ad tent-nettwali. Sɛan lebɣi akken ad gen talwit yerna ula d nekkni nebɣa aya. Ttwaliɣ dakken talwit ad d-teffeɣ ɣer tilawt », ɣef wakken ay d-yenna Mass Maiga.

Deg wayen yerzan agenses n Tsemyuddest n Yimussa n Uzawad deg udabu, Mass Maiga yenna-d dakken « yessefk ad nettwagenses, ula ma aya maci d ccerḍ deg ussefɛel n umtawa. D acu kan, ur nessuter ara iɣlifen ibanen. Nenna-d kan ad nemciweṛ d unabaḍ ɣef beḍḍu n udabu », ɣef wakken ay d-yenna uneṭṭaq n Tsemyuddest n Yimussa n Uzawad.