Asebter amenzawi
CARE tebder-d 5 n yibriden ara yeǧǧen Lezzayer ad tnewweɛ tadamsa-nnes
LEZZAYER – Tawinest n tigawt d uxemmem ɣef tkebbanit (CARE) tebder-d ass n tlata 5 n yibriden ara yeǧǧen ad d-yili unewweɛ deg tdamsa taɣelnawt yerna ad tenqes tagelt ɣer yiserɣa (apitṛul d lgaz).
Mouloud Hedir, ay d-yessawlen deg yiwen n usarag n uskasi ɣef « Tsemmeskal tidamsanen ay yessefken ad d-ilint s tɣawla akken ur d-tettili tezɣint », yenna-d d akken anqas n ssuma n upitṛul yebda la d-igellu s lateṛ ɣef tdamsa taɣelnawt imi ay tebda tmurt la tettṣerrif nnig wanect ay la d-tessadaf, yerna amgerrad-a yezmer ad yaweḍ ɣer 51% deg tgara n 2015. I usmekti, Mass Hedir d ademmas yerna d amaslaḍ seg CARE.
Dima deg temsalt-a, leɣrama ay d-yettadfen seg upitṛul tezmer ad tenqes s 33%, ula ma idrimen ay d-yettekken seg leɣrama ad rnun, a win yufan, s 33% deg tgara n useggas-a ma yella ssuma n upitṛul teqqim akken ay tella imir-a, ɣef leḥsab n ucari ay d-iga Mass Hedir s usseqdec n taddadanin tunṣibin.
Deg tegnit am ta, iduba izuyaz yessefk ad d-ssezgen s tɣawla tasertit tadamsant n tmurt akken ur d-tettili ara tezɣint tadamsant. Dɣa deg temsalt-a, Mass Hedir yessumer-d 5 n yibriden ara yeǧǧen ad d-yili unewweɛ deg tdamsa taɣelnawt.
ɣef leḥsab-nnes, « yessefk ad yettwassenqes uɛawen deg ssumat n yiserɣa cwiṭ, cwiṭ, yerna idrimen n yiburṣyunen yessefk ad ttwawehhin i wid ay ten-yeḥwaǧen s tidet, idrimen n yisseftiyen inagduden yessefk ad d-ttwagmen seg teɣbula yemgerraden yerna ad yettwasseqdec ssuq n tedrimt d tbankiwin i lmend n waya, yessefk ad yettwassebɣes ussefti usrid abeṛṛani, ad yettwasselhu unezwu n yiweẓla yerna ad teqqel tmurt tjebbed-d assefti, am wakken ay yessefk ad d-teg tmurt lqanun amaynu n ussefti yerna, deg tgara, yessefk ad yettwasselhu yerna ad yettwassetrer ussuddes n tnezzut tabeṛṛanit ».
Idmrimen ay iwejden d tukksa n ḍḍlaba n tmurt d snat n tɣawsiwin yelhan ay yessefk ad ten-tfaṛes Lezzayer akken « ad d-tebdu aneweɛ-a, maca yessefk ad texdem s tɣawla yerna deg unrar », ɣef wakken ay d-iḥettet.
Seg yidis-nnes, aselway CARE, Slim Athmani, iḥettet-d deg tgermant-nnes d akken yessefk « ad d-yeqqel laman gar tedbelt tadzayrit d yimeggiyen idamsanen yerna ad mɛawanen akken ad sfeɛlen tisuddsin n tneflit d unnerni ».
eg yidis niḍen, yessumer-d uselway n CARE ad d-rren ttesriḥ i tkebbaniyin akken ad d-ḍebbrent idrimen seg ssuq agraɣlan akken ad tenqes teɛkemt d umihi ɣef tbankiwin n tmurt.
