Asebter amenzawi

Ddula tɛewwel ad teg ayen iwatan akken ad d-teqqel lɛafya ɣer Tɣerdayt

TAƔERDAT – Aneɣlaf amenzu Abdelmalek Sellal iwekked-d ass n lexmis deg Tɣerdayt d akken awanak (ddula) iɛewwel akken ad yedden iḥezziben iwatan akken ad ifak akk leṣnaf n tekriḍt deg temnaḍt-a yerna ad d-yerr lɛafya d talwit deg-s.

Mass Sellal yenna-d aya deg yiwen n umyager ay iga d yimaslaḍen n tmetti taɣarimt, udmawen yettwassnen d yimasnagen (lɛuqqal) n twilayt n Tɣerdayt, yerna iɛawed iwekked-d d akken ad yesseḥbiber ɣef ussefɛel n yiḥezziben ay yeddem uselway n tegduda, Abdelaziz Bouteflika, i lmend n yiriri n tɣellist (laman), talwit d umtawa anmetti deg temnaḍt n Tɣerdayt ay yellan, zik, d « amedya n umtawa anmetti ayyes tella tettzuxxu Lezzayer ».

Aneɣlaf amenzu yesmekti-d, s tewzel, iḥezziben ay yeddem uselway n tegduda, yerna yenna-d d akken amenzaḍ n temnaḍt taserdasit tis 4 yettwakellef akken « ad yeḍfer lecɣal n yimeẓla (ssrabes) n tɣellist d yiduba idiganen akken ad d-rren lɛafya yerna ad ḥerzen taɣellist n yimdanen d wayla-nsen deg wakk timnaḍin n twilayt n Tɣerdayt ».

Mass Sellal iger-d tiɣri i wakk timetti taɣarimt, amussu n tiddukliwin d yilemẓiyen akken ad sdukklen iɣallen-nsen akken « ad reglen abrid i wid ay yebɣan ad swaɣen Tadukli Taɣelnawt ».

« Lezzayer d yiwet yerna teddukkel, ur tbeḍḍu », ɣef wakken ay d-yenna Uneɣlaf amenzu ay d-yernan d akken talast-a ur yessefk ad tt-iɛeddi yiwen yerna aɣref adzayri yeẓra azal ay ixelleṣ akken ad yeslelli tamurt-nnes seg ussehres yerna ad yeḥrez tadukli n wakal-nnes.

Amenzaḍ n temnaḍt taserdasit tis 4 ttunefkent-as akk tzemmar, s uqader n leqwanin n tegduda, akken ad d-yerr lɛafya. Dɣa tettwagdel tuffɣa deg yiḍ, yerna ttwagedlen tmesbaniyin d yimsegrawen, ɣef wakken ay d-yesmekti.

Aneɣlaf amenzu iger-d tiɣri i wakk iḥricen n tmetti deg twilayt n Tɣerdayt akken ad mɛawanen i uḥraz n lɛafya d tuqqla n talwit d lehna ɣer temnaḍt-a.

« Nekkni akk d Idzayriyen, yessefk ad nedder lwaḥid deg umsefham yerna ad nesseḥbiber ɣef tegmat d umqader », ɣef wakken ay d-iwekked.

Aneɣlaf amenzu ddan yid-s, deg terzi-a, uneɣlaf n teɣdemt, amenzaḍ n temsetla taɣelnawt d umenzaḍ n temnaḍt taserdasit tis 4, yerna yenna-d, deg terzi-a d akken « awanak ad yessefɛel lewṣayat n uselway n tegduda s tidet yerna s lewɛaṛa akken ad ifak urkaḍ n lqanun deg wakk timnaḍin n twilayt n Tɣerdayt, ladɣa atɛeddi ɣef tɣellist n yimdanen d wayla ».

Mass Sellal iɛawed iwekked-d d akken dduṛ n unabaḍ netta d aḍman d usseḥbiber ɣef urkad n tmurt d tneflit tadamsant deg temnaḍin yemgerraden n tmurt, am wakken ay d-iger tiɣri i yimezdaɣen n Tɣerdayt akken ad ḍefren abrid n tesnagt d umsefham akken ad frun taluft-a.

Uqbel aya, aneɣlaf amenzu yesselwi, mi yuweḍ ɣer Tɣerdayt, ɣer yidis n yiduba ay terza temsalt, yiwet n temlilit n uqeyyem n tegnit n tɣellist deg twilayt s uḥdaṛ n yiɣef n temnaḍt taserdasit tis 4.

Tirzi n uneɣlaf amenzu, Abdelmalek Sellal, ɣef Tɣerdayt, tella-d deg ukatar n ussefɛel n yiɣtasen ay yeddem ass n laṛebɛa uselway n tegduda, Abdelaziz Bouteflika, mi iga timlilit tuɛjilt ɣef tegnit deg tella Tɣerdayt, d timlilit deg iɣef n tmurt iweṣṣa aneɣlaf amenzu « ad yesseḥbiber, ɣef yidis n uneɣlaf n teɣdemt, akken ccṛeɛ ad d-yelhu s tidet yerna s lewɛaṛa d wakk irkaḍen n lqanun deg wakk timnaḍin n twilayt n Tɣerdayt, ladɣa deg wayen yerzan atɛeddi ɣef tɣellist n yimdanen d wayla ».

Mass Sellal yuwey yid-s yiwet n tmagla deg yella uneɣlaf n teɣdemt, Tayeb Louh, d ujiniṛal n tfekka n yigen, amenzaḍ n temsetla taɣelnawt, Ahmed Boustila.

I usmekti, aneɣlaf n tɣawsiwin n daxel d tmezdayin tidiganin, Nourredine Bedoui, yerza yagi ass n laṛebɛa ɣef Tɣerdayt ɣer yidis n unemhal amatu n tɣellist taɣelnawt, ajiniṛal-amajuṛ Abdelghani Hamel, d yiɣef n yiɣallen n temsetla taɣelnawt, ajiniṛal Bouba Menad.