ⴰⵙⴻⴱⵜⴻⵔ ⴰⵎⴻⵏⵣⴰⵡⵉ

ⴰⵏⴻⵖⵍⴰⴼ ⵏ ⵚⵚⵢⴰⴷⴰ ⵢⴻⴱⵖⴰ ⴰⴷ ⵜⴻⵣⵔⴻⵄ ⵜⴽⴻⵙⵙⴰⵡⵜ ⵏ ⵢⵉⵙⴻⵍⵎⴰⵏ ⴷⴻⴳ ⵜⵡⵉⵍⴰⵢⵉⵏ ⵢⴻⵎⴳⴻⵔⵔⴰⴷⴻⵏ

ⴱⵓⵎⴻⵔⴷⴰⵙ – ⴰⵏⴻⵖⵍⴰⴼ ⵏ ⵚⵚⵢⴰⴷⴰ ⴷ ⵜⴻⵖⴱⵓⵍⴰ ⵏ ⵢⵉⵙⴻⵍⵎⴰⵏ, ⵙⵉⴷ ⴰⵀⵎⴻⴷ ⴼⴻⵔⵔⵧⵓⴽⵀⵉ, ⵢⴻⵏⵏⴰ-ⴷ ⴰⵙⵙ ⵏ ⵍⴻⵅⵎⵉⵙ ⴷⴻⴳ ⴱⵓⵎⴻⵔⴷⴰⵙ ⴷⴰⴽⴽⴻⵏ ⵉⵙⵡⵉ ⵏ ⵓⵖⵍⵉⴼ-ⵏⵏⴻⵙ, ⴷⴻⴳ ⵓⵖⴰⵡⴰⵙ ⵏ ⵙⴻⵎⵎⵓⵙ (5) ⵏ ⵢⵉⵙⴻⴳⴳⴰⵙⴻⵏ ⴰⵢ ⵍⴰ ⴷ-ⵢⴻⵜⵜⵉⵍⵉⵏ ⵉⵎⵉⵔ-ⴰ (2015-2019) ⵏⴻⵜⵜⴰ ⴷ ⴰⵣⵔⴰⵄ ⵏ ⵜⴽⴻⵙⵙⴰⵡⵜ ⵏ ⵢⵉⵙⴻⵍⵎⴰⵏ ⴷⴻⴳ ⵜⵡⵉⵍⴰⵢⵉⵏ ⵢⴻⵎⴳⴻⵔⵔⴰⴷⴻⵏ ⵏ ⵜⵎⵓⵔⵜ, ⵓⵍⴰ ⴷⴻⴳ ⵜⵉⴷ ⵏ ⵓⵏⵥⵓⵍ.

ⵙ ⵢⵉⵙⵡⵉ-ⴰ, ⴰⵖⵍⵉⴼ ⵏ ⵚⵚⵢⴰⴷⴰ ⵍⴰ ⵢⴻⵙⵙⴻⴼⵔⴰⵢ ⴰⴷ ⵢⴻⵙⵙⴻⴵⵀⴻⴷ ⴰⴼⴰⵔⴻⵙ ⵏ ⵢⵉⵙⴻⵍⵎⴰⵏ ⵏ ⵜⴽⴻⵙⵙⴰⵡⵜ ⵢⴻⵔⵏⴰ ⴰⴷ ⴳⴳⵜⴻⵏ ⵍⴻⵚⵏⴰⴼ ⵏ ⵢⵉⵙⴻⵍⵎⴰⵏ ⴰⴽⴽⴻⵏ ⴰⴷ ⵢⴻⵄⴵⴻⴱ ⵡⴰⵢⴰ ⵉⵎⴻⵛⵜⵓⵔⴰ, ⵖⴻⴼ ⵡⴰⴽⴽⴻⵏ ⴰⵢ ⴷ-ⵢⴻⵏⵏⴰ ⵎⴰⵙⵙ ⴼⴻⵔⵔⵧⵓⴽⵀⵉ ⴷⴻⴳ ⵢⵉⵊⵉⴼⴻⵕ ⵏ ⵢⵉⵡⴻⵜ ⵏ ⵜⴻⵔⵣⵉ ⵖⴻⴼ ⵜⵡⵉⵍⴰⵢⵜ ⵏ ⴱⵓⵎⴻⵔⴷⴰⵙ ⴰⵢⴷⴻⴳ ⴰⵢ ⵢⴻⵙⵙⴻⴼⵇⴻⴷ ⴽⵔⴰ ⵏ ⵜⴻⵎⵚⵓⴽⵉⵡⵉⵏ ⴷ ⵢⵉⵙⴻⵏⴼⴰⵔⴻⵏ ⴰⵢ ⵢⴻⵇⵇⵏⴻⵏ ⵖⴻⵔ ⵓⵃⵔⵉⵛ-ⵏⵏⴻⵙ ⴷⴻⴳ ⵜⵖⵉⵡⴰⵏⵉⵏ ⵏ ⵢⵉⵔⵉ ⵏ ⵍⴻⴱⵃⴻⵕ ⵏ ⵜⵡⵉⵍⴰⵢⵜ-ⴰ.

ⴰⵏⴻⵖⵍⴰⴼ ⵢⴻⵣⵡⴰⵔ ⵙⴻⴳ ⵓⵙⴰⴳⴻⵏ (ⵍⵎⴻⵔⵚⴰ) ⵏ ⴷⴻⵍⵍⴻⵙ, ⴷⴻⴳ ⵓⴳⵎⵓⴹ (ⵛⵛⴻⵔⵇ) ⵏ ⵜⵡⵉⵍⴰⵢⵜ, ⴰⵏⴷⴰ ⴰⵢ ⵢⴻⵙⵙⴻⴼⵇⴻⴷ ⴰⵙⴻⵏⴼⴰⵔ ⵏ ⵓⵚⴻⴳⴳⴻⵎ ⵏ ⵓⵖⴻⵔⴱⴰⵣ ⵏ ⵓⵙⵙⵉⵍⴻⵖ ⴷⴻⴳ ⵚⵚⴻⵏⵄⴰⵜ ⵏ ⵚⵚⵢⴰⴷⴰ ⵏ ⵍⴻⴱⵃⴻⵕ, ⴷ ⴰⵙⴻⵏⴼⴰⵔ ⴰⵢ ⴷ-ⵢⴻⵙⵇⴰⵎⴻⵏ 8 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵉⵏⴰⵕⴻⵏ. ⴰⵖⴻⵔⴱⴰⵣ-ⴰ ⴰⴷ ⵢⴻⵜⵜⵡⴰⵇⵇⴻⵏ ⵖⴻⵔ ⵓⵙⵓⴷⵓ ⴰⵖⴻⵍⵏⴰⵡ ⵉⵎⵉⵏⴻⴳ ⵏ ⵚⵚⵢⴰⴷⴰ ⴷ ⵜⴽⴻⵙⵙⴰⵡⵜ ⵏ ⵢⵉⵙⴻⵍⵎⴰⵏ.

ⴷⴻⴳ ⵓⵎⴽⴰⵏ-ⵏⵏⵉ, ⴳⴰⵏ-ⴰⵙ-ⴷ ⵢⵉⵎⴹⴻⴱⴱⵔⴻⵏ ⵉⴷⵉⴳⴰⵏⴻⵏ ⴰⵏⴻⵙⴽⵉⵏ ⵖⴻⴼ ⵢⵉⵔⵎⵓⴷⴻⵏ ⵏ ⵚⵚⵢⴰⴷⴰ ⵏ ⵢⵉⵙⴻⵍⵎⴰⵏ ⴷⴻⴳ ⵜⵡⵉⵍⴰⵢⵜ ⵏ ⴱⵓⴻⵎⵔⴷⴰⵙ ⴷ ⵓⵙⴻⵏⴼⴰⵔ ⵏ ⵓⵙⵙⴻⵎⵖⴻⵔ ⵏ ⵓⵙⴰⴳⴻⵏ. ⵙⴻⴳ ⵢⵉⴷⵉⵙ ⵏⵉⴹⴻⵏ, ⵢⴻⴹⴼⴻⵔ ⵓⵏⴻⵖⵍⴰⴼ ⵢⵉⵡⴻⵏ ⵏ ⵓⵏⴻⵙⴽⵉⵏ ⵖⴻⴼ ⵍⴻⴱⵏⵉ ⵏ ⵓⵔⴰⵣⵓⵖ ⵉ ⵚⵚⵢⴰⴷⴰ ⵏ ⵍⴻⴱⵃⴻⵕ ⴷⴻⴳ ⵜⴻⵎⴷⵉⵏⵜ ⵏ ⵍⵇⵓⵙ ⵓⵔ ⵢⴻⴱⵄⵉⴷⴻⵏ ⴰⵔⴰ ⴰⵟⴰⵙ ⵖⴻⴼ ⴷⴻⵍⵍⴻⵙ.

ⴷⴻⴳ ⵜⵖⵉⵡⴰⵏⵜ ⵏ ⵢⵉⵖⴻⴼ ⵏ ⵊⴻⵏⵏⴰⴷ, ⵎⴰⵙⵙ ⴼⴻⵔⵔⵧⵓⴽⵀⵉ ⵢⴻⵙⵙⴻⵔⵙ ⴰⵥⵔⵓ ⴰⵎⴻⵣⵡⴰⵔⵓ ⴷⴻⴳ ⵍⴻⴱⵏⵉ ⵏ ⵢⵉⵡⴻⵜ ⵏ ⵜⵏⴻⴳⵎⴻⵔⵜ (ⵙⵙⵓⵇ ⵏ ⵓⵊⴻⵎⵎⴰⵍ ⵏ ⵢⵉⵙⴻⵍⵎⴰⵏ), ⴷ ⴰⵙⴻⵏⴼⴰⵔ ⴰⵔⴰ ⴷ-ⵉⵏⴻⴽⵔⴻⵏ 40 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵉⵏⴰⵕⴻⵏ. ⵙⴰⴽⴽⵉⵏ, ⵢⴻⵙⵙⴻⴼⵇⴻⴷ ⵢⵉⵡⴻⵜ ⵏ ⵜⵏⴻⵥⵥⵓⵜ ⵜⵓⵙⵍⵉⴳⵜ ⴰⵢ ⵢⴻⵎⵎⵓⵣⵣⴳⴻⵏ ⴷⴻⴳ ⵜⴽⴻⵙⵙⴰⵡⵜ ⵏ ⵢⵉⵙⴻⵍⵎⴰⵏ ⴷⴻⴳ ⵜⵎⴻⴷⵡⵉⵏ ⵏ ⵓⵙⵙⵡⴰⵢ ⵏ ⵜⴼⴻⵍⵍⴰⵃⵜ. ⵜⵉⵎⴻⴷⵡⵉⵏ-ⴰ ⵙⵄⴰⵏⵜ 3 ⵏ ⵢⵉⵙⴻⴳⴳⴰⵙⴻⵏ ⴰⵢⴰ ⵙⴻⴳ ⵡⴰⵙⵎⵉ ⴰⵢ ⵍⴰ ⴽⴻⵙⵙⴻⵏ ⴷⴻⴳ-ⵙⴻⵏⵜ ⵉⵙⴻⵍⵎⴰⵏ ⵢⴻⵔⵏⴰ ⵍⵖⴻⵍⵍⴰ-ⵏⵙⴻⵏⵜ ⵜⵓⵡⴻⴹ ⵖⴻⵔ 10 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵟⵓⵏⴻⵏ ⵉ ⵓⵙⴻⴳⴳⴰⵙ.

ⴰⵏⴻⵖⵍⴰⴼ ⵢⴻⵙⵙⴻⵇⵙⴰ ⵖⴻⴼ ⵓⵙⴻⵏⴼⴰⵔ ⵏ ⵓⵀⴻⵢⵢⵉ ⵏ ⵡⴰⵙⵓⵏ ⵏ ⵢⵉⵔⵎⵓⴷⴻⵏ ⵏ ⵚⵚⴻⵏⵄⴰⵜ ⵏ ⵚⵚⵢⴰⴷⴰ ⴷⴻⴳ ⵣⴻⵎⵎⵓⵔⵉ, ⵙⴰⴽⴽⵉⵏ ⵢⴻⵙⵜⴻⵏⵢⴰ ⵢⵉⵡⴻⵏ ⵏ ⵓⵎⵜⴰⵡⴰ ⴰⵢⴷⴻⴳ ⵢⵉⵡⴻⵜ ⵏ ⵜⵏⴻⴳⵎⴻⵔⵜ ⵏ ⵓⵙⵙⴻⵏⵣⵉ ⵏ ⵢⵉⵙⴻⵍⵎⴰⵏ ⵙ ⵓⵊⴻⵎⵎⴰⵍ ⴰⴷ ⵜⴻⵇⵇⴻⵍ ⴰⴷ ⵜⵜ-ⵜⴻⵙⵙⴻⴼⵔⴰⴽ ⵜⴽⴻⴱⴱⴰⵏⵉⵜ ⵏ ⵓⵙⵙⴻⴼⵔⴻⴽ ⵏ ⵢⵉⵙⵓⴳⴰⵏ ⵏ ⵍⴷⵣⴰⵢⴻⵔ. ⵉ ⵓⵉⵙⵎⴻⴽⵜⵉ, ⵜⵉⵏⴻⵎⴳⴻⵔⵜ-ⴰ ⵙⴻⴳ ⵎⴻⵍⵎⵉ ⴽⴰⵏ ⴰⵢ ⵜⴻⵜⵜⵡⴰⵜⴻⵡⵡⴻⵍ.

ⴷⵉⵎⴰ ⴷⴻⴳ ⵜⵖⵉⵡⴰⵏⵜ-ⴰ, ⴰⵏⴻⵖⵍⴰⴼ ⵢⴻⵔⵣⴰ ⵖⴻⴼ ⵢⵉⵡⴻⵜ ⵏ ⵜⴽⴻⴱⴱⴰⵏⵉⵜ ⴰⵢ ⵢⴻⵎⵎⵓⵣⵣⴳⴻⵏ (ⵢⴻⵜⵅⴻⵚⵚⴻⵚⴻⵏ) ⴷⴻⴳ ⵓⵖⵔⴰⴼ ⵏ ⵜⵜⴰⵡⵉⵍ ⵏ ⵚⵚⵢⴰⴷⴰ ⵏ ⵍⴻⴱⵃⴻⵕ, ⴷ ⵢⵉⵡⴻⵜ ⵏ ⵜⴽⴻⴱⴱⴰⵏⵉⵜ ⴰⵔⴰ ⵢⴻⵎⵎⵓⵣⵣⴳⴻⵏ ⴷⴻⴳ ⵓⵊⴻⵍⵍⴻⵍ ⴷ ⵓⵖⵔⴰⴼ ⵏ ⵢⵉⵙⴻⵍⵎⴰⵏ ⵏ ⵜⴻⴱⵡⴰⴹⵜ. ⵜⴰⴽⴻⴱⴱⴰⵏⵉⵜ-ⴰ ⵜⴰⵏⴻⴳⴳⴰⵔⵓⵜ ⵓⵔ ⵜⴻⵜⵜⵄⴻⴹⴹⵉⵍ ⴰⵔⴰ ⴰⴷ ⵜⴻⴱⴷⵓ ⴰⵎⴰⵀⵉⵍ (ⴰⵅⴻⴷⴷⵉⵎ).

ⴷⴻⴳ ⵜⵏⴻⵇⵍⴻⵜ (ⴼⵉⴳⵓⵉⴻⵔ), ⴷⴻⴳ ⵜⵖⵉⵡⴰⵏⵜ ⵏ ⴱⵓⵎⴻⵔⴷⴰⵙ, ⵎⴰⵙⵙ ⴼⴻⵔⵔⵧⵓⴽⵀⵉ ⵢⴻⴱⴷⴰ-ⴷ ⴰⵙⴻⵏⴼⴰⵔ ⵏ ⵍⴻⴱⵏⵉ ⵏ ⵜⵏⴻⴳⵎⴻⵔⵜ ⵉ ⵓⵙⵙⴻⵏⵣⵉ ⵏ ⵢⵉⵙⴻⵍⵎⴰⵏ ⵙ ⵓⴼⴻⵚⵚⴻⵍ. ⴰⵙⴻⵏⴼⴰⵔ-ⴰ ⴰⴷ ⴷ-ⵢⴻⵏⴽⴻⵔ 25 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⴷⵉⵏⴰⵕⴻⵏ, ⵢⴻⵔⵏⴰ ⵍⴻⴱⵏⵉ-ⵏⵏⴻⵙ ⵢⵓⴷⴻⴼ ⴷⴻⴳ ⵓⴽⴰⵜⴰⵔ ⵏ ⵡⴰⵀⵉⵍ ⵏ ⵓⵙⵙⵎⴰⴷ ⵏ 2014.