Asebter amenzawi
Asettef n FIFA: Lezzayer teqqel-d ɣer 20 n tmura timezwura deg umaḍal
ZURICH – Lezzayer terbeḥ-d 2 n yimukan yerna tuweḍ-d ɣer umkan wis 19 deg usettef n tmura n wayyur-a n Tfidiṛalit tagraɣlant n tkurt n uḍar (FIFA) ay d-yeffɣen ass n lexmis. Ma d amkan amezwaru iṣaḥ-d i Teṛjentint ay as-yuwyen amkan-nnes i telɣuɣt n umaḍal, Lalman. Rrbeḥ n teɣlamt taɣelnawt mgal Seychelles (4-0) d uɛeddi-nnes ɣer Teqbuct n Tefriqt n yiɣlanen (CAN-2017) d ayen ay yeǧǧan Idzayriyen ad d-rebḥen sin n yimukan deg usettef n Yunyu.
D tikkelt tis snat deg Lezzayer ad tadef ɣer wumuɣ n 20 n tmura timezwura n tkurt n uḍar useggas-a seg Mayu n 2015. D acu kan, Lezzayer iṣaḥ-itt-id yagi umkan wis 18 gar Dujembeṛ 2014 d Meɣres 2015.
Seg yidis afriqi, Lezzayer d nettat ay d tamurt tamezwarut deg tkurt n uḍar s 941 n tenqiḍin, yerna tezwar Côte d’Ivoire (umi d-iṣaḥ umkan wis 21 deg umaḍal), ula ma d taneggarut-a ay d talɣuɣt n Tefriqt. Ghana (tis 25) d nettat ay d tis 3 deg Tefriqt. Ma d 3-nni n yixṣimen n Lezzayer deg temliliyin n uɛeddi n Teqbuct n Tefriqt n Yiɣlanen 2017, yal yiwet deg-sent d acu n umkan ay tt-id-iṣaḥen. Ityupya iṣaḥ-itt-id umkan wis 101 deg umaḍal, yili d nettat ay d tamezwarut deg tegrawt J ɣer yidis n Lezzayer. Lesotho, taxṣimt wukud ara turar Lezzayer tikkelt ay d-yetteddun, iṣaḥ-itt-id umkan wis 131. Ma d Seychelles tuley-d s yiwen n umkan ɣer tis 186. Ma d Taṛjentint ay yellan d tamezwarut ayyur-a, d tikkelt tamezwarut deg 7 n yiseggasen deg ara tɛawed ad t-teḍḍef.
Cili, ay yeqqlen seg melmi kan d talɣuɣt n Temrikt n Unẓul, terbeḥ-d 8 n yimukan akken ad d-tezg d tis 11. Ma d Fṛansa, ay ixeṣren deg wakal-nnes deg temlilit tammidwant mgal Biljik (3-4), sakkin terna texṣer mgal Albanya (0-1), teqqel ɣer deffir s 13 n yimukan yerna tezga-d d tis 22 (yerna d tamurt tuṛufit tis 15). Ṭṭalyan, seg yidis niḍen, tezga-d d tis 17 (d tis 12 deg Tuṛuft). S waya, snat-a n tmura ur tent-id-yettṣaḥ ara ad ttekkint d timezwura deg tesɣart n 25 Yulyu deg Saint Petersburg n tegrawin ara yettekkin deg Teqbuct n umaḍal n 2018.
Ibeddilen-a imeqranen llan-d ladɣa ɣef lǧal n waṭas n temliliyin ay yettwuraren ayyur yezrin. 26 n temliliyin ay yettwuraren deg Copa América (Taqbuct n Temrikt), 99 n temliliyin niḍen llant-d deg ukatar n uɛeddi ɣer Teqbuct n umaḍal n 2018 neɣ deg temsizewrin timenẓawanin, yerna 88 n temliliyin timmidwanin ay d-yellan. Timliliyin-a akk qrib d azgen seg wakk tid ay yettwuraren ar ass-a deg useggas n 2015 (477). Seg tama niḍen, yessefk ad d-nger tamawt d akken timliliyin ay yettwuraren deg Teqbuct n umaḍal taneggarut yeɣli wazal-nsent. Asettef amaḍlan ay d-yetteddun n FIFA ad d-yeffeɣ deg 6 ɣuct ay d-yetteddun.
