Asebter amenzawi
Tidyanin n Tɣerdayt: tuqqla n lɛafya deffir ccwal-nni ameqran
TAɣERDAYT – Teqqel-d lɛafya ass n ssebt deg twilayt n Tɣerdayt sdeffir ma llant-d tedyanin-nni yesseḥzanen ay yeglan s 22 n tmeddurin deg Berreyyan, Geṛṛaṛa d yiɣzer n Mẓab.
Iɣzer n Mẓab yeqqel, ihi, ɣer tmeddurt-nnes n menwala ass n ssebt, yerna lɣaci llan ttmejmujen deg yizenqan-nnes, sdeffir ma reẓment tḥuna yerna teqqel-d tiddit n tkeṛṛusin deg yibriden, sdeffir ma xlan yizenqan deg wussan yezrin.
ɣef leḥsab n yigensasen n temṣukiwin tinmettiyin yemgerraden n temnaḍt-a, tagnit n tɣellist (laman) tgerrez azekka-nni n wasmi ay d-terza tmagla-nni ay d-yewwi uneɣlaf amenzi, Abdelmalek Sellal.
Kra n wufrinen umaren (feṛḥen) imi tagnit tṣeggem-d « qrib » am zik. « Taɣellist la tlehhu s tɣawla, ugar n wakken neḍmeɛ », ɣef wakken ay d-nnan i Tnegga n Yisalan n Lezzayer.
« Nerra tajmilt yerna nesnemmir aselway n tegduda ɣef yiɣtasen-nnes uǧhiden, d wid ay yeddem deg tegnit d taweɛṛant akken ad ifak ubeḍḍu-a ay yeggzen tadukli taɣelnawt », ɣef wakken ay d-nnan, seg yidis-nsen, yimezdaɣen n Tɣerdayt.
Ass n lǧemɛa, gren-d tiɣri i lɛafya d tuǧǧit n wakk leṣnaf n kaṛuh deg tmesgidiwin n twilayt. Limamat ssawlen-d, deg lxeḍbat-nsen, ɣef uhedden, amsefham d umsuɣal akken ay d-iweṣṣa Lislam.
« Aql-aɣ akk d inselmen, yessefk ad neddukkel yerna ad nemsefham ɣef wazalen n ddin-nneɣ ay yefkan azal i tɣellist (laman) n wayla d yimdanen », ɣef wakken ay d-yenna limam n ugmam n Tneyyet Lmexzen.
Deg temdinin n Geṛṛaṛa d Berreyyan deg mazal lateṛ n tedyanin-nni iqerrḥen, imezdaɣen bdan yagi la ttxemmimen ɣef uzekka « icebḥen ugar », yerna bdan la d-ttheyyin aɛawed n lebni n wayen ay idermen deg temdinin-nsen s lemɛawna n yiduba inagduden.
Tamḍelt n wid ay yemmuten seg tedyanin ay d-yellan deg temdinin-a tella-d deg lɛafya, ɣef wakken ay nwala.
Ur d-telli ara akk kra n tedyant n diri seg wass n lexmis tameddit deg temnaḍt n tɣerdayt deg ay gan yimsulta tabagust n tɣellist d tameqrant, yerna ttɛawanen-ten deg waya yiɣallen n temsetla taɣelnawt ay yellan deg wakk izenqan d yigmanen imeqranen n yiɣzer n Mẓab.
Afraq n yiɣallen n tɣellist deg unrar d tuḍḍfa n 40 n yimdanen deg cikken ttekkan deg tedyanin-nni tuqriḥin d ayen ay yettekkan deg tuqqla n lɛafya d uɛawed n urẓam n umur ameqran seg tḥuna deg temnaḍt-a, ɣef wakken ay d-nwala.
Aneɣlaf amenzu, Abdelmalek Sellal, yedda ass n lexmis ɣer twilayt n Tɣerdayt anda ay yemlal d umur ameqran seg yigensasen ay d-yelhan s yiriri n urkad d lɛafya deg temnaḍt-a s uqader n lewṣayat n uselway n tegduda.
Mass Sellal iwekked-d i yigensasen n tmetti n temnaḍt-a d akken awanak (ddula) iɛewwel akken ad yeg ayen iwatan i tuqqla lɛafya d umsefham gar medden deg twilayt n Tɣerdayt.
